އުތުރު ތިލަފަޅު އެއްބަސްވުން އަދާލަތު ޕާޓީއަށް ފެނިފައި ނުވާނެކަމަށް ވިދާޅުވެ ޕީއެންސީގެ ނާއިބު ރައީސް އަދި މާވަށު ދާއިރާގެ މެންބަރު މުޙައްމަދު ސަޢީދު އަދާލަތު ޕާޓިއަށް ރައްދު ދެއްވައިފިއެވެ.
ސަޢީދު އަދާލަތަށް ރައްދު ދީފައި މިވަނީ އިންޑިއާ އައުޓްގެ ނަމުގައި ކުރީގެ ރައީސް ޢަބްދުﷲ ޔާމީން އިސްވެ ހުންނަވައިގެން ހިންގާ ކެމްޕެއިނަކީ ސިޔާސީ މަޤުޞަދެއްގައި ރައްޔިތުންގެ ޝުޢޫރުތަކާ ކުޅެގެން ހިންގަވާ ނޭއްގާނީ އަމަލެއްކަމަށް އަދާލަތު ޕާޓިން ބުނުމާއި ގުޅިގެންނެވެ.
ސަރުކާރު ކޯލިޝަންގައި ހިމެނޭ އަދާލަތަށް ރައްދުދެއްވައި ސަޢީދު ވިދާޅުވީ، އިންޑިއާ ހައިކޮމިޝަންގެ އެނގުމަށް ސަރުކާރު ކޯލިޝަންގެ ލެޓަރ ހެޑުތަކުގައި ބަޔާން ނެރުން ގޯސްކަމަށެވެ. އުތުރު ތިލަފަޅު އެއްބަސްވުން އަދާލަތު ޕާޓީއަށް ފެނިފައިނުވާނެކަމަށާއި، ރައްޔިތުން އަޑު އުފުލަނީ އިންޑިއާ ސިފައިން ރާއްޖެއިން ފޭބުމަށްކަމަށެވެ.
އުތުރު ތިލަފަޅު އެއްބަސްވުން ޤާނޫނު އަސާސީއާއި ޚިލާފުކަމަށް. ހައިޑްރޮގްރަފީ ޑީލް ގޯސްކަމަށް. ހަނިމާދޫ އައްޑޫ ސަލާމަތް ކުރުމަށް.
– މުޙައްމަދު ސަޢީދު
Indian HC ge engun thah sarukaaru coalition ge letter head thakuga nerun goas!#UTF ge ebbasvun Adhaalathah fenifa eh nuvaane! Rayyithun adu ufulanee India sifain raajjeyn feybumah. #UTF ebbasvun QA aai khilaafu kamah. Hydrography deal goas kamah.Hanimadhu Addu salaamaiy kurumah! pic.twitter.com/dlKLXwgef9
— Mohamed Saeed (@em_saeed) December 25, 2021
”އިންޑިއާ އައުޓް“ ގެ ނަމުގައި ރައީސް ޔާމީނު އިސްވެ ހިންގަވާ ހަރަކާތާގުޅޭގޮތުން ސަރުކާރު ކޯލިޝަންގައި ހިމެނޭ އަދާލަތު ޕާޓިން ނެރުނު ބަޔާނުގައި ވަނީ، ދިވެހިރާއްޖެ އަކީ އިންޑިއާ ކަނޑުގެ މެދުގައި އެތުރިފައިވާ ނާޒުކު ޖަޒީރާ ޤައުމެއްކަމަށާއި، ދިވެހިރާއްޖޭގެ ކުރިއެރުމާއި ތަރައްޤީ އާއި ދިވެހި ރައްޔިތުންގެ ސަލާމަތާއި ދިވެހިންގެ އެންމެހާ މަސްލަހަތުތައް ހިމާޔަތްކުރުމުގައި ދިވެހިރާއްޖޭގެ ޚާރިޖީ ސިޔާސަތު ވަރަށް މަތީ ދައުރެއް އަދާކުރާކަމަށެވެ. ޢަދާލަތު ޕާޓީން ދެކެނީ ދިވެހި ޚާރިޖީ ސިޔާސަތުގެ އެންމެ އަސާސީ އަމާޒަކަށް ވާންވާނީ ދިވެހިންނާއި ދިވެހި ޤައުމުގެ ސަލާމަތާއި މަސްލަހަތު ހިމާޔަތްކޮށް ރައްކާތެރިކުރުމަށްކަމަށާއި، ދިވެހިރާއްޖެ ލެއްވިފައިވަނީ އިންޑިއާ ކަނޑުގައި ކަމަށްވެފައި ބައިނަލްއަޤުވާމީ ސަލާމަތާއި ވިޔަފާރީގެ ދާއިރާގައި އިންޑިއާ ކަނޑުގެ އަހަންމިއްޔަތުކަން އިތުރުވަމުން އަންނަ ހިނދު، އިންޑިއާ ކަނޑުގެ މަސްލަހަތު ހިމާޔަތްކުރުމަކީވެސް ދިވެހި ޚާރިޖީ ސިޔާސަތުގައި ރިޢާޔަތްކުރަންވާ މުހިންމު ކަމެއްކަމަށް އެޕާޓިން ނެރުނު ބަޔާނުގައިވެއެވެ.
އަދާލަތު ޕާޓީގެ ބަޔާނުގައި މުޅި ދުނިޔެ ގުޅިލާމެހިފައިވާ ޒަމާނެއްގައި ބައިނަލްއަގުވާމީ މަސްރަހުގައި އެކަހެރިކަމާއި ވަކިވެގަތުން އިސްކުރުމަކީ ދިވެހިންނަށް އެންމެ މަސްލަހަތުހުރި ގޮތް ކަމުގައި ޢަދާލަތު ޕާޓީން ނުދެކޭކަމަށް ބުނެފައިވެއެވެ. ވަކިން ޚާއްޞަކޮށް ތަރައްޤީ އާއި އެނޫންވެސް ދިވެހިން އެދޭ ދިރިއުޅުން ހާސިލުކުރުމަށްޓަކައި އަވަށްޓެރި ޤައުމުތަކާއި އަދި ހެޔޮއެދޭ ޤައުމުތަކާ ގުޅިގެން މަސައްކަތްކުރަން ޖެހޭ ދުވަސްވަރެއްގައި އަވަށްޓެރި ޤައުމުތަކާއި ދުނިޔޭގެ އެހެން ޤައުމުތަކާ ގުޅުންބަދަހިކުރަންޖެހޭ ކަމަކީ ޤަބޫލުކުރަން ޖެހޭ ހަޤީޤަތެއްކަމަށްވެސް އަދާލަތުގެ ބަޔާނުގައިވެއެވެ.
