އިދިކޮޅު ކޯލިޝަނުން "އިންޑިއާ އައުޓް" ޓީޝާޓާއި، ބެނާތަކުގައި ކުރަމުންދާ މުޒާހަރާގައި ދިވެހި ބަހުން އިންޑިއާ އައުޓް ލިޔެގެން ބޭނުން ކުރުމަށް ފުލުހުން އަންގައިފިކަމަށް އިދިކޮޅު ޕީޕީއެމުން ބުނެފިއެވެ.
އިދިކޮޅު ކޯލިޝަނުން ގެންދަނީ ރާއްޖޭގައި ތިބި އިންޑިއާ ސިފައިން ބޭލުމަށް ގޮވާލައި، މުޅި ރާއްޖޭގައި ސިލްސިލާ ހަރަކާތްތަކެއް ހިންގަމުންނެވެ. އިދިކޮޅު ކޯލިޝަންގެ ތަރުޖަމާން ހީނާ ވަލީދު ވިދާޅުވީ، މިއަދު މާލޭގެ މަގުތަކުގައި އިންޑިއާ އައުޓް ކެމްޕެއިން ކުރިއަށް ގެންދިއުމަށް މަސައްކަތް ކުރުމުން ފުލުހުން ވަނީ އިނގިރޭސިބަހުން އިންޑިއާ އައުޓް ލިޔެފައި ވުމުން ދިވެހި ބަހުން "އިންޑިއާ އައުޓް" ލިޔެގެން ހަރަކާތް ކުރިއަށް ގެންދިއުމަށް އަންގާފައި ކަމަށެވެ.
ނަމަވެސް އިދިކޮޅު ކޯލިޝަނުން މިއަދު ޕީޕީއެމް އޮފީސް ދޮގުމަތީގައި ކުރަމުންދާ އިހުތިޖާޖު ކުރަމުންދަނީ އިންޑިއާ އައުޓް އިނގިރޭސި ބަހުން ލިޔެފައިވާ ބެނާތަކާއި، އެކުގައެވެ. އިއްޔެވެސް މާލޭގައި އިދިކޮޅުން ވަނީ އިންޑިއާ އައުޓް މުޒާހަރާއެއް ކޮށްފައެވެ. މި މުޒާހަރާގައި 11 މީހަކު ވަނީ ފުލުހުންގެ ބެލުމޔގެ ދަށަށް ގެންގޮސް ރޭގެ ވަގުތެއްގައި ދޫކޮށްލާފައެވެ.
ރާއްޖޭގައި ތިބި އިންޑިއާ ސިފައިން ބޭލުމަށް ގޮވާލައި، އިދިކޮޅު ކޯލިޝަން ހިންގަމުންދާ ހަރަކާތް ރަސްމީކޮށް ހިންގަން ފަށާފައިވަނީ ރައީސް ޔާމީން މިނިވަންވި ހިސާބުންނެވެ. އަދި މިހަރަކާތުގައި ގިނަ ބަޔަކު ބައިވެރިވެ އަތޮޅު ތެރޭގައި މި ހަރަކާތް އިދިކޮޅު ކޯލިޝަނުން ދަނީ ކުރިއަށް ގެންދަމުންނެވެ. ނަމަވެސް ސަރުކާރުން ބުނަމުންދަނީ މިއީ ސުލްހަވެރި ހަރަކާތެއް ނޫންކަމަށާއި، މިހަރަކާތް ހުއްޓުވުމަށް ސަރުކާރުން ކުރަންޖެހޭ ހުރިހާ މަސައްކަތެއް ކުރާނެކަމަށެވެ.
އަވަށްޓެރި ޤައުމުތަކާއެކު އޮންނަ ގާތްގުޅުމާމެދު ނަފްރަތު އުފައްދައި، ދޮގު ތުހުމަތުތައް ކުރުމަކީ، ރާއްޖެއާއި ރާއްޖެއިން ބޭރުގައި ދިރިއުޅޭ ދިވެހިންގެ ރައްކާތެރިކަމަށްވެސް އޮތް ނުރައްކަލެއްކަމަށް ސަރުކާރުން ވަނީ ކުރިންވެސް ވިދާޅުވެފައެވެ.
