މިއަދު ރާއްޖޭގައި ތަޢާރަފްކުރި "ހޯމް ސްޓޭ" ޓޫރިޒަމްގެ އެންމެ ބޮޑު މަޤުސަދަކީ ރަށްރަށުގައި ދިރިއުޅޭ ރައްޔިތުންގެ ޖީބަށް ޑޮލަރު ވެއްދުން ކަމުގައި ޓުވަރިޒަމް މިނިސްޓަރ ޑރ.އަބްދުﷲ މައުސޫމް ވިދާޅުވެއްޖެއެވެ.
ހޯމް ސްޓޭ ޓުވަރިޒަމް މިއަދު ފެށުމަށް ދިއްގަރުގައި ބޭއްވި ޚާއްސަ ރަސްމިއްޔާތުގައި ވާހަކަ ދައްކަވަމުން ޑރ.މައުސޫމް ވިދާޅުވީ މިމަސައްކަތް ކާމިޔާބު ކަމާއިއެކު ފެށިގެން ދިޔައީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ދެއްވި އެއްބާރުލުމުގެ ސަބަބުންކަމަށެވެ. ރައީސް ވަނީ މިކަން ރަށްރަށުގައި ފެށުމަށް ވަރަށް ބޮޑަށް ބާރު އަޅުއްވައި ތަރުހީބު ދެއްވާފައިކަމަށެވެ.
މައުސޫމް ވިދާޅުވީ ސަރުކާރުގެ ސިޔާސަތަކީ ރާއްޖޭގައި ފަތުރުވެރިކަން އިތުރަށް ފުޅާކޮށް، ރަށްރަށުގައި ދިރިއުޅޭ ރައްޔިތުންގެ ފުދުންތެރިކަން އިތުރު ކުރުންކަމަށެވެ. މިކަން ފުރިހަމަ ވެގެންދާކަމީ މިއަދު ލިބޭ އެންމެ ބޮޑު އުފާކަމަށާއި، މިއަދު ދިއްގަރުގައި 4 ގެއިން މިކަން ފެށި ނަމަވެސް މުސްތަގުބަލުގައި މުޅި ރާއްޖޭގައި މިކަން ފުޅާކޮށް، ރަށްރަށަށް ލިބޭ އާމްދަނީ އިތުރު ކުރުމަކީ ސަރުކާރުގެ ސިޔާސަތު ކަމަށް މައުސޫމް ވިދާޅުވިއެވެ.
ޓުއަރިޒަމް މިނިސްޓަރ އަބްދުﷲ މައުސޫމް ވިދާޅުވީ މިކަމުގެ ސަބަބުން ސަފާރީ ރިސޯޓު އަދި ގެސްޓު ހައުސްތަކަށް އަދި ރައްޔިތުންނަށްވެސް ފައިދާވާނެކަމަށެވެ. އަދި މިކަން ކުރުމަށް ބޭނުންވަނީ ހަރުދަނާ ތަންފީޒު ކުރެވޭނެ ފަދަ ޤަވާއިދުތަކެއްކަމަށްވެސް، މިނިސްޓަރ ވިދާޅުވިއެވެ. އެގޮތުން އެކަމާއި ގުޅޭ ބައްދަލުވުންތަކެއް ބޭއްވުމަށް މިނިސްޓްރީން މިހާރު އަންނަނީ ތައްޔާރުވަމުންނެވެ.
މިރަސްމިއްޔާތުގައި ވާހަކަ ދައްކަވަމުން ގެސްޓް ހައުސް އެސޯސިއޭޝަންގެ ރައީސް ވިދާޅުވީ ހޯމްސްޓޭ ޓުއަރިޒަމަކީ ދުނިޔޭގައި ފުޅާވަމުން އަންނަ ޓުއަރިޒަމެއްކަމުގައިވާއިރު، ހޯމްސްޓޭ ޓުއަރިޒަމް ރާއްޖެއަށް ތަޢާރަފްކުރުމަކީ ރާއްޖޭގެ ޓުއަރިޒަމް އިންޑަސްޓްރީ ފުޅާވުމަށް އެޅޭނެ މުހިއްމު ފިޔަވަޅެއްކަމުގައެވެ. ނަމަވެސް، ހޯމްސްޓޭ ތަޢާރަފްކުރަން މިހާލަތުގައި މިއީ އެންމެ ރަނގަޅު ވަގުތުތޯ ވިސްނާލުން މުޙިއްމުކަމުގައި އެ އެސޯސިއޭޝަނުން ބުނެފައިވެއެވެ.
ހޯމް ސްޓޭ ފަތުރުވެރިކަމަކީ، އެރަށެއްގައި ދިރިއުޅޭ ބަޔަކާއެކު އެއްގެއެއްގައި ފަތުރުވެރިން ޗުއްޓީ ހޭދަ ކުރާ ބާވަތުގެ ފަތުރުވެރިކަމެވެ. މި ބާވަތުގެ ފަތުރުވެރިކަމަކީ ދުނިޔޭގެ ޤައުމުތަކުގައި ކާމިޔާބު ކަމާއެކު ހިންގާ އެއް މޮޑެލެވެ. ހޯމްސްޓޭ ޓުއަރިޒަމްގެ އިތުރުން، ސްޕޯޓްސް ޓުއަރިޒަމް، މައިސް ޓުއަރިޒަމް އަދި ކަލްޗަރަލް ޓުއަރިޒަމް ޕްރޮމޯޓްކުރުމުގެ މަސައްކަތް ސަރުކާރުން ދަނީ ކުރަމުންނެވެ.
ރާއްޖޭގައި ތަފާތު އެކި ބާވައްތަކުގެ ޓުއަރިޒަމް ތަޢާރަފުކޮށް ނަފާ ހޯދުމަށް ގިނަ މަސައްކަތަކެއް ދަނީ ކުރެވެމުންނެވެ. އެގޮތުން ހޯމްސްޓޭ ޓުއަރިޒަމްގެ އިތުރުން، ސްޕޯޓްސް ޓުއަރިޒަމް، މައިސް ޓުއަރިޒަމް އަދި ކަލްޗަރަލް ޓުއަރިޒަމް ޕްރޮމޯޓްކުރުމުގެ މަސައްކަތް ސަރުކާރުން ދަނީ ކުރަމުންނެވެ.
