އަވައްޓެރި އަފްޣާނިސްތާނުގެ ހާލަތު ވަރަށް ބޮޑަށް ގޯސްވެ އިންސާނީ އެހީތެރިކަމަށް ޖެހިފައިވާ ދަނޑިވަޅެއްގައި އެންމެ ފުރަތަމަ އެހީގެ އަތެއް ދިއްކޮށްލީ އިންޑިއާގެ ފަރާތުންނެވެ. ކޮވިޑުގެ ސަބަބުން އަފްޣާނުގެ އިޤްޠިޞާދު މަރުގެ ފުންފަތް މައްޗަށް ހުށައެޅިފައިވާ ދަނޑިވަޅެއްގައި އިންޑިއާއިން ވެދިން އެހީ ޠާލިބާނުގެ ސަރުކާރުން ބަލައިގެންފައިވާ ކަމަށް އަފްޣާނާއި އިންޑިއާގެ ނޫސްތަކުން ރިޕޯޓްކޮށްފައިވެއެވެ.
އިންޑިޔާގެ ފަރާތުން އެހީތެރިކަމެއް ދިއްކޮށްލީ އަފްޣާނުގެ ސަރުކާރު ބަދަލުވެ ވެރިކަން ޠާލިބާނުގެ އަތްމައްޗަށް ބަދަލުވުމުން އިންޑިއާ އާއި އަފްޣާނުގެ ދެމެދުގައި އޮތް ޒަމާންވީ އެކުވެރި ގުޅުން ހީނަރުވެދާނޭ ކަމަށް ބެލެވިފައިވާ ދުވަސްވަރެއްގައެވެ. ކޮވިޑުގެ މިހާލަތުގައިވެސް އިންޑިއާއިން އަންނަނީ، ޙާލުގައި ޖެހިފައިވާ އަވައްޓެރި ޤައުމުތަކަށް ވަރަށް ބޮޑެތި އެހިތެރިކަމެއް ފޯރުކޮށްދެމުންނެވެ. ޠާލިބާން ޖަމާޢަތުގެ ތަރުޖަމާނު ޒަބީއުﷲވެސް ވަނީ މިކަން ކަށަވަރުކޮށްދެއްވާފައެވެ.
އިންޑިއާއިން އަފްޣާން ރައްޔަތުންނަށް ހަދިޔާކުރި ތަކެތީގެ ތެރޭގައި ކާބޯތަކެއްޗާއި އަންނައުނު ހިމެނެއެވެ. މިތަކެއްޗަކީ އަފްޣާނުގެ ރައްޔަތުން ނުހަނު ބޭނުންވެފައިވާ ތަކެތިކަން ފާހަގަ ކުރެވެއެވެ. އިންޑިއާގެ އެހީތެރިން ލިބުނު ދުވަސްވަރަކީ ބަނޑުހައިހޫނުކަމާއި ތަދުކަން އަފްޣާނުގައި އާންމުވެ، އެތައްހާސް ރައްޔަތުންނެއް ޙާލުގައި ޖެހިފައިވާ ދުވަސްވަރެކެވެ.
މީގެއިތުރުން، ސިއްޙީ ދާއިރާއަށް ބޭނުންވެފަައިވާ އެކިކަހަލަ ބޭސްތައްވެސް ހިމެނޭކަން ފާހަގަ ކުރެވެއެވެ. އަދިވެސް ފާހަގަކޮށްލެވޭ އެހީގެ ތެރޭގައި 500000 ކޮވިޑް ވެކްސިންވެސް ހިމެނެއެވެ. މިއި ދުނިޔޭގެ ސިއްޙަތާއި ބެހޭ ޖަމްޢިއްޔާ މެދުވެރިކޮށް ވެދީފައިވާ އެހިތަކެކެވެ. މިއެހީއާއި ހަވާލުވެފައި ވަނީ އަފްޣާނުގެ ވެރިރަށް ކާބުލްގައި ހުންނަ އިންދިރާ ގާންދީ ހޮސްޕިޓަލުންނެވެ.
އިންޑިއާގެ އެކްސްޓާރނަލް އެފެއާރޒް މިނިސްޓިރީ އާއި ހަވާލާދީ ބައެއް ނޫސްތަކުގައި ރިޕޯޓްކުރާ ގޮތުގަައި ކުރިޔަށް ހުރި ހަފުތާތަކުގައި އަފްޣާނިސްތާނަށް އިތުރުއެހީތައް ފޯރުކޮށްދޭނެވެ. އަވައްޓެރި އިންޑިއާއަކީ އަވައްޓެރި ހުރިހާ ޤައުމަކާވެސް ވަރަށް ގާތް ގުޅުމެއް ބޭއްވުމަށް މަސައްކަތް ކުރާ އަދި އެހާމެ ދިލަތި އެހީތައް ފޯރުކޮށްދޭ ޤައުމެކެވެ.
