އަދުގެ ދުނިޔޭގައި ކޮންމެ ގައުމަކަށްވެސް އެގައުމެއްގެ ގައުމީ ދިފާޢުގައި މުހިންމު ދެ އައްޑަނަައެއް އޮވެއެވެ. މާނައަކީ، ބޭރުގެ އުދުވާނީ ހަމަލާތަކުންނާއި، އަދި ގައުމަށް ކުރިމަތިވާ އެނޫނަސް ތަފާތު ނުރައްކާތަކުން ގައުމަށް ސަލާމަތާއި ރައްކާތެރިކަން ކަށަވަރު ކޮށްދިނުމުގައިމ އެންމެ ކުރީ ސަފުގައި ހަރަކާތްތެރިވާ ދެބާރެއް އޮވެއެވެ.

އެއީ، ގައުމުގެ ދިފާޢީ ބާރާއި، ޓީމް ޚާރިޖީއެވެ. އެނޫން ގޮތަށް ދަންނަވަނީ ނަމަ، އެމްޑީއެފްއާއި ފޮރިންގ ސާރވިސްއެވެ.

މިގޮތުން ކަނޑިބަޑިން ގައުމަށް ކުރިމަތިވެދަާނޭ ނުރަކަލަކުން ގައުމު ސަލާމަތް ކުރުމަށް ގައުމުގެ ދިފާޢީ ބާރު ތާއަބަދު ހޭލާ އޮންނައިރު، ގައުމުގެ ފޮރިން ސާރވިސްގައި ޚިދުމަތް ކުރާ މުވައްޒަފުން ދުނިޔޭގެ އެކި ކަންކޮޅުތަކުގައި ތާއަބަދުމެ މަސައްކަތް ކުރަމުންދާނީ، އެވަގުތަކު އޮންނަ ސަރުކާރެއްގެ ޚާރިޖީ ސިޔާސަތު ތަންފީޒު ކޮށްދީ، ގައުމުގެ މިނިވަންކަމާއި، ސިލްމާއި ސަލާމަތު ނަގަހައްޓާދީ، ޑިޕްލޮމަސީގެ ގުޅުން ދަހަމައްޓާ ދިނުމުގައެވެ. އަދި ޑިޕްލޮމަސީގެ ގުޅުމުގެ ތެރެއިން، ގައުމަށް ހޯދާ ދޭންނެޖޭހޭ އެތަކެއް އެހީތެރިކަމެއް ކަށަވަރު ކޮށްދީ، ބައިނަލް އަގުވާމީ ގުޅުންތަކުގެ ތެރެއިން ރައްޔިތުންނަށް ހޯދާދޭން ޖެހޭ އެތަކެއް ލުއިފަސޭހަކަމާއި ފަސޭހަތައް ހޯދާދީ، ގައުމުގެ ޝަފަރާއި ކަރާމާތްވެސް ބައިނަލް އަގުވާމީ މަސްރަހުގައި ނަގަހައްޓާ ދެމެހެއްޓުމުގެ މުހިންމު ޒިންމާ އަދާ ކުރުމުގައެވެ.

އެހެންކަމުން ހުރިހާ ގޮތަކުން ބެލި ކަމުގައިވި ނަމަވެސް، ގައުމެއްގެ ސަލާމަތާއި ރައްކާތެރިކަމަށް އެގައުމެއްގެ އަސްކަރިއްޔާއިން އަދާ ކުރަމުންދާ މުހިންމު ދައުރެކޭ އެއްފަދައިން، ކޮންމެ ގައުމެއްގައިވެސް ފޮރިންގ ސާވިސްއަކީވެސް، ގައުމުގެ ރައްކާތެރިކަން ކަށަވަރު ކޮށްދީ، އަދި ގުޅުން ދަމަހައްޓާ ދިނުމުގައި އެންމެ މުހިންމު ދައުރެއް އަދާކުރާ އެއް ބާރެވެ.

އަދި ޑިޕްލޮމަސީގެ ގުޅުމުގެ ތެރެއިން ގައުމުގެ ސަލާމަތާއި، ރައްކާތެރިކަން ކަށަވަރު ކުރުމާއި، ބޭރުގެ ޖަމިއްޔާ ޖަމާއަތްތަކުންނާއި ގައުމުތަކުން ހޯދާންޖެހޭ އެހީތެރިކަމުގެ ބޮޑުކަމާއި މުހިންމުކަން، ފާއިތުވެދިޔަ ސަރުކާރާއި، މި ސަރުކާރުގެ ފާއިތުވެދިޔަ 3 އަހަރެއްހާ މުއްދަތުގެ މި ސަރުކާރުގެ ޚާރުޖީ ސިޔާސަތުގެ ތެރެއިން ވަނީ ވަރަށްވެސް ސާފުކޮށް ފެނިގެން ގޮސްފައިކަމުގައި ދަންނަވަން ޖެހެއެވެ.

