އެމްޑީޕީން ރާއްޖެއަށް ތަޢާރަފްކުރި ރައްޔިތުންނަށް ފައިދާހުރި ކަންކަމާއި ދެކޮޅު ހެދި ފަރާތްތަކުން މިއަދު ދަނީ އެކަންކަމުން ބޮޑު މަންފާއެއް ހޯދަމުން ކަމުގައި ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
ފަތުރުވެރިކަމުގެ އައު ކޮންސެޕްޓް "ހޯމް ސްޓޭ" ތަޢާރަފް ކުރުމާއި ގުޅިގެން ގިނަ ބައެއްގެ ފާޑުކިޔުންވަނީ އެކަމަށް އަމާޒުވެފައެވެ. ޚާއްސަކޮށް ދީނީ ގިނަ އިލްމުވެރިންގެ ފާޑުކިޔުން ވަނީ މިކަމަށް އަމާޒުވެފައެވެ. ހޯމް ސްޓޭއަށް ކިޔަމުންދާ ފާޑުކިޔުންތަކާއި ގުޅިގެން ވައްޑެ ވިދާޅުވީ، އެމްޑީޕީގެ ރާއްޖޭގެ ރައްޔިތުންނަށް ފައިދާހުރި ގޮތަށް ކުރި ކަންކަމަށް ފާޑުކީ ފަރާތްތަކުން މިއަދު އެކަންކަމުން މަންފާ ހޯދަމުން ދާކަމަށެވެ.
ވަކި ވަކި ކަންކަމަށް މިސާލު ނަގަމުން ވައްޑެ ވިދާޅުވީ، ޓެކްސް ނަގަން ތަޢާރަފް ކުރުމުން އެއީވެސް ހަރާމް ކަމެއްކަމަށް ބައެއް ފަރާތްތަކުން ބުނަމުން ދިޔަކަމަށެވެ. ހަމަ މިއާއިއެކު ގެސްޓް ހައުސް ފެށުމުންވެސް އެއީވެސް ހަރާމް ކަމެއްކަމަށް ބުނަމުން ދިޔަކަމަށެވެ. މީގެ އިތުރުން ހޯމް ސްޓޭ ތަޢާރަފް ކުރުމުންވެސް މިކަމަށް ފާޑުކިޔަމުންދާކަމަށެވެ. ނަމަވެސް މިއިން ކޮންމެ ކަމަކަށް އެންމެ ބޮޑަށް ފާޑުކިޔަމުން ދިޔަ މީހުން މިކަންކަމުން ބޮޑު މަންފާއެއް ހޯދަމުންދާކަމަށް ވަހީދު ވިދާޅުވިއެވެ.
އެމްޑީޕީން ޓެކްސް ތަޢާރަފް ކުރީމާ އެކަން ހަރާމް ކަމަށް ބުނި ގިނަ މީހުން ފަހުން ތިބީ ޓެކްސް ފައިސާއިން މުސާރަ ނަގައިގެން. ގެސްޓްހައުސް ފެށީމާ ހަރާމޭ ބުނި ބައެއް މީހުން މިހާރު އެކަން އެބަކުރޭ. މިއަދު ހޯމްސްޓޭ ހަރާމޭ ބުނާ ގިނަމީހުން މާދަން ތިބޭނީ މިވިޔަފާރި ފަށައިގެން ކަމަށްބެލެވޭ.
– ވަހީދު ވިދާޅުވިއެވެ.
ފަތުރުވެރިކަމުގެ ރަންޔޫބީލާ ދިމާކޮށް ރާއްޖޭގައި މުޅި އަލަށް ހޯމް ސްޓޭ ތަޢާރަފްކޮށްދެއްވައި ވާހަކަފުޅުދައްކަވަމުން މިނިސްޓަރ އޮފް ޓޫރިޒަމް ޑރ.ޢަބްދުﷲ މައުސޫމް ވިދާޅުވީ ފަތުރުވެރިންނަށް މަރުޙަބާކިޔުމާއި މެހެމާންދާރީ ރަނގަޅަށް އަދާކުރެވެނީ އެއީ ހިތުގެ އަޑިން ކުރެވޭކަމަކަށްވުމުން ކަމަށެވެ. އަދި އިންވެސްޓަރުން ހޯދައި ކިތަންމެ ބައިވަރު ގެސްޓްހައުސްއެއް ހެދުނުނަމަވެސް ފަތުރުވެރިންގެ ހިތްތަކުން ޖާގަހޯދޭނީ އެފަދަ މެހުމާންދާރީއެއް އަދާކުރެވިގެންކަމަށް މިނިސްޓަރ ވިދާޅުވިއެވެ.
މިއީ ކުރިއަށް އޮތްތަނުގައި ރާއްޖޭގެ ވަރަށް ގިނަ ރަށްރަށުން ފެނިގެންދާނެ ކާމިޔާބު ކޮންސެޕްޓަކަށް ވާނެކަމަށް އުންމީދުކުރައްވާކަމަށް މިނިސްޓަރ ވިދާޅުވިއެވެ. އަދި މިއީ ރައްޔިތުންގެ ދިރިއުޅުމުގެ ފެންވަރު މަތިކޮށްދޭ ރަށަށް ޢާމްދަނީވަދެ ރާއްޖޭގެ އިޤްތިޞާދުގެ ތެރޭގައި ދައުރުވާ ބޭރުފައިސާ ހިފަހައްޓަން ލިބޭ ފުރުސަތެއްގެ ގޮތުގައި މިނިސްޓަރ ފާހަގަކުރައްވާފައެވެ.
