ޖުޑިޝަލް ސާވިސް ކޮމިޝަނުން ފަނޑިޔާރުންނާއި ގުޅޭގޮތުން ބަލަމުންދާ މައްސަލަތަކުގެ ތެރެއިން މިދިޔަ އަހަރު ނިމުނިއިރު، 55 މައްސަލައެއްގެ ތަހުގީގް ނުނިމިވާކަމަށް ޖޭއެސްސީން ހާމަކުރައްވައިފިއެވެ.
ޖުޑިޝަލް ސާވިސްކޮމިޝަނުން އާންމު ކޮށްފައިވާ މިދިޔަ އަހަރުގެ ތަފާސް ހިސާބުތަކަށް ބަލާއިރު، މިދިޔަ އަހަރު ފަނޑިޔާރުންގެ ސުލޫކީ މައްސަލައިގެ ގޮތުގައި ޖުޑީޝަލް ސާރވިސް ކޮމިޝަނަށް ހުށަހެޅިފައިވަނީ 404 މައްސަލަކަމަށް ވަނީ ބުނެފައެވެ. މީގެ ތެރެއިން "މައްސަލަ ބެލުމާމެދު ގޮތެއް ނިންމާ ކޮމިޓީން" 395 މައްސަލަ ނިންމާފައިވާކަމަށެވެ. އަދި 2022 ވަނަ އަހަރު ފެށުނުއިރު "މައްސަލަ ބެލުމާމެދު ގޮތެއް ނިންމާ ކޮމިޓީން"ގައި ގޮތެއް ނުނިމި އޮތީ 42 މައްސަލައެއް އޮތްކަމަށެވެ.
ޖޭއެސްސީން ވިދާޅުވީ 2021 ވަނަ އަހަރު 26 މައްސަލައެއް ތަޙްޤީޤު ކުރުމަށް ނިންމާފައިވާކަމަށެވެ. (މައްސަލަ ބެލުމާމެދު ގޮތެއް ނިންމާ ކޮމިޓީގައި 2020 ވަނަ އަހަރު ބަލަން ނިންމާފައިވާ 5 މައްސަލަ، 2021 ވަނަ އަހަރު، މި 5 މައްސަލަ ވަނީ ތަހްޤީޤު ކުރުމަށް ކޮމިޓީއަކާ ހަވާލުކޮށްފައިކަމަށެވެ. އެހެންކަމުން 2021 ވަނަ އަހަރު މައްސަލަ ބެލުމާމެދު ގޮތެއް ނިންމާ ކޮމިޓީއިން ބަލަން ނިންމި މައްސަލައިގެ އަދަދަކީ 21 މައްސަލަ ކަމަށާއި، ނަމަވެސް ތަޙްޤީޤު ކުރުމަށް 2021 ގައި ކޮމިޓީއާ ހަވާލުކުރި މައްސަލަގެ އަދަދަކީ 26ކަމަށް ޖޭއެސްސީން ވިދާޅުވެއެވެ.
އެކޮމިޝަނުން ވިދާޅުވީ މިދިޔަ އަހަރު 77 ތަޙްޤީޤު ކޮމިޓީއަކުން 88 މައްސަލައިގެ ތަޙްޤީޤު ކުރިއަށް ގެންދި ކަމަށާއި، އަދި 33 މައްސަލައިގެ ތަޙްޤީޤުކޮށް ނިންމާފައިވާއިރު، ތަޙްޤީޤު ނުނިމި އޮތީ 55 މައްސަލަ އޮތްކަމަށެވެ.
މިދިޔަ އަހަރު ފަނޑިޔާރުކަމުން ވަކިކުރުމަށް ރައްޔިތުންގެ މަޖިލީހަށް ހުށަހަޅާފައިވަނީ 01 ފަނޑިޔާރުންގެ މައްސަލަ ކަމަށާއި، އެއީ ކްރިމިނަލް ކޯޓިގެ ޤާޟީ އިސްމާއިލް ރަޝީދު ކަމަށެވެ. މިދިޔަ އަހަރު ވަކިކުރުން ފިޔަވައި އެނޫން ސުލޫކީ ފިޔަވަޅުތައް އެޅިފައިވަނީ 14 ފަނޑިޔާރުންނަށް ކަމަށްވެސް ޖޭއެސްސީން ވިދާޅުވެއެވެ.
މިދިޔަ އަހަރު ސުލޫކީ މައްސަލަ ސާބިތުނުވާކަމަށް 18 މައްސަލައެއް ނިންމާފައިވާކަމަށްވެސް ޖޭއެސްސީން ވިދާޅުވެއެވެ. މިދިޔަ އަހަރުގެ ނިޔަލަށް "މައްސަލަ ބެލުމާމެދު ގޮތެއް ނިންމާ ކޮމިޓީން" ގެ 112 ބައްދަލުވުމެއް ބޭއްވިފައިވާކަމަށް ޖޭއެސްސީން ވަނީ ވިދާޅުވެފައެވެ.
