ސޫދާން އަސްކަރީ ސަރުކާރާ ދެކޮޅަށް އެގައުމުގައި ކުރިޔަށްދާ ބޮޑެތި މުޒާހިރާތަކާއެކު، ބޮޑުވަޒީރު އަބުދުﷲ ހަމްދޮކް އިސްތިއުފާ ދެއްފައިފިއެވެ.
ސޫދާންގެ ބޮޑުވަޒީރު އިސްތިއުފާ ދެއްވާފައި މިވަނީ، އެގައުމުގެ ސަރުކާރާ ދެކޮޅަށް ވެރިރަށް ޚަރުތޫމްގައި ބޮޑެތި މުޒާހިރާތައް ކުރިޔަށް ދާތާ ދެވަނަ ދުވަހުއެވެ.
ސޫދާންގައި އެތައް ހާސްބަޔަކު މުޒާހިރާ ކުރަމުންދަނީ، ފާއިތުވެދިޔަ އޮކްޓޯބަރު މަހު އެގައުމުގެ އަސްކަރިއްޔާއިން ގެނައި ބަޢާވާތައްފަހު، ހަމްދޮކް އެގައުމުގެ އަސްކަރިއްޔާއާއެކު ބާރުތައް ހިއްސާ ކުރުމުގެ ގޮތުން ހަދާފައިވާ އެއްބަސްވުމާއި ދެކޮޅު ހެދުމުގެ ގޮތުންނެވެ.
ވެރިރަށް ޚަރުތޫމްގައި ކުރިޔަށްދާ މިޒާހިރާތައް ކުރިޔަށް ދަނީ، "ބާރުތައް ރައްޔިތުންނަށް" މި ޝިއާރުގެ ދަށުންނެވެ. މުޒާހިރާކުރާ ފަރާތްތަކުން ގޮވަމުންދަނީ އެގައުމުގައި މަދަނީ ސަރުކާރެއް އެކުލަވާލުމަށެވެ.
އެހެންނަމަވެސް، މުޒާހިރާ ކުރާ ފަރާތްތަކާ ދެކޮޅަށް އަސްކަރިއްޔާއިން ބާރުގެ ބޭނުން ކުރުމުގެ ސަބަބުން، އިއްޔެއާއި މިއަދު 2 މީހަކު މަރުވެފައިވާ ކަމަށް މީޑިއާތަކުންވަނީ ރިޕޯޓު ކޮށްފައެވެ.
މަދަނީ ފަރާތްތަކާއި އަސްކަރިއްޔާއާއި ދެމެދު އެކުލަވާލެވުނު އެއްބަސްވުމެއްގެ ދަށުން، ދެވަނަ ފަހަރަށް ބޮޑުވަޒީރު ކަމަށް ވަޑައިގަތުމަށްފަހު، ހަމްދޮކް އިސްތިއުފާ ދެއްވުމާއ ގުޅިގެން އަނެއްކާވެސް ސޫދާންގެ ވެރިކަމުގެ ބާރުތައް ވަނީ އަސްކަރިއްޔާގެ ފުރިހަމަ ކޮންޓްރޯލްގެ ދަށަށް ގޮސްފައެވެ.
އަދި މިއީ، ސޫދާންގައި ދިގު މުއްދަތެއް ވަންދެން ވެރިކަން ކުރަމުން އައި ޚުދުމުޚްތާރު ވެރިޔާ އުމަރު އަލް ބަޝީރުގެ ވެރިކަން 2019ވަނަ އަހަރު ނިމުމަކަށް ގެނައުމަށްފަހު، މަދަނީ ވެރިކަމަކަށް ވާސިލްވުމަށް އެކުލަވާލެވުނު މަގު ޗާރޓަށް ކުރިމަތިވެގެން ދިއަ ގޮންޖެހުމެއްގެ ގޮތުގައި މަސްރަހު ދިރާސާ ކުރާ ފަރާތްތަކުން ދަނީ ފާހަގަ ކުރަމުންނެވެ.
މަގާމުން އިސްތިއުފާ ދެއްވަމުން، ޓީވީ މެދުވެރިކޮށް ވާހަކަ ދައްކަވަމުން ހަމްދޮކް ވިދާޅުވެފައިވަނީ، "ގައުމު ވަނީ، ނާޒުކު ހާލަތެއްގައި ކަމަށާއި، އަދި ގައުމުގެ ދެމި އޮތުމަށްވެސް ނުރައްކާ" ވެފައި ވާކަމަށެވެ.
