މިއަހަރުގެ ފުރަތަމަ ދުވަސް، ހޯމްސްޓޭގެ ސިޔާސަތާއިއެކު ފެށިގެން ދިޔައީ ރައްޔިތުންނަށް ލުއިފަސޭހަ ކަމާއިއެކު ބައިވެރިވެވޭނެ ގޮތަކަށް ކަމުގައި ޓުވަރިޒަމް މިނިސްޓަރ ޑރ.އަބްދުﷲ މައުސޫމް ވިދާޅުވެއްޖެއެވެ.
ހޯމްސްޓޭ ޓުވަރިޒަމް ފެށުމާއި ގުޅިގެން އެކަމުގެ މަރުހަބާ ދަންނަވައި މިނިސްޓަރ މައުސޫމް ކުރެއްވި ޓުވީޓުގައި ވިދާޅުވީ ހޯމްސްޓޭ ޓުވަރިޒަމް ސިޔާސަތު ފެށިގެން ދިޔައީ ރައްޔިތުންނަށް ފަސޭހަ ކަމާއިއެކު ބައިވެރިވެވޭނެ ގޮތަކަށް ކަމުގައެވެ. މިކަމުގައި އެންމެ ބޮޑު އެއްބާރުލުމެއް ދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުކަމަށެވެ. އަދި މިކަމުގައި މަޖިލިސް މެމްބަރުންނާއި، ކައުންސިލްތަކުން ދެއްވި އެއްބާރުލުން މިނިސްޓަރ ވަނީ ފާހަގަ ކުރައްވާފައެވެ.
2022 ގެ ފުރަތަމަދުވަހު ހޯމްސްޓޭ ފެށުނީ، ރައްޔިތުނަށް ލުއިފަސޭހަ ކަމާއެކު ބައިވެރިވެވޭނެ ގޮތަކަށް. ހޯމްސްޓޭ ޓޫރިޒަމް ބައްޓަންކުރުމަށް ރައީސް ޞާލިޙް ދެއްވެވި އިރުޝާދާއި، ލޯކަލް ކައުންސިލްތަކާއި، މަޖިލިސްމެންބަރުން އަދި އިންޑަސްޓްރީއާއި ރައްޔިތުންގެ ފުރިހަމަ އެއްބާރުލުމުގެ ސަބަބުން.
– ޑރ.މައުސޫމް ވިދާޅުވިއެވެ.
ހޯމްސްޓޭ ތަޢާރަފް ކުރުމާއި، ގުޅިގެން ބައެއް އިލްމުވެރިންގެ ފާޑުކިޔުން މިކަމަށް ވަނީ ވަރަށް ބޮޑަށް އަމާޒުވެފައެވެ. ނަމަވެސް ސަރުކާރުން ބުނަމުންދަނީ މިއީ ރައްޔިތުންގެ ޖީބަށް އާމްދަނީ ވައްދަން ފަހި ކޮށްދެވުނު ރަނގަޅު މަގެއްކަމުގައެވެ.
ފަތުރުވެރިކަމުގެ ރަންޔޫބީލާ ދިމާކޮށް ރާއްޖޭގައި މުޅި އަލަށް ހޯމް ސްޓޭ ތަޢާރަފްކޮށްދެއްވައި އިއްޔެ ބޭއްވި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ ޑރ.މައުސޫމް ވިދާޅުވީ ފަތުރުވެރިންނަށް މަރުޙަބާކިޔުމާއި މެހެމާންދާރީ ރަނގަޅަށް އަދާކުރެވެނީ އެއީ ހިތުގެ އަޑިން ކުރެވޭކަމަކަށްވުމުން ކަމަށެވެ. އަދި އިންވެސްޓަރުން ހޯދައި ކިތަންމެ ބައިވަރު ގެސްޓްހައުސްއެއް ހެދުނުނަމަވެސް ފަތުރުވެރިންގެ ހިތްތަކުން ޖާގަހޯދޭނީ އެފަދަ މެހުމާންދާރީއެއް އަދާކުރެވިގެންކަމަށް މިނިސްޓަރ ވިދާޅުވިއެވެ.
ދިއްގަރުން ޙައިރާން ކުރުވާފަދަ ދަރަޖައެއްގައި އަބަދުވެސް އެފަދަ މެހެމާންދާރީ ފެނިވަޑައިގަންނަވާކަމަށް މިނިސްޓަރ ވިދާޅުވިއެވެ. އަދި ދިއްގަރަށް މިފުރުސަތު އެންމެ ފުރަތަމަ ލިބުނު މައިގަނޑު ސަބަބަކީ ރަށުގެ ޒުވާނުން އެންމެ ގިނަ ޢަދަދަކަށް މަސައްކަތްކުރަމުން އަންނަނީ ފަތުރުވެރިކަމުގެ ދާއިރާގައިކަމަށްވެފައި އެފަރާތްތަކާއި ކައުންސިލް ގުޅިގެން ކުރި ބުރަމަސައްކަތުންކަމަށް މިނިސްޓަރ ވިދާޅުވިއެވެ.
މިއީ ކުރިއަށް އޮތްތަނުގައި ރާއްޖޭގެ ވަރަށް ގިނަ ރަށްރަށުން ފެނިގެންދާނެ ކާމިޔާބު ކޮންސެޕްޓަކަށް ވާނެކަމަށް އުންމީދުކުރައްވާކަމަށް މިނިސްޓަރ ވިދާޅުވިއެވެ. އަދި މިއީ ރައްޔިތުންގެ ދިރިއުޅުމުގެ ފެންވަރު މަތިކޮށްދޭ ރަށަށް ޢާމްދަނީވަދެ ރާއްޖޭގެ އިޤްތިޞާދުގެ ތެރޭގައި ދައުރުވާ ބޭރުފައިސާ ހިފަހައްޓަން ލިބޭ ފުރުސަތެއްގެ ގޮތުގައި މިނިސްޓަރ ފާހަގަކުރައްވާފައެވެ.
