އެއްވެސް ޤައުމެއްގެ މިލިޓަރީ ބަޔަކުތިބެން ރުހެވޭކަށް ނެތްކަމަށް ދީނީ ޢިލްމުވެރިޔާ ޝައިޚް ޢަލީ ޒައިދު ވިދާޅުވެއްޖެއެވެ.
ރާއްޖޭގައި އިންޑިއާގެ އަސްކަރިއްޔާގެ ސިފައިން ތިބުމާއި ދެކޮޅު ހައްދަވައި ޒައިދު ކުރެއްވި ޓްވީޓްގައި ވިދާޅުވި، ދީނާ ޤައުމުގެ ދިފާޢުގައި ޝުޢޫރު ފާޅުކުރުމަކީ ދިވެހި ކޮންމެ ރައްޔިތަކަށްވެސް ލިބިގެންވާ ޙައްޤެއްކަމަށެވެ. ރާއްޖޭގައި ބޭރުގެއެއްވެސް ޤައުމަކަށް، އެއީ ޗައިނާ ނުވަތަ އިންޑިއާ ނުވަތަ ޕާކިސްތާނުކަމަށް ވިޔަސް އެއްވެސް ޤައުމެއްގެ މިލިޓަރީ ބަޔަކުތިބެން ރުހެވޭކަށް ނެތްކަމަށް ޒައިދު ވިދާޅުވިއެވެ.
ދީނާ ޤައުމުގެ ދިފާޢުގައި ޝުޢޫރު ފާޅުކުރުމަކީ ދިވެހި ކޮންމެ ރައްޔިތަކަށްވެސް ލިބިގެންވާ ޙައްޤެއް!
ރާއްޖޭގައި ބޭރުގެއެއްވެސް ޤައުމަކަށް، އެއީ ޗައިނާކަމަށް ވިޔަސް ނުވަތަ އިންޑިޔާކަމަށް ވިޔަސް ނުވަތަ ޕާކިސްތާނުކަމަށް ވިޔަސް އެއްވެސް ޤައުމެއްގެ މިލިޓްރީ ބަޔަކުތިބެން ރުހެވޭކަށް ނެތް!
— Ali Zaid (@alizaid1000) December 25, 2021
އިންޑިއާއާ ދެކޮޅަށް އިދިކޮޅުން ހިންގާ މި ހަރަކާތްތަކާ ދެކޮޅަށް ސަރުކާރާއި ރައްޔިތުންގެ މަޖިލީހުގެ ބައެއް މެންބަރުން ވެސް ގެންދަވަނީ ވާހަކަ ދައްކަވަމުންނެވެ. އެ ބޭފުޅުން ވިދާޅުވަނީ މިކަން ހުއްޓުވަން ޖެހޭނެ ކަމަށެވެ. މިހަރަކާތް ހުއްޓުވުމަށް އެމްޑީޕީގެ ރައީސް މުހައްމަދު ނަޝީދު ވަނީ މިހަރަކާތް ފުލުހުން ނިކުމެ ހުއްޓުވަން ޖެހޭކަމަށް ވިދާޅުވެފައެވެ.
އިންޑިއާ މިލިއަޓަރީ އައުޓް ހަރަކާތަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދުވެސް ތާޢީދުކުރައްވާކަމަށް ރައީސް ޔާމީން ވަނީ ވިދާޅުވެފައެވެ. އިދިކޮޅުން ކުރިއަށް ގެންދާ އިންޑިއާ އައުޓް ހަރަކާތް މިހާރު ފުޅަކުރަމުން އަންނައިރު ރައީސް ޔާމީން އަތޮޅުތެރެއަށް ކުރައްވާ ދަތުރުފުޅުގައިވެސް އެ ކެމްޕެއިން ދަނީ ކުރިއަށް ގެންދަވަމުންނެވެ. އެގޮތުން މިއަދު މާލެ އަތޮޅު ތުލުސްދޫއަށް ވަޑައިގެން ވާހަކަފުޅު ދައްވަމަުން ރައީސް ޔާމީން ވަނީ އިންޑިއާ އައުޓާއި ގުޅޭގޮތުން ރައީސް ނަޝީދު މިއަދު ކުރެއްވި ޓްވީޓާއި ގުޅޭގޮތުން ވާހަކަފުޅު ދައްކަވާފައެވެ.
ރައީސް ޔާމިން ވިދާޅުވީ، އިންޑިއާ އައުޓޭ ނުކިޔުނު ނަމަވެސް އިންޑިއާ މިލިޓަރީ އައުޓޭ ކިޔުމަކީ އެމަނިކުފާނަށްވެސް މައްސަލައެއް ނޫންކަންކަމެވެ. އިންޑިއާ ސިފައިން ބޭރުކުރުމަށް ރައީސް އިބްރާހީމް މުޙައްމަދު ޞާލިޙް ތާޢީދު ނުކުރެއްވިނަމަވެސް އެ ގޮވާލުމަށް ރައީސް ނަޝީދު ތާޢީދުކުރައްވާކަމަށް ރައީސް ޔާމީން ވިދާޅުވިއެވެ.
