ކޮމަންޑޫ ދާއިރާގެ އިންތިޚާބުގައި ވޯޓު ދެއްވާއިރު، ނުފޫޒާއި ފިއްތުންތަކަށް ބޯނުލަނބައި، ޤާނޫނުން ކަށަވަރުކޮށްދީފައިވާ އަމިއްލަ އިޚްތިޔާރުގައި ވޯޓު ލުމުގެ ޙައްޤު އަމާނާތްތެރިކަމާއެކު ބޭނުންކުރެއްވުމަށް ވެރިކަން ކުރާ ކޯލިޝަންގައި ހިމެނޭ އެމްއާރުއެމުން ގޮވާލައިފިއެވެ.
ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަނާއި ގުޅިގެން ޤާނޫނާއި ޤަވާއިދުތަކުގެ ތެރެއިން ކެންޕެއިން ޙަރަކާތްތައް ކުރިއަށް ގެންދިއުމަށް ގޮވާލައި މޯލްޑިވްސް ރިފޯމް މޫވްމަންޓް (އެމްއާރުއެމްއިން ނެރުނު ބަޔާނުގައި ބުނެފައިވަނީ ފެބްރުއަރީ މަހުގެ 5 ވަނަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަނަށް ފޯރި އާއެކު އެކި ޕާޓީތަކުން ކެންޕެއިން ކުރަމުންދާއިރު، އިންތިޚާބުތަކާ ގުޅޭގޮތުން ރާއްޖޭގައި ހެދިފައި ހުރި ޤާނޫނުތަކާއި ޤަވާއިދުތަކާ ފުށުއަރާ ގިނަ ކަންކަން މީޑިއާގައި ދަނީ ފެންމަތިވަމުން ކަމަށެވެ.
އިންތިޚާބުތަކާ ގުޅުވައި، ރައްރަށާއި ދާއިރާތަކަށް އަމާޒުކޮށްގެން އެކިއެކި މަޝްރޫޢުތައް ހިންގުމާއި، ކެންޕެއިން ދުވަސްވަރު ކާޑުގެ ބާވަތްތަކާއި، ކާބޯތަކެއްޗާއި، އިލެކްޓްރޯނިކް ސާމާނާއި، ނަގުދު ފައިސާ އަދި ޙައްޖާއި ޢުމްރާ ދަތުރާއި، މަތީ ތަޢުލީމުގެ ފުރުޞަތުތައް ފަދަ "ހަދިޔާ" ރައްޔިތުންނަށް ދިނުމުގެ އިތުރުން ވަޒީފާ އާއި އަސާސީ އެހެނިހެން ޚިދުމަތްތަކަށް ނޫފޫޒު ފޯރުވައި، ބިރު ދެއްކުމާއި އަދި އައިޑީ ކާޑު ފޮރުވުން ފަދަ ކަންކަމަކީ އިންތިޚާބުގެ މާނަ އޮޅޭފަދަ މިންވަރަށް ރާއްޖޭގައި މިހާތަނަށް ބޭއްވި އިންތިޚާބުތަކުގައި ހިނގާފައިވާ ކަންތައްތަކެއްކަމަށް އެމްއާރުއެމްއިން ބުނެފައިވެއެވެ.
ދިވެހިރާއްޖޭގެ ކުރިމަގު ބިނާކުރުމުގައި އެންމެ މުހިއްމު ދަޢުރެއް އަދާކުރާ ޙިއްސާދާރުންނަކީ ތިޔަ ލޮބުވެތި ރައްޔިތުން ކަމުގައިވާއިރު، މި ޕާޓީއިން ދެކޭ ގޮތުގައި ކުރިއަށް މި އޮތް އިންތިޚާބަކީވެސް ރައްޔިތުންނާ ހަވާލު ކުރެވިފައިވާ އަގުހުރި އަމާނާތެއް. އަދި އެއީ އަޅުގަނޑުމެން މި އެދޭ އިސްލާޙް ގެނައުމަށް ލިބޭ އިތުރު ފުރުޞަތެކެވެ. މި އިންތިޚާބުގައި ވޯޓު ދެއްވާއިރު، ނުފޫޒާއި ފިއްތުންތަކަށް ބޯ ނުލަނބައި، ޤާނޫނުން ކަށަވަރުކޮށްދީފައިވާ އަމިއްލަ އިޚްތިޔާރުގައި ވޯޓު ލުމުގެ ޙައްޤު އަމާނާތްތެރިކަމާއެކު ބޭނުންކުރެއްވުމަށް މި ޕާޓީން ގޮވާލަން. އަދި ވޯޓު ދެއްވުމުގައި، ވަގުތީ ގޮތުން ލިބޭ ފައިދާގެ ބަދަލުގައި ރައްޔިތުންނަށް ފައިދާވާނެ ސިޔާސަތުތައް ހުށަހަޅާ، އެ ސިޔާސަތުތައް ރައްޔިތުންނާ ހަމައަށް ގެނެސްދިނުމުގެ ޤާބިލްކަން ހުރި ކެނޑިޑޭޓުންނަށް ވޯޓު ދެއްވުމަށް.
