ސޫދާންގެ އަސްކަރީ ވެރިޔާ ޖެނެރަލް އަބުދުލް ފައްތާހު އަލް ބުރުހާން އެގައުމުގައި އަލަށް އެކުލަވާލާ ސަރުކާރުގެ 15 މިނިސްޓަރަކު އައްޔަން ކޮށްފައިވާ ކަމަށް، ސޫދާންގެ ސޮވެރިންގ ކައުންސިލްއިން ނެރުނު ބަޔާނެއްގައި ބުނެފިއެވެ.
މި ބަޔާނުގައި ބުނެފައިވާގޮތުން، ބުރުހާން އެގައުމުގެ ފޮރިންގ މިނިސްޓަރަކަށް އައްޔަން ކޮށްފައިވަނީ އަލީ ސަދިކް އަލީއެވެ. އަދި އެނާރޖީ މިނިސްޓްރީއަށް އައްޔަން ކޮށްފައިވަނީ މުހައްމަދު އަބުދުއްލާއި މަހުމޫދު އެވެ.
އަދި އޭގެ އިތުރުން މިއަދުގެ ވަގުތެއްގައި ސޫދާންގެ ސޮވެރިންގ ކައުންސިލްއިން ވަނީ އެމެރިލާގެ ޑެލިގޭޝަންއަކާއި ބައްދަލުކޮށް ގައުމީ އެއްބައިވަންތަކަމުގެ ސަރުކާރެއް އެކުލަވާލާނެކަމުގެ ޔަގީންކަންވެސް ދީފައެވެ. އަދި މި ސަރުކާރަކީ ފަންނީ މީހުންގެ މައްޗަށް އެކުލެވޭ ސަރުކާރަކަށް ވުމުގެ އިތުރުން މިހާރު ސޫދާންގައި އުފެދިފައިވާ ސިޔާސީ މައްސަލަތަކަށް ހައްލު ހޯދުމަށް ގައުމީ ފެންވަރުގައި މަޝްވަރާތައް ކުރިޔަށް ގެންދާނެކަމުގެ ޔަގީންވެސް އެމެރިކާގެ ވަފުދަށް ސޫދާންގެ ސޮވެރިންގ ކައުންސިލްއިން ވަނީ ދީފައެވެ.
ސޫދާން އަސްކަރީ ސަރުކާރާ ދެކޮޅަށް އެގައުމުގައި ކުރިޔަށްދިޔަ ބޮޑެތި މުޒާހިރާތަކަށްފަހު، ބޮޑުވަޒީރު އަބުދުﷲ ހަމްދޮކް މިމަހުގެ 3 ވަނަ ދުވަހު ވަނީ އިސްތިއުފާ ދެއްވާފައެވެ.
ސޫދާންގައި އެތައް ހާސްބަޔަކު މުޒާހިރާ ކޮށްފައިވަނީ، ފާއިތުވެދިޔަ އަހަރުގެ އޮކްޓޯބަރު މަހު އެގައުމުގެ އަސްކަރިއްޔާއިން ގެނައި ބަޢާވާތައްފަހު، އިސްތިއުފާދެއް ބޮޑުވަޒީރު ހަމްދޮކް އެގައުމުގެ އަސްކަރިއްޔާއާއެކު ބާރުތައް ހިއްސާ ކުރުމުގެ ގޮތުން ހަދާފައިވާ އެއްބަސްވުމާއި ދެކޮޅު ހެދުމުގެ ގޮތުންނެވެ. ފާއިތުވެދިޔަ އަހަރުގެ އޮކްޓޯބަރުމަހު ގެނައި ބައާވާތައްފަހު ކުރިޔަށްދިޔަ މުޒާހިރާތަކުގައި މިހާތަނަށް 50 މީހުން މަރުވެފައިވެއެވެ.
ސޫދާންގައި ދިގު މުއްދަތަކަށް ޚުދު މުޚްތާރު ވެރިކަމެއް ކުރަމުން އައި، އަލް ބަޝީރު މަގާމުން ދުރު ކޮށްފައިވަނީ، 2019ވަނަ އަހަރު އޭނާއާ ދެކޮޅަށް އެގައުމުގައި ހިގައިދިޔަ ބޮޑެތި މުޒާހިރާތަކަށް ފަހުއެވެ. އެއަށްފަހު، އެގައުމުގައި އެކުލަވާލެވުނު ސަރުކާރުން ވަނީ 2023ގައި އިންތިޚާބެއް ބޭއްވެންދެން އިންތިގާލީ އިންތިޒާމްތަކެއްގެ ދަށުން ވެރިކަމުގެ ބާރުތައް ހިއްސާ ކުރުމަށް އެއްބަސް ވެފައެވެ.