ޗައިނާގެ ޚާރިޖީ ވަޒީރުގެ ދަތުރުފުޅު! ގިނަ ސުވާލުތަކެއްގެ ޖަވާބު!

ޗައިނާގެ ފޮރިން މިނިސްޓަރ އަދި ސްޓޭޓް ކައުންސިލަރ ވާންގް ޔީ އިއްޔެ ރާއްޖެއަށް ކުރެއްވި ދަތުރުފުޅު ވެގެން ގޮސްފައިވަނީ، ރައީސް އިބުރާހިމް މުހައްމަދު ސާލިހުގެ ވެރިކަމުގައި ޗައިނާ ސަރުކާރުގެ އެންމެ އިސްވެރިޔަކު، ރާއްޖެއަށް ކުރެއްވި ފުރަތަމަ ދަތުރު ފުޅެވެ.

އަދި ޗައިނާގެ ފޮރިން މިނިސްޓަރުގެ މި ދަތުފުޅަކީ، ވަކީން ޚާއްސަކޮށް، ރައީސް ސާލިހުގެ ވެރިކަމުގައި، އިންޑިއާއާއި އެކީ ދަމަހައްޓަވަމުން ގެންދަވާ ޚާއްސަ ގުޅުމުގެ ނަތީޖާއެއްގެ ގޮތުން، ޗައިނާ ސަރުކާރާ ރައީސް ސާލިހުގެ ސަރުކާރާ ދެމެދު އޮތް ގުޅުން ގޯސްވެގެން ގޮސްފައިވާ ކަމަށް އެތައްބަޔަކު ލަފާކޮށްފައި ވަނިކޮށް ކުރެއްވި ދަތުރުފުޅެއްކަންވެސް ފާހަގަ ކޮށްލެވެއެވެ. އަދި ހަމައެއާއެކު، ކޯވިޑް ކާރިސާގެ ތެރޭގައިވެސް، "މާ ބޮޑެތި" އެހީތަކެއް ޗައިނާގެ ފަރާތުން ރާއްޖެއަށް ލިބިގެން ގޮސްފައި ނުވުމުގެ ނަތީޖާއެއްގެ ގޮތުން، މިގޮތުން ކުރެވުމުން އައި ހީތަކަށް އިތުރު ބާރެއް ލިއްބައި ދީފައިވަނިކޮށް، ޗައިނާގެ ފޮރިންގ މިނިސްޓަރުގެ މިދަތުރުފުޅުކީ، މިގޮތުން ކުރެވެމުން އައި ހީތަކާއި އަދި ޝައްކުތައް އިންތިހާއަށް މައްޗަށް ގޮސްފައިވަނިކޮށް، ޗައިނާ ސަރުކާރުގެ އެންމެ މަތީ ފަންތީގެ ވެރިއަކު ރާއްޖެއަށް ކުރެއްވި ދަތުރު ފުޅެއް ކަންވެސް ފާހަގަ ކޮށްލަން ޖެހެއެވެ.

އެހެންނަމަވެސް، ޗައިނާގެ ޚާރިޖީ ވަޒީރުގެ މި ދަތުރުފުޅުގެ ތެރެއިން އެންމެ ބޮޑަށް ފާހަގަވެގެން ދިޔަ އެއްކަމަކަށް ވެގެން ދިޔައީ، ޚާރިޖީ ވަޒީރު ވާންގް ޔީއަށް މަރުޙަބާ ދެންނެވުމަށް، ރާއްޖޭގެ ފޮރިން މިނިސްޓަރ އަދި އދ.ގެ ޢާންމު މަޖިލީހުގެ ރައީސް ޢަބްދުﷲ ޝާހިދު ނިއުޔޯކުގައި ހުންނެވުމަށްފަހު ރާއްޖެ ވަޑައިގަތް ގަތުމެވެ.

