އަފްއަނިސްތާނުގައި، އަންހެނުން ދިގު ދަތުރުތަކުގައި ދާނަމަށް، ތިމާގެކަން ހުރި ފިރިހެނަކާ އެކީ ނޫންގޮތަކަށް ދަތުރު ކުރުން ތާލިބާން ސަރުކާރުން މަނާ ކޮށްފިއެވެ.
މި ފަހްތާގެ އާދީއްތަ ދުވަހު، ތާލިބާން ސަރުކާރުން ނިންމި މިނިންމުމަކީ، އެގައުމުގެ އަންހެނުންގެ ހައްގުތައް ހަނި ކުރުމުގެގޮތުން، އެސަރުކާރުން މިހާތަނަށް އަޅާފައިވާ ފިޔަވަޅުތަކުގެ ތެރެއިން އެންމެފަހުން އަޅާފައިވާ ފިޔަވަޅުކަމުގައި އިންސާނީ ހައްގުތަކަށް ވަކާލާތުކުރާ ޖަމިއްޔާތަކުން ވަނީ ބުނެފައެވެ.
ތާލިބާން ޖަމާއަތުން އަފްއާނިސްތާން އެ ޖަމާއަތުގެ ބާރުގެ ދަށަށް ގެނައުމަށްފަހު، ސެކްންޑްރީ ސްކޫލްތައް އަދިވެސް އެގައުމުގައި ހުންނަނީ ބަންދު ކޮށްފައެވެ، އަދި އަންހެނުންނަށް ގިނަ ދާއިރާތަކުގައި ވަޒީފާ އަދާކުރުންވެސް ތާލިބާން ސަރުކާރުން ވަނީ މަނާކޮށްފައެވެ.
އިންސާނީ ހައްގުތަކަށް ގޮވާލާ ގުރޫޕްތަކުން އެންމެ ފަހުން ތާލިބާން ސަރުކާރުން މިނިންމި ނިންމުން ސިފަ ކޮށްފައިވަނީ، އެގައުމުގައި އަންހެނުން ޖަލަށްލީ ލުމެއްގެ ގޮތުގައެވެ.
ތާލިބާން ސަރުކާރުގެ މިނިސްޓްރީ އޮފް ވާޗު އެންޑް ޕްރިވެންޝްން އޮފް ވައިސް ނެރެފައިވާ އަމުރުގައި ވާގޮތުން، އެގައުމުގެ އަންހެނުން 72 ކިލޯ މީޓަރަށްވުރެ ދުރު ދަތުރެއްގައި ދާނަމަ، ތާން ޖެހޭނީ އާއިލީ ތިމާގެ ފިރިހެނަކާ އެކީގައެވެ.
މިނިސްޓްރީން އާންމު ކޮށްފައިވާ ލިޔުމުގައި ވާގޮތުން، އެއްގަމު އުޅަނދުތަކުގެ ވެރިފަރާތްތަކުން، ބުރުގާ ނާޅާ އަންހެނުންނަށް ދަތުރުތަކުން ޖާގަ ނުދިނުމަށްވެސް ވަނީ އަންގާފައެވެ. އެހެންނަމަވެސް، މި ލިޔުމުގައި ބަޔާން ކޮށްފައިވާ ބުރުގާއަކީ މޫނު ބުރުގާކަމެއް ނުވަތަ އާދައިގެ ބުރުގާކަމެއް ތަފްސީލުކޮށް ދީފައެއް ނުވެއެވެ.
މީގެ އިތުރުންތާލިބާން ސަރުކާރުގެ މިއަމުރުގައިވަނީ، އެއްގަމު އުޅަދުތަކުގައި މިއުޒުކް ކުޅުންވެސް މަނާ ކޮށްފައެވެ.
އެމެރިކާ ސިފައިން އަފްއާނިސްތާނުން ބޭރުކޮށް، އަފްއާނިސްތާން ތާލިބާން ޖަމާއަތުގެ ބާރުގެ ދަށަށް ގެނައުމަށްފަހު، އެ ޖަމާޢަތުންވަނީ އެގައުމުގެ އަންހެނުން ގޭގައި ތިބުމަށް އަންގާފައެވެ. އަދި ސެކްންޑްރީ ސްކޫލްތަކުގެ ތެރެއިން ސްކޫލަށް ދިއުމުގެ ހުއްދަ ދީފައިވަނީ ހަމައެކަނި ފިރިހެން ކުދިންނަށެވެ.
އެހެންނަމަވެސް ތާލިބާން ޖަމާއަތުން ބުނެފައިވަނީ، މި ފިޔަވަޅުތަކަކީ، މަސައްކަތު މާހައުލާއި އަދި ސްކޫލުތަކަކީ އަންހެނުންނަށް ރައްކާތެރި މާހައުލުތަކެއްކަން ޔަގީން ކުރުމުގެގޮތުން އަޅާފައިވާ ވަގުތީ ފިޔަވަޅުތަކެއް ކަމުގައެވެ.
ތާލިބާން ޖަމާއަތުން އަފްއާނިސްތާނުގައި 90ގެ އަހަރުތަކުގައި ވެރިކަން ކުރިއިރުވެސް އެ ޖަމާއަތުންވަނީ އަންހެނުން ތައުލީމު ހާސިލްކުރުމާއި މަސައްކަތް ކުރުން މަނާކޮށްފައެވެ.
ފާއިތުވެދިޔަ މަހު، ތާލިބާން ސަރުކާރުންވަނީ، އަންހެނުން ޓީވީ ޑްރާމަތައް ކުޅުން މަނާކޮށްފައެވެ. އަދި އަންހެން ނޫސްވެރިންނާއި ޕްރެސެންޓަރުން ބުރުގާ އަޅަންޖެހޭނެ ކަމަށްވެސް ވަނީ އަންގާފައެވެ.
