ޅ. މަޑިވަރުގައި ކުރީގެ ރައީސް އަބްދުﷲ ޔަމީގެ ވެރިކަމުގައި ތަރައްޤީކުރަން ފެށި އެއަޕޯޓް މިއަދު ހުޅުވިގެން ދިއުމަކީ ނުހަނު އުފާ ކުރައްވާ ކަމެއްކަމަށާއި، މިކަމުގެ ޝުކުރު ހައްގުވަނީ، ކުރީގެ ރައީސް ޔާމީންއާއި، މަޑިވަރު ހޯލްޑިންގްސްއަށް ޚާއްޞަކޮށް މަނޭޖިންގ ޑައިރެކްޓަރ މުޙައްމަދު މޫސާ (އުއްޗު) އަށް ކަމުގައި ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެއެވެ.
މަޑިވަރު އެއާޕޯޓް ހުޅުވުމާއި ގުޅިގެން ޝިޔާމް ވިދާޅުވީ މިއަދަކީ ފާދިއްޕޮޅުގެ ލޮބުވެތި ރައްޔިތުންގެ އެންމެބޮޑު ހުވަފެން ހަޤީގަތަކަށްވެގެންދިޔަ އުފާވެރި ދުވަސް ކަމުގައެވެ. ފާދިއްޕޮޅުގައި އެއަރޕޯޓެއްގެ ޚިދުމަތް ފެށޭނެ ދުވަހެއްގެ އުއްމީދަކީ އަތޮޅުގެ ލޮބުވެތި ރައްޔިތުންގެ އެތައް އަހަރެއްގެ ދިގުއިންތިޒާރެއްގެ އުއްމީދުކަމަށެވެ. މަޑިވަރު އެއަރޕޯޓު ތަރައްޤީ ކުރުމަށް ކުރެއްދޫ ހޯލްޑިންގސްއާ ރައީސް ޔާމިންގެ ސަރުކާރުން ހަވާލުކުރީ 2018 ވަނަ އަހަރުގެ މެއި މަހުގެ 29 ވަނަ ދުވަހު ކަމަށާއި، އެތާރީޚީ ވަގުތަށް ވާސިލްވުމަށް ރައީސް ޔާމީން އަރިހުގައި ކުރެވުނު ގިނަގުނަ މަސައްކަތްތަކާ ދޭތެރޭ ފަޚުރުވެރިވާކަމަށެވެ. އަދި އެއަރޕޯޓު މަޝްރޫޢު ހަވާލުކުރުމުގެ މުހިއްމު ރަސްމިއްޔާތުގައި ބައިވެރިވުމުގެ ނަސީބު ލިބުނީތީ އަބަދުވެސް އުފާކުރާކަމަށް ޝިޔާމް ވިދާޅުވިއެވެ.
1 އަހަރު ދުވަހުތެރޭ މަސައްކަތް ނިންމާ ޚިދުމަތްފެށުމަށް އެއްބަސްވެވުން ކަމުގައި ވީނަމަވެސް ސަރުކާރު ބަދަލުވުމާއިގުޅިގެން އައަރޕޯޓު މަސައްކަތްތަކަށް ބޮޑެތި ގޮންޖެހުންތަކެއް ކުރިމަތިވެ މަސައްކަތްތައް މުޅިން ނިންމާލަން ގިނަދުވަސްތަކެއް ހޭދަވީ ކަމުގައި ވީނަމަވެސް މީ ވަރަށް ތާރީޚީއުފާވެރި ދުވަހެއްކަން ފާހަގަކުރަން. ރައީސް ޔާމިންގެ ވިސްނުންފުޅަކީ މަޑިވަރާއި ނައިފަރު ބުރިޖަކުން ގުޅުވާލާ ނައިފަރުގެ ހުޅަނގުފަރާތުން 50 ހެކްޓަރ ހިއްކެވުން. އެއިރުން ނައިފަރުގެ ބިމަށް އައިތުރުއެކުރެވުނީ މިހާރު ނައިފަރުގެ ބިމުގެ ސައިޒުގެ ބޮޑުބިމެއް.
