މާޒިޔާ ސްޕޯޓްސް އެންޑް ރެކްރިއޭޝަންގެ ހެޑް ކޯޗު ކަމުގެ މަގާމުން މުހައްމަދު ޝިޔާޒު (މޯހަން) ވަކިކޮށްފިއެވެ.
މާޒިޔާގެ ކޯޗުކަމުގެ މަގާމުން މޯހަން ވަކިކޮށްފައި މިވަނީ ނިމިގެންދިޔަ ޕްރެޒިޑެންޓްސް ކަޕް ފުޓްބޯޅަ މުބާރާތުގައި މާޒިޔާގެ ފަރާތުން ދަށް ކުޅުމެއް ފެނިގެންގޮސްފައިވާ ދަނޑިވަޅެއްގައެވެ. އެގޮތުން އެ މުބާރާތުގައި އެންމެ ފަހުން މާޒިޔާ ކުޅުނު ފަހު 3 މެޗުން ވަނީ ބަލިވެފައެވެ. އެއީ ކްލަބް ގްރީން ސްޓްރީޓްސް އަދި ކްލަބް ވެެލެންސިއާ އަތުންނެވެ. ވެލެންސިއާ އަތުން ޕްރެޒިޑެންޓްސް ކަޕް ފައިނަލްގައި ވެސް މާޒިޔާ ވަނީ ބަލިވެފައެވެ.
މާޒިޔާގެ ކޯޗު ކަމުން މޯހަން ވަކިކުރިކަން ހާމަކޮށް އެ ކްލަބުގެ ރަސްމީ ފޭސްބުކް ޕޭޖުގައި ކޮށްފައިވާ ޕޯސްޓެއްގައި ބުނެފައިވަނީ، މިއީ މާޒިޔާގެ ބޯޑަށް ނިންމަން އުނދަގޫވި ނިންމުމެއް ކަމަށާއި، އެހެންނަމަވެސް ގިނަ ކަންތައްތަކަކަށް ބެލުމަށްފަހު މިވަގުތު ޓީމުގެ ކޯޗުކަމުން މޯހަން ވަކިކުރުން އެއީ އެންމެ ރަނގަޅުގޮތް ކަމަށް ފެންނާތީ ބޯޑުން އެގޮތަށް ނިންމީ ކަމަށެވެ. އަދި ފާއިތުވެގެން ދިޔަ ދުވަސް ތަކުުގައި މާޒިޔާއަށް ކޮށްދިން ހިދުމަތްތަކަށް ޝުކުރު އަދާކުރާކަމަށްވެސް އެ ޕޯސްޓްގައި ވަނީ ބުނެފައެވެ.
މިދިޔަ އަހަރުގެ އޮކްޓޯބަރު 28 ވަނަ ދުވަހު މޯހަން މާޒިޔާގެ ކޯޗު ކަމާއި ހަވާލުވީ މި ސީޒަނުގެ ނިޔަލަށެވެ. މޯހަންގެ ކޯޗުކަމުގެ ދަށުން މާޒިޔާ ވަނީ ޗެރިޓީ ޝީލްޑް ކާމިޔާބުކޮށްފައެވެ.
