ޕަންވޭލްގެ ފާމް ހައުސްގައި ޗުއްޓީ ހޭދަކޮށް، އުފަންދުވަސް ފާހަގަކުރަމުން ދަނިކޮށް ބޮލީވުޑްގެ ސުޕަސްޓަރ ސަލްމާން ޚާންގެ ގައިގާ ހަރުފައެއް ދަތް އެޅުމުގެ ސަބަބުން އޭނާއަށް ވަނީ ހޮސްޕިޓަލުގައި ފަރުވާ ދީފައެވެ.
މިދިޔަ ހޮނިހިރު ދުވަހު ހިނގި މި ހާދިސާގައި ހަރުފަ ދަތް އެޅުމުގެ ސަބަބުން ސަލްމާން ހޮސްޕިޓަލުގައި ފަރުވާ ދިނުމަށް ފަހު ވަނީ އާދިއްތަ ދުވަހު ދޫކޮށްލާފައއެވެ.
ސަލްމާން ގައިގާ ހަރުފަ ދަތް އެޅީ އޭނާ ރަހުމަތެރިންނާއި އެކު ފާމް ހައުސްގެ ގާޑެންގައި އުފަންދުވަހުގެ ޕާޓީ ބޭއްވުމާއި ގުޅޭ މަޝްވަރާ ކުރަމުން ދަނިކޮށް ކަމަށް ރިޕޯޓްތައް ބުނެއެވެ.
މިކަމާއި ގުޅޭ ގޮތުން ވާހަކަ ދައްކަމުން ސަލްމާން ބުނެފައިވަނީ ތިން ފަހަރު ހަރުފަ ދައްތެޅިކަމަށެވެ. އަދި މީގެ ކުރިންވެސް އެތަނުން އެ ހަރުފަ ފެނިފައި ވާކަމަށް އޭނާ ވަނީ ބުނެފަވެއެވެ.
ސަލްމާންގެ ގައިގައި ދަތް އެޅީ ވިހަ ގަދަ ހަރުފައެއް ނޫން ކަމަށާއި އޭނާ، މިހާރު އެއްކޮށް ރިކަވާ ވެފައި ވާކަމަށް ވެއެވެ.
އެ ފާމް ހައުސްއަކީ ސަލްމާން ވަރަށް ގިނަ ވަގުތު ހޭދަ ކުރާ ތަނެކެވެ. އެތާގައި ޗުއްޓީ ހޭދަކުރުމަކީ ސަލްމާންގެ އާންމު ކަމެކެވެ.
މި ފަހަރުވެސް ފާމް ހައުސްއަށް އޭނާ ދިއައީ އުފަން ދުވަސް ފާހަގަ ކުރުމަށެވެ. އިއްޔެއަކީ ސަލްމާނަށް 56 އަހަރު ފުރުން ދުވަސް ކަމުން އޭނާ ވަނި ފާމް ހައުސްގައި އާއިލާ އާއި ރައްޓެހިންނަށް ޕާޓީއެއް ދީފައެވެ.
