ވައްކަމާއި، ކޮރަޕްޝަން ހިންގަނީ މަޖިލިސް މެންބަރުން އަޑީގައި ތިބެގެންކަމަށް މޯލްޑިވްސް ޓްރޭޑް ޔޫނިއަންގެ ނާއިބު ރައީސް ސަައުދުﷲ އަހުމަދު ވިދާޅުވެއްޖެއެވެ.
ސަޢުދު މިހެން ވިދާޅުވީ ދައުލަތުގެ މީޑިއާއިން ރޭ ގެނެސްދިން ކޮމަންޑޫ ދާއިރާގެ ބަހުސްގައި، ކޮރަޕްޝަން ހުއްޓުވުމުގެ ސިޔާސަތާއި ގުޅޭގޮތުން ކެނޑިޑޭޓުން ދެއްކި ވާހަކަފުޅާއި ގުޅިގެންނެވެ.
ސައުދު ވިދާޅުވީ، ވައްކަމާއި، ކޮރަޕްޝަން ހިންގަނީ މަޖިލިސް މެންބަރުން އަޑީގައި ތިބެގެންކަމަށާއި، މިއީ ޒަމާނުއްސުރެން މިކަން ހިނގަމުން އަންނަ ގޮތްކަމަށެވެ. ކުންފުނިތަކުގައި އެކަންކުރާ ގޮތަކީ ކުންފުނިތަކުގެ ބޯޑު މެންބަރުން ގަދަޔަށް އެއްބައިވެގެންކަމަށްވެސް ސަޢުދު ވިދާޅުވިއެވެ.
މިއީ މިއަދަކު މިކަން ހިނގާގޮތެއް ނޫން. މުހިންމީ އިޚްލާސްތެރިކަން.
– ސަޢުދު ވިދާޅުވިއެވެ.
Vahkamaai ,corruption hinganee majulis memberun adeega thibegen.mee zamaanuhsuren mikan higamun ahna goih.kunfunithakuga mikan kuraa gothakee kunfuni thakuge board memberun hama gadhayah ehbaivegen.mee miadhaku mikan higaa gotheh noon.muhinmee ihulaastherikan.@KhabaruOnline
— Saudulla Ahmed (@saudullaahmed1) January 26, 2022
ރޭ ކޮމަންޑޫ ދާއިރާގެ ބަހުސްގައި ވާހަކަފުޅު ދައްކަވަމުން ދައުލަތުގެ މީޑިއާއިން ގެނެސްދިން އެ ދާއިރާއަށް ވާދަކުރައްވާ ތިން ކެނޑިޑޭޓުންގެ ބަހުސްގައި ކޮރަޕްޝަން ރާއްޖޭގައި މިހާރު އޮތް ޙާލަތާއި ގުޅޭގޮތުން ދެންނެވި ސުވާލަށް ޖަވާބުދެއްވަމުން ކޮމަންޑޫ ދާއިރާގެ އިންތިޚާބުގައި ވާދަކުރައްވާ ޕީޕީއެމްގެ ކެނޑިޑޭޓް މޫސާ ފަޠުހީ އާދަމް ވިދާޅުވީ ކޮރަޕްޝަންގެ ވާހަކަ ދައްކާއިރު، ރާއްޖޭގައި މިވަގުތު އެންޓި ކޮރަޕްޝަން ކޮމިޝަނެއް ނެތްކަމަށެވެ.
ފަޠުހީ އެހެން ވިދާޅުވެފައިވާއިރު، އޭސީސީގެ ފަސް މެންބަރު މަޤާމުން ދުރުކުރުމުގެ މަސައްކަތް އެމްޑީޕީގެ ސުޕަ މެޖޯރިޓީ އޮތް ރައްޔިތުންގެ މަޖިލީހުން ކުރަން ފެށުމުން ހުރިހާ މެންބަރުން ވަނީ މަޤާމުން އިސްތިއުފާދެއްވާފައެވެ.
ފަޠުހީ ވިދާޅުވީ، ކޮމަންޑޫ ދާއިރާގެ ކެމްޕެއިންގައި އެމްޑީޕީގެ ކެނޑިޑޭޓް ރާޝިދަށް ވޯޓު ހޯދައިދެއްވުމަށްޓަކައި ކޮރަޕްޝަނުގެ ދަޢުވާ އުފުލިފައިވާ ވަޒީރަކު ޑޯޓުޑޯ ޖައްސަވާލަމަށެވެ. އެއީ ޔޫތު އެންޑް ސްޕޯޓްސް މިނިސްތަރ އަޙްމަދު މަޚްލޫފްކަން ފާހަގަކުރައްވާ ފަޠުހީ ވިދާޅުވީ އެމައްސަލަ ކޯޓާއި ޕްރޮސެކިއުޓާރ ޖެނެރަލްއާއި ދޭތެރޭގަ ދެކޮޅަށް ދުވަނީކަމަށާއި، ޒީރޯ ޓޮލަރެންސް ކޮރަޕްޝަނަށްދޭނަމޭ ވިދާޅުވެ އައި ސަރުކާރުން ހާލަތު މި އޮތީ ފެންނަންކަމަށެވެ.
މި ބަހުސްގައި އެމްޑީޕީގެ ކެނޑިޑޭޓް މުޙައްމަދު ރާޝިދު ވިދާޅުވީ، މިދިޔަ ސަރުކާރުގައި ކޮރަޕްޝަންގެ ބޮޑެތި ޢަމަލުތައް ހިންގިއިރު ޕީޕީއެމް ވެރިން ތިއްބެވީ އަޅާނުލައްވާ ފިނި ކޮޓަރިތަކުގައިކަމަށެވެ.
ރާޝިދު ވިދަޅުވީ، މިހާރު ވެރިކަމުގައި އޮތް ސަރުކާރަކީ ކޮރަޕްޝަނާ ދެކޮޅަށް އިންތިހާއަށް މަސައްކަތްކުރައްވާ ސަރުކާރެއްކަމަށެވެ. އޭނާ ވަނީ ކޮރަޕްޝަންގެ މައްސަލަތައް ބެލުމަށް މިނިވަންކަމާއެކު މަސައްކަތް ކުރުމުގެ ފުރުސަތު މުއައްސަސާތަކަށް ދީފައިވީ ނަމަވެސް އެކަށީގެންވާގޮތަށް މަސައްކަތް ނުކުރާނަމަ އެ މަގާމުތަކުގައި ތިބޭ ފަރާތްތައް ޒިންމާދާރުކުރުވައި މަގާމުން ދުރުކުރަން ތާޢީދުކުރައްވާނެކަމަށް ވިދާޅުވެފައެވެ.
ރާޝިދު ސިފަކުރެއްވީ ނިމިދިޔަ ސަރުކާރަކީ ކޮރަޕްޝަންގެ ހާއްޔެއްގެ ގޮތުގައެވެ. އޭރު އެކި މަޤާމުތަކުގައި ތިއްނެވި ބޭފުޅުން ކޮރަޕްޝަން ހިންގާކަން އެނގިތިބެ އިސްތިއުފާ ނުދެއްވީ ކީއްވެތޯ ސުވާލުކުރައްވާ ރާޝިދު ވަނީ މިދިޔަ ސަރުކާރުގައި ކޮރަޕްޝަންގެ އަމަލުތައް ހިންގިއިރުވެސް އިދިކޮޅު ޕީޕީއެމުގެ ފަރާތްތައް ފިނި ކޮޓަރީގައި އަޅާނުލާ ތިއްބެވީކަމަށް ތުހުމަތުކުރައްވާފައެވެ.
