މީގެ 4 މަސްކުރިން އަފްއާނިސްތާނުގައި ތާލިިބާން ޖަމާއަތުގެ ސަރުކާރެއް އެކުލަވާލިފަހުން، ދެކޮޅުވެރި އިސްލާމިކް ސްޓޭޓްގެ ފަރާތުން ކުރިމަތިވަމުން އަންނަ ގޮންޖެހުންތަކުން އަރައިގަތުމަށްޓަކާ، ތާލިބާން ސަރުކާރުގެ އަސްކަރިއްޔާގެ ބައެއްގެ ގޮތުގައި، ޖާނުން ފިދާވާ ލަޝްކަރެއް އެކުލަވާލުމަށް ތާލިބާން ސަރުކާރުން ނިންމައިފިއެވެ.
2021ވަނަ އަހަރު އަފްއާނިސްތާނުގެ ވެރިކަމަށް އައުމުގެ ކުރިން، 20 އަހަރުވަންދެން އެމެރިކާ ސިފައިންނާ ދެކޮޅަށް ތާލިބާން ޖަމާއަތުން ކުރި ހަގުރާމާގައި، އެމެރިކާ ސިފައިން ބަލިކުރުމަށް އެޖަމާއަތުން ބޭނުންކުރި އެންމެ ވަރުގަދަ ހަތިޔާރަކަށް ވެގެން ދިޔައީ ޖާނުން ފިދާވާ ހަގުރާމަވެރިންނެވެ.
ތާލިބާން ސަރުކާރުގެ ޑެޕިއުޓީ ސްޕޯޚްސް ޕާރސަން ބިލާލް ކަރީމީ ވިދާޅުވި ގޮތުގައި އެ ޖަމާއަތުގެ މަގުސަދަކީ، އެގައުމުގެ އެކި ހިސާބުތަކުގައި، ތިބި ޖާފިދާވާ ހަގުރާމަވެރިން އަސްކަރިއްޔާގެ އެއް ޔުނިޓެއްގެ ދަށުގައި އޮޕަރޭޓް ކުރެވޭނެ ގޮތް ހަދާ އަފްއާނިސްތާން ހިމާޔަތް ކުރުން ކަމުގައެވެ.
އަދި ޖާނުން ފިދާވާ ލަޝްކަރުގެ މިހާރުގެ މަގްސަދަކަށް ވެގެން ދާނީ، އަފްއާނިސްތާނުގައި ހަރަކާތްތެރިވާ އިސްލާމިކް ސްޓޭޓާއި ދެކޮޅަށް ހަމަލާ ދިނުމެވެ.
"ޝަހީދުވާން އެދޭ، ސްޕެޝަލް ފޯސްގެ ބޭނުން ކުރެވިގެންދާނީ، ވަރަށް ޚާއްސަ އޮޕަރޭޝަންތައް ހިންގުމަށް،" ކަރީމީ ވިދާޅުވިއެވެ.
އޭނާ ވިދާޅުވި ގޮތުގައި، ތާލިބާން ޖަމާއަތުން ދަނީ، އަފްއާނިސްތާން ހިމާޔަތް ކުރުމަށްޓަކާ އާއި، އަދި ބޯޑަރުތައް ހިމާޔާތް ކުރުމަށްޓަކާ ވަރުގަދަ އަސްކަރިއްޔާއެއް އުފެއްދުމަށް މަސައްކަތް ކުރަމުން ކަމަށާއި، އަދި ޖާނުންފިދާވާ ހަގުރާމަވެރިން ވެގެން ދާނީ މިމަސައްކަތުގެ މުހިންމު ބަޔަކަށް ކަމުގައެވެ.
