ސުލްހަވެރި އެއްވުންތައް ބޭއްވުމަށް ފުރުސަތު ދިނުމަށާއި ޚިޔާލު ފާޅުކުރުމުގެ މިނިވަންކަމަށް ހުރަސް ނޭޅުމަށް އިދިކޮޅު ކޯލިޝަނުން ސަރުކާރަށް ގޮވާލައިފިއެވެ.
ދިވެހިރާއްޖެއިން އިންޑިޔާ ސިފައިން ބޭލުމަށް ގޮވާލާ ކުރިއަށްދިޔަ "އިންޑިޔާ އައުޓް" ސުލްޙަވެރި އިޙްތިޖާޖުގެ ތެރެއިން ވަރަށް އަނިޔާވެރިކަމާއެކު 7 މީހަކު ހައްޔަރުކުރުމާއި ގުޅިގެން އެކަން ކުށްވެރިކޮށް އިދިކޮޅުން ނެރުނު ބަޔާނުގައި ބުނެފައިވަނީ ފުލުހުން މީހުން ހައްޔަރުކޮށްފައިވަނީ ސުލްޙަވެރިކަމާއެކު އަޑު އުފުލަމުން ދަނިކޮށް، "އިންޑިޔާ އައުޓް" ނުގޮވޭނެ ކަމަށާއި އަދި "އިންޑިޔާއައުޓް" މިހެން ޖަހާފައިވާ ޓީޝަރޓްގައި އަޑުނުއުފުލޭނެ ކަމަށް ބުނެ ކަމަށެވެ.
ޚިޔާލުފާލުކުރުމުގެ މިނިވަންކަމާއި އެއްވެ އުޅުމުގެ މިނިވަންކަމަކީ ޤާނޫނު އަސާސީން ރައްޔިތުންނަށް ކަށަވަރުކޮށްދީފައިވާ ޙައްޤުތައް ކަމަށްވާއިރު ދިވެހިރާއްޖޭގެ މިނިވަންކަމުގެ ދިފާޢުގައި ރައްޔިތުން ނުކުމެ އަޑުއުފުލުމުން، އަނިޔާވެރިކަމާއެކު އެފަރާތްތައް ހައްޔަރުކޮށް ފުލުހުންނަށް އަންގާ ޣައިރު ޤާނޫނީ އެންގުންތަކުގެ ތެރެއިން ޢުމުރުން ދުވަސްވީ މީހުންނަށްވެސް އެއްވެސް ބެލުމެއްނެތި ހިފާ ހައްޔަރުކޮށް، ފިރިހެން ފުލުހުން ފޮނުވާ އަންހެނުން ހިފާ ހައްޔަރުކޮށް މިފަދަ ނޭދެވޭ ޢަމަލުތައް ހިންގުމަކީ މިސަރުކާރު ވަރަށް ބޮޑަށް އިންޑިޔާގެ އަޅުވެތި ކަމުގެ ދަށަށް ވެއްޓިފައި އޮތް އޮތުމުގެ ސަބަބުން ހިންގާ ވަރަށް ދަށުދަރަޖައިގެ ޢަމަލެއްކަމަށެވެ.
އިހްތިޖާޖުގެ ތެރެއިން މީހުން ހިފާ ހައްޔަރު ކުރުމުގައި އެއްވެސް ކަހަލަ ހަމައެއް އުސޫލެއް ނެތްކަމާއި ހައްޔަރުކޮށްގެން ގޮސް އެތައް ގަޑިއިރެއް ވަންދެން ފުލުހުންގެ ބަންދުގައި ބައިތިއްބައި މިފަދަ ޚުދުމުޚުތާރު ގޮތަކަށް ޢަމަލު ކުރަމުންދަނީ ސީދާ ސަރުކާރުގެ އިސްވެރިންގެ އޯޑަރަށްކަން ވަރަށް ސާފު. މިކަންކަން ރާއްޖޭގައި ޤާއިމްކުރެވިފައިވާ ތަޙްޤީޤީ އިދާރާތަކުން މިނިވަންކަމާއެކު ތަޙްޤީޤު ކުރުމަށް ގޮވާލަމެވެ. އަދި މިޢަމަލުތައް އެންމެ ހަރުކަށި ޢިބާރާތުން ކުށްވެރި ކުރަން.
– އިދިކޮޅުން ނެރުނު ބަޔާނުގައި ބުނެފައިވެއެވެ.
އެހެންކަމުން މިނިވަންކަމާއެކު ސުލްހަވެރި އެއްވުންތައް ބޭއްވުމަށް ފުރުސަތު ދިނުމަށާއި ޚިޔާލު ފާޅުކުރުމުގެ މިނިވަންކަމަށް ހުރަސް ނޭޅުމަށް އިދިކޮޅުން ވަނީ ސަރުކާރަށް ގޮވާލާފަވެ. އަދި ދިވެހި ޤައުމުގެ މިނިވަންކަމުގެ ދިފާޢުގައި އަޑުއުފުލާ ރައްޔިތުންނަށް މިފަދައިން އަނިޔާވެރިނުވެ ޤާނޫނީ އިމުގެ ތެރެއިން ޢަމަލު ކުރުމަށާއި، މިސަރުކާރުގެ އިސްވެރިން މިޤައުމަށް ޣައްދާރުވެ، އިންޑިޔާގެ ބާރާއި ނުފޫޒުގެ ތެރެއަށް ގައުމުގެ މިނިވަންކަން ވައްޓާލާފައިވާހިނދު، މިކަމާ ދެކޮޅަށް މިކޯލިޝަނުން ހިންގާ ޙަރަކާތްތައް ހުއްޓުމެއްނެތި ކުރިއަށް ގެންދާނެ ކަމަށް ވަނީ ބުނެފައެވެ.
One Response
ޢިންޑިޔާމީހުން ބާލަން އެމީހުން ތިބިތަނަކަށް ގޮސް ވަކި މުހުލަތެއް ދިނުމަށްފަހު އެތިބިތަނަކުން ބާލަން ރއްޔިޔުން ނުކުންނަންވެއްޖެކަމުގައި ދެކެން. މީއަހަރެމެންގެ ގައުމެކޭ ނޫނީ ސޯލިފު ބާލަން އެބަޖެހޭ މިހެން ތިބެގެން މިކަންދުވަހަކުވެސް ނުވާނެ އެމީހުންގެ ބާރާއި ނުފޫޒު ވާނީ ލަސްކުރާވަރަކަށް ގަދަ.