ވެރިކަން ކުރަނީ ކޮންޕާޓީއަކުންތޯ، ކޮންބައެއްތޯ ބެލުމަކީ ސިވިލްސާވިސް މުވައްޒިފުންގެ ދައުރެއް ނޫންކަމަށާއި، ސިވިލްސާވަންޓުންގެ އަމާޒަކަށްވާން ވާނީ ކޮންމެ ސަރުކާރެއް އޮތަސް އެސަރުކާރެއްގެ ސިޔާސަތު ތަންފީޒު ކުރުންކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ހިންގުމުގެ ދާއިރާގެ އިސްމުވައްޒިފުންގެ ހުނަރާއި ޤާބިލްކަން އިތުރުކުރުމުގެ ޕްރޮގުރާމު އިފްތިތާހު ކޮށްދެއްވައި ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވީ، ސަރުކާރަށް ތިން އަހަރު ފުރި، ހަތަރު ވަނަ އަހަރަކަށް އަޅާފައިވާއިރު، ކުރެވުނު ކަންކަމާއި ކުރަންވީ ކަންކަމާމެދު ވިސްނައިލުމަކީ ވަރަށް މުހިންމު ކަމެއް ކަމަށެވެ.
ރައީސް ވިދާޅުވީ ވަކި އޮފީހަކުން ތަންފީޒުކުރުމަށް ސަރުކާރުން ކަނޑައަޅާ ސިޔާސަތެއް ނުވަތަ ކުރަން ނިންމާ ކަމެއް އެގޮތަކަށް ތަންފީޒުނުވީމާ، އެފެއިލްވަނީ އެ އޮފީހުގެ ސިވިލް ސާވިސް މުވައްޒަފުންނެއް ނޫންކަމަށެވެ. އެ ފެއިލްވަނީ މުޅި އޮފީސް ކަމަށާއި، ސަބަބަކީ، އޮފީސް ހިންގަނީ، ސިޔާސީ މަގާމުތަކުގައި ތިބޭ މީހުންނާއި ސިވިލް ސާވަންޓުން ގުޅިގެން ކަމަށްވާތީ ކަމަށެވެ.
ވެރިކަން ކުރަނީ ކޮން ޕާޓީއެއްތޯ، ސަރުކާރުގައި ތިބީ ކޮން ބައެއްތޯ ބެލުމަކީ ސިވިލް ސާވިސްގެ ދައުރެއް ނޫން. ސިވިލް ސާވިސްގެ ދައުރަކީ، އެއިރަކު އޮންނަ ސަރުކާރެއްގެ ސިޔާސަތުތައް ތަންފީޒު ކުރުން. ރައްޔިތުންގެ އަޣުލަބިއްޔަތު ލިބިގެން ވަކި މެނިފެސްޓޯއެއް ތަންފީޒުކުރުމަށް، އެއިރަކު އުފެދިފައި އޮންނަ ސަރުކާރަކަށް، ސިވިލް ސާވިސްގެ މުހިންމުކަން ބޮޑުވަނީވެސް އެ ސަބަބަށްޓަކައި.
– ރައީސް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ ސިޔާސީ މަޤާމެއްގައި ހުރުމަކީ ހަމައެކަނި ވަޒީފާއެއް އަދާކުރުމުގެ ގޮތުން ކުރާކަމެއް ކަމަށް، އެއްވެސް ބޭފުޅަކު ދެކިވަޑައި ނުގަންނަވާނެކަން އުންމީދު ކުރައްވަކަމަށެވެ. ކޯވިޑް-19 ގެ ފުރަބަންދަށް ފަހު ސަރުކާރު އަލުން ހުޅުވުމާއެކު، މިވަގުތު އެންމެ ބޮޑު އިސްކަމެއް ދެނީ، ސަރުކާރުގެ ހިންގުން ހަރުދަނާކުރުމަށްޓަކައި އޮފީސްތަކުގެ ޙާލަތު ދެނެގަތުމަށް ކަމުގައެވެ.