އަދި ވަކީން ޚާއްސަކޮށް، ދާދި ފަހުން ރާއްޖެ ވަޑައިގެންނެވި، ބަންގލާދޭޝްގެ ބޮޑުވަޒީރު ޝެއިޚް ހަސީނާ ރާއްޖެ ވަޑައިގަތް ދަތުރުފުޅުގައި ގައުމެއްގެ ވެރިއަކަށް ސްޓޭޓް މިނިސްޓަރު ފެންވަރުގެ މަރުހަބާއެއް އެއަރޕޯޓުން ދެންނެވުމަށްފަހު، ޗައިނާގެ ޚާރިޖީ ވަޒީރަށް މަރުހަބާ ދެންނެވުމަށް ޝާހިދު މާލެ ވަޑައިގެންނެވުމުން ޗައިނާއަކީ އަދިވެސް ރާއްޖެއަށް މުހިންމު ބައިވެރިއެއްކަން މިސަރުކާރުން ސާބިތު ކޮށްދޭން ބޭނުންވެ، އަދި ޚާރިޖީ ސިޔާސަތުގެ ހުރިހާވެސް އަމާޒެއް ހުރީ ދުނިޔޭގެ ބޮޑެތި ބާރުތަކާއެކީ ރަގަޅު ގުޅުމެއް ދެމެހެއްޓުމާ ދިމާލަށް މިސްރާބު ކޮށްފައިކަންވެސް، ވަރަށްވެސް ރަގަޅަށް ޗައިނާގެ ފޮރިންގ މިނިސްޓަރުގެ ދަތުރުފުޅުން ވަނީ ކަށަވަރުވެ ޔަގީންވެގެން ގޮސްފައެވެ.

އަދި ކޯވިޑްގެ އާލަަމީ ވަބާގެ މި ވަގުތުގައި، ޗައިނާގެ އެންމެ މަތީ ފަންތީގެ ވެރިއަކު ރާއްޖެ ވަޑައިގެން، މިދަތުރުފުޅުން ސަރުކާރުން ހާސިލްކުރަން ބޭނުންވީ ކަންކަމުގެ ލިސްޓުގެ އެންމެ ކުރީގައި އޮންނާނީ، މާލީ އެހީތެރިކަން ކަމުގައިވާތީ، މިއީ ނުހަނު މުހިންމު ދަނޑިވަޅެއްގައި ޗައިނާގެ ފޮރިނގް މިނިސްޓަރު ރާއްޖެއަށް ކުރެއްވި ދަރުފުޅެއްކަންވެސް މިފުރުސަތުގައި ފާޙަގަ ކޮށްލަން ޖެހެއެވެ.

އަދި މި ހިލޭ އެހީގެ އިތުރުން ރާއްޖޭގެ ފަސް ރަށެއްގައި މައިކްރޯ ގްރިޑް ސީވޯޓާ ޑީސެލިނޭޝަން ޕްލާންޓް ގާއިމް ކުރަން 199 މިލިއަން ރުފިޔާގެ މަޝްރޫއުއެއް ޗައިނާގެ އެހީގައި ހިންގުމާއި، ސިނަމާލެ ބްރިޖްގެ މެއިންޓަނަންސް ޗައިނާ ސަރުކާރުން އަނެއްކާވެސް ބަލަހައްޓާނެ ކަމަށްވެސް ފޮރިން މިނިސްޓްރީން ވަނީ ބުނެފައެވެ.

އަދި މީގެ އިތުރުން، ކޮވިޑް-19 އާ ގުޅިގެން އަޅާފައިވާ ފިޔަވަޅުތައް ނިމުމުން، ޗައިނާއަށް ދަތުރުކުރާ ދިވެހިންނަށް ފުރަތަމަ ފަހަރަށް އޮން އެރައިވަލް ވިސާ ދޭން ނިންމުމުގެ އިތުރުން، މި ދަތުރުފުޅުގައި ވަނީ، ދިވެހި ސަރުކާރާ ޗައިނާ ސަރުކާރާއެކީ، ބޯފެން ފޯރުކޮށްދިނުމަށާއި ސިއްހީ ދާއިރާ އިން އެހީވުމާ ގުޅޭ އެއްބަސްވުމެއްގައި ވެސް ދެގައުމުން ސޮއި ކޮށްފައެވެ.

އެހެންކަމުން، ރާއްޖެއާއި ޗައިނާއާ ދެމެދު އޮތް ޚާރިޖީ ގުޅުމަށް 50 އަހަރު ފުރުން ފާހަގަކުރުމުގެ ގޮތުން، ޗައިނާގެ ފޮރިންގ މިނިސްޓަރު ރާއްޖެއަށް ކުރެއްވި ދަތުރުފުޅަކީ، ރާއްޖެއާއި ޗައިނާ ސަރުކާރާ ދެމެދު އޮތް ގުޅުމުގެ ވަރުގަދަކަން ސާފު ކޮށްދިނުމުގެ އިތުރުން، ޗައިނާއަކީ އަދިވެސް ރާއްޖޭގެ ތަރައްގީގެ މުހިންމު ބައިވެރިއެއްކަން ސާބިތު ކޮށްދިން ދަތުރުފުޅެއްގެ ގޮތުގައި ސިފަވާން އޮތްކަމުގައި ދަންނަވަން ޖެހެއެވެ.

