ލީގު ކަޕްގެ ފައިނަލުގެ ފަހު ޖާގަ ލިވަޕޫލުން ހޯދައިފި

އިނގިރޭސި ލީގު ކަޕްގެ ފައިނަލްގެ ފަހު ޖާގަ ލިވަޕޫލުން ކަށަވަރުކޮށްފިއެވެ.

ލީގު ކަޕްގެ ފައިނަލަށް ލިވަޕޫލް ދަތުރުކުރީ ސެމީ ފައިނަލުގެ ދެވަނަ ލެގުގައި މިރޭ އާސެނަލްގެ މައްޗަށް 0-2 ގެ ނަތީޖާއަކުން ކުރިހޯދައިގެންނެވެ. މި ދެ ޓީމުކުޅުނު ސެމީ ފައިނަލުގެ ފުރަތަމަ ލެގު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ.

އާސެނަލްގެ ދަނޑުގައި ކުޅުނު މި މެޗުގައި ފުރަތަމަ ނުރައްކާތެރި ހަމަލާއެއް އުފެއްދީ އާސެނަލުންނެވެ. އެގޮތުން އެޓީމަށް ލިބުނު ހިލޭ ޖެހުމެއް އަލެކްސަންޑަލަކަޒޭޓް ފޮނުވާލުމުން ލިވަޕޫލްގެ ކީޕަރ އަތުގައި ޖެހިފައި އަދި ގޯލުގެ ހުރަސް ދަނޑީގައި ޖެހިފައި ދިޔައީ ބޭރަށެވެ.

މެޗުގައި ލިވަޕޫލްގެ ފުރަތަމަ ލަނޑު 19 ވަނަ މިނެޓުގައި ކާމިޔާބުކޮށްދިނީ ޑިއެގޯ ޖޮޓާއެވެ. އަދި ދެވަނަ ހާފްގެ 77 ވަނަ މިނެޓުގައި ޖޮޓާ ވަނީ އިތުރު ލަނޑެއްޖަހާ ލިވަޕޫލަށް ލީޑު ފުޅާކޮށްދީފައެވެ.

މެޗުގެ 74 ވަނަ މިނެޓުގައި ކުޅެން އެރި އާސެނަލްގެ ތޯމަސް ޕާޓޭއަށް ވަނީ ދެ ރީނދޫ ކާޑާއެކު ރަތް ކާޑު ހޯދާފައެވެ. ފުރަތަމަ ރީނދޫ ކާޑު 87 ވަނަ މިނެޓުގައިދެއްކި އިރު ދެވަނަ ރީނދޫ ކާޑާއެކު ޕާޓޭއަށް ރަތް ކާޑު ދެއްކީ 90 ވަނަ މިނެޓުގައެވެ.

ލީގު ކަޕްގެ ފައިނަލުގެ ފަހު ޖާަގަ ލިވަޕޫލުން ކަށަވަރުކޮށްފައިވާއިރު، ފައިނަލުގައި ލިވަޕޫލް ނުކުންނާނީ ޗެލްސީ އާއި ދެކޮޅަށެވެ. ފައިނަލް މެޗު ކުޅުމަށްހަމަޖެހިފައިވަނީ އަންނަ މަހުގެ 27 ވަނަ ދުވަހު ލަންޑަންގެ ވެމްބްލީ ސްޓޭޑިއަމްގައެވެ.