އޭނާ ވިދާޅުވު ގޮތުގައި، ގައުމު އަނެއްކާވެސް ކާރިސާއެއްގެ ތެރެއަށް ވެއްޓިގެން ދިޔަ ނުދިނުމަށް ކުރެވެނެން އޮތް ހުރިހާ މަސައްކަތެއް ކުރެއްވި ކަމަށާއި، އެހެންނަމަވެސް، މި ހުރިހާ މަސައްކަތަކާއެކުވެސް އެއްވިސްނުމަކަށް އާދެވިފައި ނުވާ ކަމުގައެވެ. އަދި ގައުމު ކާރިސާއަކުން ސަލާމަތް ނުކުރެވުނު ކަމަށެވެ.
ފާއިތުވެދިޔަ އޮކްޓޯބަރުމަހު، ސޫދާންގެ އަސްކަރިއްޔާއިން ގެނައި ބަޢާވާތެއްގައި ހަމްދޮކް މަގާމުން ދުރުކުރެވި އޭނާ ގޭގައި ބަންދު ކުރެވުނެވެ. އެހެންނަމަވެސް ނޮވެމްބަރުމަހު، އަސްކަރިއްޔާއާއި އޭނާއާ ދެމެދު ވެވުނު އެއްބަސްވުމެއްގެ ދަށުން، އޭނާ އަބުރާ ބޮޑުވަޒީރުކަމަށް ވަޑައިގެންނެވިއެވެ. އަދި އިންތިޚާބެއް ބޭއްވެންދެން، ފަންނީ މީހުންގެ މައްޗަށް އެކުލެވޭ ކެބިނެޓެއް އެކުލަވާލުމުގެ ފުރުސަތު އޭނާއަށް ދެވުނެވެ.
އެހެންނަމަވެސް މި އެއްބަސްވުމުގެ ޒަރީއާއިން، އަސްކަރިއްޔާއިން މަދަނީ ފަރާތްތަކަށް ބާރުތައް ދޫކޮށްލީ ކިހާ މިންވަރަަކަމެއް ސާފުވެފައެއް ނުވެއެވެ. އަދި މުޒާހިރާ ކުރާ ފަރާތްތަކުން ބުނަމުން ގޮސްފައިވަނީ އެމީހުން އަސްކަރިއްޔާއަށް އިތުބާރު ނުކުރާ ކަމުގައެވެ.
އާދީއްތަ ދުވަހު، ވެރިރަށް ޚަރުތޫމްއާއި އަދި އޮމްޑާރމަން ސިޓީގެ މަގުތަކަށް މުޒާހިރާ ކުރުމަށް އެތައް ހާސް ބަޔަކުވަނީ ޖަމާވެފައެވެ. އެމީހުން ގޮވަމުން ދަނީ، އަސްކަރިއްޔާއިން ސިޔާސީ ކަންކަމާ ނުބެހުމަށެވެ. ފާއިތުވެދިޔަ އޮކްޓޯބަރު މަހު ގެނައި ބައާވާތައްފަހު ކުރިޔަށްދިޔަ މުޒާހިރާތަކުގައި މިހާތަނަށް 50 މީހުން މަރުވެފައިވެއެވެ.
ސޫދާންގައި ދިގު މުއްދަތަކަށް ޚުދު މުޚްތާރު ވެރިކަމެއް ކުރަމުން އައި، އަލް ބަޝީރު މަގާމުން ދުރު ކޮށްފައިވަނީ، 2019ވަނަ އަހަރު އޭނާއާ ދެކޮޅަށް އެގައުމުގައި ހިގައިދިޔަ ބޮޑެތި މުޒާހިރާތަކަށް ފަހުއެވެ. އެއަށްފަހު، އެގައުމުގައި އެކުލަވާލެވުނު ސަރުކާރުން ވަނީ 2023ގައި އިންތިޚާބެއް ބޭއްވެންދެން އިންތިގާލީ އިންތިޒާމްތަކެއްގެ ދަށުން ވެރިކަމުގެ ބާރުތައް ހިއްސާ ކުރުމަށް އެއްބަސް ވެފައެވެ.