ޚާރިޖީ ސިޔާސަތު އޮތީ ވަކި އަތަކަށް ބުރެވެފައިތަ؟

ރައީސް އިބުރާހިމް މުހައްމަދު ސާލިހު ވެރިކަމަށް ވަަޑައިގަތުމަށްފަހު، ރާއްޖޭގެ ޚާރިޖީ ސިޔާސަތުގެ ތެރެއިން އެންމެ ބޮޑަށް ފާހަގަވެގެން ދިޔަ އެއް ބަދަލެއްގެ ގޮތުގައި ފެނިގެން ގޮސްފައިވަނީ، އިންޑިއާ ސަރުކާރާ އެކީ ދަމަހައްޓަމުން އަންނަ ޚާއްސަ ގުޅުމެވެ. އަދި ރައީސް ޔާމިންގެ ދައުރުގައި ޗައިނާ ސަރުކާރުން ރާއްޖެގެ ތަރައްގީގައި އަދާކުރަމުން ދިޔަ ދައުރު، މި ވެރިކަމުގައި އަދާ ކުރަމުންދަނީ އިންޑިއާއިން ކަމުގައިވެސް ދަންނަވަން ޖެހެއެވެ.

އަދި އިންޑިއާއާއެކު ދަމަހައްޓަމުންދާ ގާތް ގުޅުމުގެ ނަތީޖާއެއްގެ ގޮތުން، ޗައިނާ ސަރުކާރާއެކީ، މިސަރުކާރުން ދަމަހައްޓަމުންދާ ގުޅުމަށް ނޭދެވޭ އަސަރުތަކެއް ކޮށްފައިވާކަމަށް ގިނަބަޔަކު އެތަކެއް ހީތަކެއް ފާއިތުވެދިޔަ މުއްދަތުގައި ކޮށްފައިވި ނަމަވެސް، ޗައިނާގެ ޚާރިޖީ ވަޒީރުގެ ދަތުރުފުޅުން މިގޮތުން ކުރެވުނު ހީތަކާއި ޝައްކުތަކަށް ތަސައްލީއެއް ލިބިގެން ގޮސްފައިވަ ކަމުގައި ދަންނަވަން ޖެހެއެވެ.

ހަމަ އެއާއެކު، ރައީސް ޔާމިންގެ ވެރިކަމުގައި ރާއްޖެއިން ސިޔާސީ ގުޅުން ކަނޑާލި ގަތަރާއެކު ގުޅުން ގާއިމްކޮށް، ރާއްޖެއިން ކޮމަންވެލްތުން ވަކި ވެފައި ވަނިކިށް، ކޮމަންވެލްތުގައި އަލުން ބައިވެރިވެ، އަދި އދ.ގެ އާންމު މަޖިލިހުގެ ރައީސްކަން ރާއްޖެއަށް ލިބި، މިގޮތުން ބައިނަލްއަގުވާމީ މަސްރަހުގައި ޚާރިޖީ ދާއިރާއިން ރާއްޖެއި އަދާކުރަމުން ދައުރުން ސާފުވާން އޮތް އެއް ހަގީގަތަކީ، މި ސަރުކާރުގެ ޚާރިޖީ ސިޔާސަތު އިންޑިއާއަތަށް ބުރަވެފައި އޮތަސްވެސް، ބައިނަލް އަގުވާމީ މަސްރަހުގައި މުހިންމު ދައުރެއް އަދާކުރަން ރާއްޖެއިން ބޭނުން ވެފައިވާ މިންވަރެވެ.

އަދި ހަމައެއާއެކު ބައިނަލް އަގުވާމީގޮތުން ވަކިއަތަކަށް ބުރަނުވާ ޚާރިޖީ ސިޔާސަތެއް ގެންގުޅެން ރައީސް ސާލިހުގެ ސަރުކާރުން ބޭނުންވާ މިންވަރުވެސްމެއެވެ. އަދި އިންޑިއާއަތަށް ބުރަވެ، އެހެންނަމަވެސް ޗައިނާއާކީވެސް ބައިވެރިއެއްގެ ގޮތުގައި ބަލައިގަނެ، ދުނިޔޭގެ ހުރިހާ ގައުމަކާއެކީ ޑިޕްލޮމަސީގެ ގުޅުން ދަމަހައްޓާ، ސަފުން ބާކީވެގެން ނުދިއުމަކީ ފެންނާން އޮތް މިސަރުކާރުގެ ޚާރިޖީ ސިޔާސަތު ކަމުގައި ދަންނަވަން ޖެހެއެވެ.