– އެމްއާރުއެމްއިން ބުނެފައިވެއެވެ.
އަދި ރައްޔިތުންގެ މަޖިލީހުގެ މަސްއޫލިއްޔަތާ ގުޅުންނެތް ވަޢުދު ވުމަކީ ވެސް ކެންޑިޑޭޓުން ކެމްޕެއިންތެރޭގައި ކުރާ ކަންކަމަށްވާއިރު، މި ކަންކަމަކީ މިއަދު ދިވެހިރާއްޖެއަށް ދިމާވެފައިވާ ސިޔާސީ އެކިއެކި މައްސަލަތަކުގެ އަސްލާވެސް ގުޅިފައިވާ ކަންތައްތަކެއް ކަމަށެވެ.
އެހެންކަމުން ކުރިއަށް މިއޮތް އިންތިޚާބުގައި ވާދަކުރައްވާ ހުރިހާ ކެނޑިޑޭޓުންންނާއި، އެ ކެނޑިޑޭޓުން ނިސްބަތްވެވަޑައިގަންނަވާ ސިޔާސީ ޕާޓީތަކާއި، އެ ކެނޑިޑޭޓުންނަށް ކެންޕެއިން ކުރާ ފަރާތްތަކުންވެސް ދިވެހިރާއްޖޭގެ އިންތިޚާބާ ބެހޭ ޤާނޫނާއި، އަދި އެހެނިހެން ޤާނޫނުތަކާ ޚިލާފު ނުވާނޭހެން ކެންޕެއިން ކުރެއްވުމަށާއި، ސިޔާސީ ޙަރަކާތްތައް ހިންގުމަށް މި ޕާޓީއިން ގޮވާލަމެވެ.
އަދި ޚަރަދު ކުރުމުގައިވެސް އިންތިޚާބުތަކާ ބެހޭ ޢާންމު ޤާނޫނުގެ 69 ވަނަ މާއްދާގައި (އިންތިޚާބާ ގުޅިގެން ކެންޑިޑޭޓަކު ޚަރަދުކުރަންވާނީ، އެ ކެނޑިޑޭޓަކު ކުރިމަތިލާފައިވާ އިންތިޚާބީ އެ ދާއިރާ އެއްގައި ވޯޓު ދިނުމުގެ ޙައްޤު ލިބިގެންވާ ކޮންމެ މީހަކަށް 1500 (ފަނަރަ ސަތޭކަ) ރުފިޔާގެ މަގުން ހިސާބުކުރުމުން ނުކުންނަ ފައިސާގެ ޢަދަދަށްވުރެ އިތުރުނުވާނެ ޢަދަދަކަށެވެ.) ބަޔާންކޮށްފައިވާ އަދަދަށް ވުރެ އިތުރަށް ޚަރަދު ކުރުމަކީ ޤާނޫނާ ޚިލާފު ކަމަކަށް ވާއިރު، ބޮޑެތި އަދަދުން ޚަރަދު ނުކުރުމަށްވެސް އެމްއާރުއެމުންވަނީ ގޮވާލާފައެވެ.
ހަމަ މިއާއެކު، ކެންޕެއިންގެ ދުވަސްވަރު ޤާނޫނާ ޚިލާފު ކަންކަން ނުހިނގާކަން ކަށަވަރުކޮށް، ކުރިއަށް އޮތް އިންތިޚާބަކީ އިންސާފުވެރި ސައްޙަ އިންތިޚާބަކަށް ހެދުމަށް އިލެކްޝަންސް ކޮމިޝަނާއި، ކަމާއި ގުޅޭ އެހެނިހެން މިނިވަން މުއައްސަސާތައްވެސް، ޒިންމާދާރު ކަމާއި، ޤާނޫނުން ލިއްބައިދީފައިވާ ފުރިހަމަ ބާރާއިއެކު މަސައްކަތް ކޮއްދެއްވުމަށްވެސް އެމްއާރުއެމުންވަނީ ގޮވާލާފައެވެ.
