އދ.ދަނގެތީ މެޖިސްޓްރޭޓް ކޯޓުގެ އިސްމެޖިސްޓްރޭޓް މުޙައްމަދު އާމިރުއާ މެދު ސުލޫކީ ފިޔަވަޅެއްގެ ގޮތުގައި ތަމްރީން ޕްރޮގުރާމެއް ފުރިހަމަ ކުރުމަށް ޖޭއެސްސީން އަންގައިފިއެވެ.
ޖުޑިޝަލް ސާވިސް ކޮމިޝަނުން ބުނެފައިވަނީ އދ.މަހިބަދޫ މެޖިސްޓްރޭޓް ކޯޓަށް ހުށަހެޅުނު މައްސަލައެއްގެ ޝަރީއަތް ކުރިއަށް ގެންދިޔުމުގައި، ޖިނާއީ އިޖުރާއަތުގެ ޤާނޫނުގައި ކަނޑައަޅާފައިވާ އިޖުރާއަތްތަކާ އެއްގޮތަށް އެ ޤަޟިއްޔާގެ ޝަރީޢަތް ހިންގުމަށް އެއްވެސް މަސައްކަތެއް ކުރުމުގެ ބަދަލުގައި، ކުރިން ކުރެވިފައިވާ ތަޖުރިބާތަކެއްގެ ސަބަބުން ވަކި ޙާލަތެއް މެދުވެރިވެދާނެކަމަށް ކުރެވުނު ލަފައެއްގެ މައްޗަށް ބުރަވެ، ޝަރީޢަތަށް ހުށަހެޅިފައި ނުވާ ކަންތައްތަކެއްގެ މައްޗަށް ބިނާކޮށް އދ.ދަނގެތި މެޖިސްޓްރޭޓް ކޯޓުގެ އިސްމެޖިސްޓްރޭޓް މުޙައްމަދު އާމިރު ޙުކުމްކޮށްފައިވާކަން ކޮމިޝަންގެގެ ތަޙުޤީޤަށް ސާބިތުވެފައިވާކަމަށެވެ.
އިސްމެޖިސްޓްރޭޓް މުޙައްމަދު އާމިރުގެ މި ޢަމަލަކީ، ދިވެހިރާއްޖޭގެ ފަނޑިޔާރުންގެ ޤާނޫނުގެ 33 ވަނަ މާއްދާގެ (ށ) އާއި އަދި ފަނޑިޔާރުންގެ ސުލޫކީ މިންގަނޑާއި ޚިލާފަށް ކޮށްފައިވާ އަމަލެއްކަމަށް ޖޭއެސްސީން ވަނީ ބުނެފައެވެ.
ޖުޑީޝަލް ސަރވިސް ކޮމިޝަންގެ ޤާނޫނުގެ 1-32 ވަނަ މާއްދާގެ (ހ)ގެ (1) ވަނަ ނަންބަރުގެ ދަށުން، ނަޞޭޙަތް ދިނުމާއެކު ކޮމިޝަނުން ކަނޑައަޅާ ތަމްރީނު ޕްރޮގްރާމެއް ފުރިހަމަ ކުރުމަށް އިސްމެޖިސްޓްރޭޓް މުޙައްމަދު އާމިރު އަށް އެންގުމަށް، ޖޭއެސްސީން ވަނީ ނިންމާފައެވެ.