– ޝިޔާމް ވިދާޅުވިއެވެ.
މަޑިވަރު އެއަރޕޯޓުގެ ވިސްނުމަކީ ރައީސް ސޯލިހުގެ ސަރުކާރާ ބީރައްޓެހި ވިސްނުމެއް ކަމަށާއި، މަޑިވަރު އެއަރޕޯޓު މަޝްރޫއާ ގުޅިގެން ރައީސް ސޯލިހު އަޑީގައި ހުންނަވާ ސޭވް މަޑިވަރުގެ ނަމުގައި މަޑިވަރު އެއަރޕޯޓުގެ ތަރައްޤީއަށް ހުރަސްއެޅުމުގެ ގޮތުން 2018 ވަނަ އަހަރުގެ ރިޔާސީ އިންތިޚާބުތެރޭގައި ވަނީ އަޑު އުފުލާ އިޙްތިޖާޖުކޮށްފައި ކަމަށެވެ.
އެ ނުރުހުންތެރިކަމާ އިހުތިޖާޖުތައް މިއަދު ވަނީ ކަޅު ޞަފްހާތަކެއްގެ ތާރީޚަކާއި އެކު މާޒީވެފައި، މިއަދު ވިސްނަންވީ މިބޮޑު ނިޢުމަތުގެ ބޭނުން ރަނގަޅުގޮތުގައި ހިފާ ނައިފަރު މުޅި ފާދިއްޕޮޅުގެ މުސްތަޤުބަލް ބިނާކުރަން. މަޑިވަރު އެއަރޕޯޓަކީ ފާދިއްޕޮޅަށް އިންޤިލާބީ ހެޔޮބަދަލެއް ގެނުވާނެ އެއަރޕޯޓެއް އަތޮޅުގެ އިޤްތިޞާދީ އަދި ޢިޖުތިމާޢީ ތަރައްޤީއަށް އެޅިގެންދިޔަ އެންމެވަރުގަދަ ބިންގާ.
– ޝިޔާމް ވިދާޅުވިއެވެ.
ޝިޔާމް ވަނީ ޅ.އަތޮޅުގެ މިޒަމާންވީ ހުވަފެނުގައި ކުލަޖައްސަވައިދެއްވި މަޑިވަރު އެއަރޕޯޓުގެ ހާޤީޤީ ބާނީ ރައީސް ޔާމީނަށް ވަރަށް އިޚުލާސްތެރި ކަމާއިއެކު ޝުކުރު ދަންނަވާފައެވެ. އަދި، އެއަރޕޯޓު ތަރައްޤީ ކުރި މަޑިވަރު ހޯލްޑިންގްސްއަށް ޚާއްޞަކޮށް މަނޭޖިންގ ޑައިރެކްޓަރ މުޙައްމަދު މޫސާ (އުއްޗު) އަށްވެސް ވަނީ ޝުކުރު ދަންނަވާފައެވެ.
މިއީ ރާއްޖޭގައިި މިވަގުތު އެއަރޕޯޓެއް ނެތް އަތޮޅުތަކުގެ ތެރެއިން ޅ. އަތޮޅުގައި ތަރައްޤީކުރި ފުރަތަމަ އެއަރޕޯޓެވެ. ފާދިއްޕޮޅު ނުވަތަ ޅ. އަތޮޅުގައި މީހުން ދިރިއުޅޭ 4 ރަށް އޮންނައިރު، 13،000 އަށްވުރެ ބޮޑު އާބާދީއެއް މިއަތޮޅުގައި ދިރިއުޅެމުންދެއެވެ. ޅ. އަތޮޅަކީ ގިނަ ރިސޯޓްތަކެއް ހިމެނޭ އަތޮޅެކެވެ. އަދި އިތުރު ރިސޯޓުތަކެއް ތަރައްޤީކުރުމުގެ މަސައްކަތް މިވަގުތުވެސް ދަނީ ކުރަމުންނެވެ.