ސަރުކާރުން ޙާޞިލްކުރަން ބޭނުންވާ ނަތީޖާއާ ހަމައަށް ވާޞިލްވެވޭނެ އެންމެ ފަސޭހަ އަދި އެންމެ ކުރު މަގަކީ ކޮބައިކަން ދެނެގަނެ، ސަރުކާރުގެ ސިޔާސަތުތައް ވީހާ އަވަހަކަށް އަދި ފަސޭހައިން ތަންފީޒު ކުރުމަކީ ވަރަށް މުހިންމު ކަމެއް ކަމަށާއި، މިކަން އެންމެ ފުރިހަމައަށް ކުރެވޭނީ، ސިޔާސީ މަޤާމުތަކުގައި ތިއްބެވި ބޭފުޅުންނާއި، ސިވިލް ސާވިސް މުވައްޒަފުން މިހާރަށް ވުރެ ބޮޑަށް ގުޅިގެން މަސައްކަތްކުރައްވައިގެންކަމަށް ރައީސް ވިދާޅުވިއެވެ.
އަޅުގަޑުމެން މި މަސައްކަތް ކުރަނީ، ވަކިވަކި އޮފީސްތަކެއްގެ ގޮތުގައި ކަމަށް ވިޔަސް، މިއީ އެއް ސަރުކާރެއް. އޮންނާނީ އެއް ސިޔާސަތެއް. ޙާޞިލްކުރަން ބޭނުންވަނީ އެއް ނަތީޖާއެއް. އެހެން ނަމަވެސް، އެ ނަތީޖާ ނެރެވޭނީ ސަރުކާރުގެ ހުރިހާ މުއައްސަސާތައް ގުޅިގެން، އެއް މިސްރާބަކަށް ދަތުރުކޮށްގެން.
– ރައީސް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ ވަކި އޮފީހަކުން ތަންފީޒުކުރުމަށް ސަރުކާރުން ކަނޑައަޅާ ސިޔާސަތެއް ނުވަތަ ކުރަން ނިންމާ ކަމެއް އެގޮތަކަށް ތަންފީޒުނުވީމާ، އެފެއިލްވަނީ އެ އޮފީހުގެ ސިވިލް ސާވިސް މުވައްޒަފުންނެއް ނޫންކަމަށާއި، ފެއިލްވަނީ މުޅި އޮފީސްކަމަށެވެ. ސަބަބަކީ، އޮފީސް ހިންގަނީ، ސިޔާސީ މަގާމުތަކުގައި ތިބޭ މީހުންނާއި ސިވިލް ސާވަންޓުން ގުޅިގެން ކަމަށްވާތީ ކަމުގައި ރައީސް ފާހަގަ ކުރެއްވިއެވެ.
ރައީސުލްޖުމްހޫރިއްޔާ ވިދާޅުވީ، ސަރުކާރު އޮފީސްތަކުން ދޭ ޚިދުމަތްތަކުގެ ފެންވަރު ރަނގަޅުކުރުމަށް މިވަގުތު ސަރުކާރުން އެންމެ ބޮޑު އިސްކަމެއް ދޭ އެއް ކަމަކީ، ސަރުކާރު އޮފީސްތަކުގެ ސަރވިސް ޗާޓަރުތައް ތައްޔާރުކޮށް ޢާންމުކުރުން ކަމަށެވެ. މި ޗާޓަރާ ބެހޭ މަޢުލޫމާތު ދިނުމުގެ ސެޝަންތަކެއް، ސިވިލް ސާވިސްގެ 680 އަށް ވުރެ ގިނަ އިދާރާގެ މުވައްޒަފުންނަށް މިހާރުވަނީ ބާއްވާފައިކަމަށެވެ.
އޭގެ ތެރެއިން މިހާތަނަށް ސިވިލް ސަރވިސްގެ 200 އަށްވުރެ ގިނަ އިދާރާއިން، ސަރވިސް ޗާޓަރު ތައްޔާރުކޮށް އާންމުކޮށްފައިވާއިރު، މިއަހަރު ނިމުމުގެ ކުރިން ސިވިލް ސަރވިސްގެ ހުރިހާ އިދާރާތަކެއްގެ ސަރވިސް ޗާޓަރު ތައްޔާރުކޮށް ޢާންމުކުރުމަށް ސަރުކާރުން މަސައްކަތް ކުރަމުންދާކަމަށް ރައީސް ވިދާޅުވިއެވެ.
