އިންތިޚާބާއި ދިމާކޮށް ބަޖެޓްގައި ނެތް ކަންތައް ކޮމަންޑޫ ދާއިރާގައި ފެށުމަކީ ކޮރަޕްޝަންގެ އަމަލެއް ކަމުގައި ކުރީގެ މިނިސްޓަރ މުހައްމަދު މަލީހު ޖަމާލު ވިދާޅުވެއްޖެއެވެ.
އަންނަ މަހުގެ 5 ވަނަ ދުވަހު ބޭއްވުމަށް ހަމަޖެހިފައިވާ ކޮމަންޑޫ ދާއިރާގެ ބައި އިލެކްޝަނާއި ދިމާކޮށް، ސަރުކާރުން ދަނީ އެދާއިރާގައި ގިނަ މަސައްކަތްތަކެއް ފެށުމަށް ނިންމާފައެވެ. ޚާއްސަކޮށް، ބަޖެޓުގައި ނެތް ކަންކަންވެސް ކުއްލިއަކަށް ބަޖެޓް ހަމަޖެހި ކުރުމަށް ނިންމުމާއި ގުޅިގެން ގިނަ ތުހުމަތުތަކެއް ދަނީ ކުރެވެމުންނެވެ. އިންތިޚާބު ބޯމަތިވެފައިވާ މިދަނޑިވަޅާއި ދިމާކޮށް ސަރުކާރުން ކުރަމުންދާ ކަންތައްތަކަކީ އިންތިޚާބަށް ނުފޫޒު ފޯރުވުމަށް ހިންގަމުންދާ އަމަލުތަކެއްގެ ގޮތުގައި މަލީހު ވަނީ ސިފަ ކުރައްވާފައެވެ.
މަލީހު ވިދާޅުވީ އިންތިޚާބު ބޯމަތިވެފައި ވަނިކޮށް، ކޮމަންޑޫ ދާއިރާގައި އެތައް ޕްރޮޖެކްޓެއް ކުއްލިއަކަށް ފެށުމަކީ ކޮރަޕްޝަންގެ އަމަލެއް ކަމަށެވެ. މިކަންކަމަކީ ބެލެންޖެހޭ ކަންތައްތަކެއް ކަމަށެވެ. މިއަދު ފެނިގެންދަނީ ދިވެހިންގެ އުންމީދު ކުރި ނަތީޖާ ނޫންކަމަށާއި، މިއީ ވަރަށް ނާތަހުޒީބު ކަންތައްތަކެއް ކަމުގައި މަލީހު ވަނީ ވިދާޅުވެފައެވެ.
އިންތިޚާބަށް ނުފޫޒު ފޯރުވަން ބަޖެޓްގައި ނެތް ކަންތައް ކޮމަންޑޫ ދާއިރާގައި ފެށުމަކީ ކޮރަޕްޝަންގެ އަމަލެއް. ރައީސް އިބޫ އެންޓި ކޮރަޕްޝަން ކޮމިޝަނަށް ހާޒިރުކޮށް މައްސަލަ ބަލަންޖެހޭ. މިއީ ދިވެހިން އުންމީދުކުރި ޑިމޮކްރަސީއެއް ނޫން. ކުޑަ ކާފު ބޮޑު ކާފުގެ ޒަމާނާ ތަފާތެއް ނެތް.
– މަލީހު ވިދާޅުވިއެވެ.
ބަޖެޓުގައި ނުހިމެނޭ ކަންތައްތަކުގެ ތެރެއިން ކޮމަންޑޫއާއި މަތި ކޮމަންޑޫ ބްރިޖަކުން ގުޅާލުމުގެ މަސައްކަތް ހުކުރު ދުވަހު ފެށުމަށް ވަނީ ހަމަޖެހިފައެވެ. ރައީސް ވިދާޅުވެފައިވަނީ މިއީ ކެމްޕެއިނަށް ނުފޫޒު ފޯރުވުންކަމަށް ވާދަވެރި ފަރާތްތަކުން ވިދާޅުވަމުން ދިޔަނަމަވެސް އެކަން ހުއްޓާލެވޭކަތް ނެތްކަމަށާއި، އެކަންކަން ދާނީ ބާރު ސްޕީޑުގައި ކުރިއަށްކަމަށްވެސް ރައީސް ވިދާޅުވިއެވެ.
ރާޝިދުގެ ކެމްޕެއިން ޖަލްސާގައި ރައީސްވަނީ ކޮމަންޑޫގެ އިތުރުން މަރޮއްޓާއި ފޯކައިދޫއަށްވެސް ވަޢުދުތަކެއް ވެވަޑައިގެންފައެވެ. އެގޮތުން ކޮމަންޑޫ ބަނދަރުގެ ބޭރު ތޮށީގައި ދޯނިފަހަރު އެޅޭނެ ގޮތް ހަދައި، އެ ރަށުގައި އައިސް ޕްލާންޓެއް ޤާއިމްކުރައްވާނެކަމަށާއި، ކޮމަންޑޫގެ ލޭންޑް ޔޫސް ޕްލޭން ނިމުމުން އެ ރަށުގެ ހިއްކި ބިމުން ގޯތިދޫކުރަން ފަށްޓަވާނެކަމަށް ރައީސް ވިދާޅުވިއެވެ.
އަދި އެ ދާއިރާގެ ޒުވާނުންނަށް ވަޒީފާގެ ފުރުޞަތު ތަނަވަސްކޮށްދެއްވުމުގެ ގޮތުން ކޮމަންޑޫ ކައިރީގައި އޮންނަ ރަށްތަކުގައި ޓޫރިޒަމް ފަށްޓަވާނެކަމަށާއި، ފޯކައިދޫގެ ޕޮލިސް ސްޓޭޝަނާއި ސިއްހީ މަރުކަޒުގެ މަސައްކަތް މިއަހަރު ފެށޭނެކަންވެސް ރައީސް ފާހަގަކުރެއްވިއެވެ. އަދި ފޯކައިދޫ ޗަކަ ބިމަށް ވެލި އަޅައި، އެ ތަނުން ގޯތިދޫކުރުމުގެ މަސައްކަތްވެސް އަވަހަށް ފެށިގެންދާނެކަމަށާއި. އަންނަ ހަފުތާގައި މަރޮށީގެ ބަނދަރުގެ މަސައްކަތްވެސް ފެށޭނެކަމަށް ރައީސް ވިދާޅުވިއެވެ. މިނޫނަސް އެ ދާއިރާއަށް ސަރުކާރުން ކޮށްދޭނެ ވަރަށް ގިނަ ކަންކަން ހުރިކަމަށްވެސް ރައީސް ވިދާޅުވިއެވެ.
One Response
މިއީ ކޮންމެ މީހަކު ވެރިކަމުގައި ހުއްޓަސް ކުރި ކަން. އިސްކަންދޭންވީ ރައްޔިތުނއނަށް ކަމެއް ކޮށްދެވޭތޯ. އިދިކޮޚޮޅު މީހުންންނަށް ފުރުސަތު ބޮޑުކޮށް ދެވޭތޯއެއް ނޫން.