ޓާސްކް ފޯހެއް ހެދިޔަސް މި ސަރުކާރަށް މަސްތުވާތަކެތީގެ ބަވާއިން ރާއްޖެ ސަލާމަތް ނުކުރެވޭނެ ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
"ޚަބަރު އޮންލައިން"އަށް ދެއްވި އިންޓަވިއުއެއްގައި އުމަރު ވިދާޅުވީ މަސްތުވާތަކެއްޗާ ބެހޭ ގާނޫނުގެ 21 ވަނަ މާއްދާގެ (ހ)ގެ ދަށުން އުފައްދާފައިވާ ނޭޝަނަލް ޑްރަގް ކޮންޓްރޯލް ކައުންސިލް އޮއްވައި އެކަމަށް އިތުރު ޓާސްކް ފޯހެއް ހަދަން ނުޖެހޭ ކަމަށެވެ.
ނައިބު ރައީސް ފައިސަލް ނަސީމް ޗެއާކުރައްވާ އެ ކައުންސިލް ރަނގަޅަށް ނުހިނގަންޏާ ކުރަންވީ ކަމަކީ އެ މާގަމްތަކުގައި ތިއްބެވި ބޭފުޅުން މަގާމުން ވަކިކޮށް، ގާބިލު ބޭފުޅުން މަގާމްތަކަށް އައްޔަން ކުރެއްވުން ކަމަށް ވެސް އޭނާ ވިދާޅުވިއެވެ.
މަސްތުވާތަކެއްޗާ ބެހޭ ގާނޫނުގައި ބަޔާންކޮށްފައިވާގޮތުން ނޭޝަނަލް ޑްރަގް ކޮންޓްރޯލް ކައުންސިލަކީ 12 މީހުންގެ މައްޗަށް އެކުލެވިގެންވާ ކައުންސިލެކެވެ.
އެ ގާނޫނުގައިވާގޮތުން އެ ކައުންސިލްގެ މެމްބަރުންނަކީ ނައިބު ރައީސް، ހޯމް މިނިސްޓަރު، އެޑިއުކޭޝަން މިނިސްޓަރު، ޖެންޑާ މިނިސްޓަރު، ހެލްތު މިނިސްޓަރު، ޔޫތު މިނިސްޓަރު، އިސްލާމިކް މިނިސްޓަރު، އެޓާނީ ޖެނެރަލް، ކޮމިޝަނަރ ޖެނެރަލް އޮފް ކަސްޓަމްސް، ކޮންޓްރޯލާ ޖެނެެރަލް އޮފް އިމިގްރޭޝަން، ޗީފް އޮފް ޑިފެންސް ފޯސް، ކޮމިޝަނަރ އޮފް ޕޮލިސް އަދި ޕްރޮސިކިއުޓަރ ޖެނެރަލްއެވެ.
އުމަރު މިފަދައިން ވިދާޅުވީ މަސްތުވާތަކެތީގެ މައްސަލަ ހައްލުކުރުމަށް ޚާއްސަ ޓާސްކް ފޯހެއް އެކުލަވާލައި މަސައްކަތް ފަށާފައިވާ ކަމަށް ޕޮލިސް ކޮމިޝަނަރު މުހައްމަދު ހަމީދު ދާދިފަހުން ވިދާޅުވުމާ ގުޅިގެންނެވެ.
އޭނާ ވިދާޅުވީ އެ ޓާސްކު ފޯހަށް ކުރެވޭނެ ކަމެއް ނޯންނާނެ ކަމަށާއި މަސްތުވާތަކެތީގެ މައްސަލަ ހައްލުކުރުމުގެ އެއްވެސް ހިތްވަރެއް މި ސަރުކާރުގެ ނެތް ކަމަށެވެ.
ޔަގީންކަމާއެކު އަޅުގަނޑު މިދަންނަވަނީ ތިޔަ ޓާސްކު ފޯހަށް ވާނެ އެއްވެސް ކަމެއް ނޯންނާނެ. މަސްތުވާތަކެތީގެ މައްސަލަ ހައްލުކުރުމަށް މި ސަރުކާރުން މަސައްކަތް ކުރާތަން ފެންނަމުން ނުދޭ.
– އުމަރު ވިދާޅުވިއެވެ.
މިހާތަނަށް ރާއްޖެއިން ހޯދި އެންމެ ގިނަ މަސްތުވާތަކެތި ހޯދީ މިސަރުކާރުންނެވެ. ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އެކަން ސިފަކުރައްވަނީީ އެއީ މަސްތުވާތަކެތީގެ މައްސަލަ ހައްލުކުރުމަށް ސަރުކާރުން ކުރަމުން އަންނަ މަސައްކަތަށް ލިބެމުން އަންނަ ކާމިޔާބީއެއްގެ ގޮތުގައެވެ.
އެކަމަށް އިޝާރާތްކުރައްވައި އުމަރު ވިދާޅުވީ އަތުލައިގަނެވިފައި އެވަނީ ރާއްޖެއަށް މަސްތުވާތަކެތި އެތެރެކުރާ މިންވަރާ އަޅާބަލާއިރު ވަރަށް މަދު މިންވަރެއް ކަމަށެވެ. އަދި އެތަކެއްޗާ އެކު ހައްޔަރުކުރާ މީހުން ކޮންމެވެސް ގޮތަކުން ދޫވަމުންދާތަން ފެންނަމުންދާ ކަމަށް އޭނާ ވިދާޅުވިއެވެ.
ދާދިފަހުން އަޅުގަނޑުމެންނަށް ނޫސްތަކުން ފެނުނު މަސްތުވާތަކެތީގެ ބޮޑެއް ކަމަށް ފުލުހުން ތުހުމަތުކުރާ މީހަކު ކޯޓުން މިނިވަންވެ، އަނެއްކާ ދެވަނަ ފަހަރަށް ރާއްޖެއަށް މަސްތުވާތަކެތި ގެނެސް ބަޔަކާ ހަވާލުކުރުމަށްފަހު އޭނަ ފިލައިފިކަމަށް. ސަރުކާރަށް މި މައްސަލަ ހައްލު ނުކުރެވޭނެކަމުގެ ހެއްކެއް މިއީވެސް.
– އުމަރު ވިދާޅުވިއެވެ.
