ދިވެހި ޤައުމަށާއި، ދިވެހި ރައްޔިތުންނަށް އެތައް ޚިދުމަތްތަކެއް ކުރެއްވި ނިޝާން ޢިއްޒުއްދީންގެ ޢިއްޒަތުގެ ވެރިޔާ ޢުމަރު ޒާހިރު އަވަހާރަވުމާއި ހަމައަށްވެސް ހުންނެވި ޤައުމީ ޚިދުމަތުގައެވެ.
ޤައުމީ ބޮޑެތި މަސައްކަތްތައް ޢަމަލީގޮތުން ހިންގެވުމާއި އެމަސައްކަތްތައް ހިނގާނުހިނގާގޮތް ބެއްލެވުމާއި، އިޖުތިމާޢީ އަދި ޤައުމީ އެންމެހައި ކަންކަމުގައި ޙަރަކާތްތެރިވެވަޑައިގަތުމުގެ ލާމަސީލުމުސާލެއް ނަމޫނާ ޝަޚްޞިއްޔަތެކެވެ. އުމަރު ޒާހިރު އެންމެ ފަހުން ބިނާކުރެއްވި މިސްކިތް ހުޅުވައި ދެއްވީ ޚުދު އެމަނިކުފާނުގެ ބައިވެރިވުމާއިއެކު މިމަހުގެ ފުރަތަމަ ދުވަހުއެވެ.
ފުވައްމުލަކުގައި މިސްކިތެއް އެޅުއްވުމަށް އުމަރު ޒާހިރު ނިންމެވީ އެރަށު މަސްޖިދުއް ސިއްދީގު ވަރަށް ބޮޑަށް ވީރާނާވެ ހަލާކުވާން ކައިރިވެފައި ހުރި ކަމަށް ބުނެ މީގެ ދެ އަހަރު ކުރިން އެ މައްސަލަ އުމަރު ޒާހިރުގެ ސަމާލުކަމަށް މީހަކު ގެނެސްދިނުމުންނެވެ. މަސްޖިދުއް ސިއްދީގުގެ އާ އިމާރާތުގެ އަމަލީ މަސައްކަތް ފެށިތާ ގާތްގަނޑަކަށް ފަސް މަސް ދުވަހުގެ ތެރޭގައި މަސައްކަތް ނިންމާލާފައިވެއެވެ.
އަރާފޭބުމަށް އެންމެ ދަތި އެއް ރަށުގެ ގޮތުގައި ފާހަގަކުރެވިފައި އޮތް ފުވައްމުލަކުގައި އެންމެ ޒަމާނީ ފެންވަރުގެ ބަނދަރެއް ހަދައިދީ އެ ރަށުގެ ރައްޔިތުން ރަށު ބަންދުން މިނިވަންކޮށްދިނީ ވެސް ކޮންސްޓްރަކްޝަން މިނިސްޓަރަކަށް އުމަރު ޒާހިރު ހުންނެވި ދުވަސްވަރު 2003 ވަނަ އަހަރުއެެވެ.
ދަތުރު ފުޅަށްފަހު މާލެ ވަޑައިގެންނެވިތާ މާގިނަ ދުވަސްތަކެއް ނުވެ ކޯވިޑަށް ޕޮޒިޓިވްވިކަން ވަނީ އެގިފައެވެ. . ޢުމަރު ޒާހިރުގެ ޢާއިލާއިން މީގެ ކުރިން މަޢުލޫމާތު ދެއްވިގޮތުގައި އެމަނިކުފާނުގެ އަމިއްލަފުޅު ޚަރަދުގައި ފުވައްމުލަކުގައި ބިނާކުރެއްވި މިސްކިތް ހުޅުވުމަށް އެރަށަށް ކުރެއްވި ދަތުރުފުޅަށްފަހު އެނބުރި މާލެވަޑައިގެންވި ފަހުން އުޅުއްވީ އާލާސްކަންފުޅާއެވެ. ގަދަ ހުމުގެ އާލާސްކަންފުޅެއް ޖެހި، ހިންގަވައި އުޅުއްވުމަށްވެސް އެމަނިކުފާނަށް އުނދަގޫފުޅުކަމަށް ޢާއިލާއިން ކުރިން މަޢުލޫމާތު ދެއްވާފައިވެއެވެ. އަދި އެމަނިކުފާނުގެ ހާލުކޮޅު އިތުރަށް ގޯސްވެ، ދަރުމަވަންތަ ހޮސްޕިޓަލުގައި ފަރުވާ ދޭން ފަށާފައިވަނީ މިމަހުގެ 14ވަނަ ދުވަހުއެވެ.
ޢުމުރުފުޅުން 85 އަހަރުފުޅުގެ ޢުމަރު ޒާހިރަކީ ސަރުކާރު މަތީ އެތައް މަޤާމެއް ފުރުއްވާފައިވާ ޚިދުމަތްތެރި އިޚްލާސްތެރި ބޭފުޅެކެވެ. 1953އިން ފެށިގެން 2008ވަނަ އަހަރާހަމައަށް ސަރުކާރުގެ އެކި ފަންތީގެ 26 މަޤާމެއް ފުރުއްވާފައިވެއެވެ. ޢުމަރު ޒާހިރަށް، ނިޝާން ޢިއްޒުއްދީންގެ ޢިއްޒަތްތެރި ވެރިކަމުގެ ލަޤަބު ލިބިވަޑައިގެންނެވީ 2008ވަނަ އަހަރުގެ ނޮވެމްބަރުމަހުގެ 10ވަނަ ދުވަހުއެވެ.
ރާއްޖޭގެ ތަރައްްގީއަށް ފާހަގަކޮށްލެވޭފަދަ އަގުހުރި ޚިދްމަތްތަކެއްކޮށްދެއްވާފައިވާ ޢުމަރު ޒާހިރު ވަނީ 1983ވަނަ އަހަރުން ފެށިގެން 1988ވަނަ އަހަރާ ހަމަޔަށް މިނިސްޓަރ އޮފް ހޯމް އެފެއަރޒް އެންޑް ސޯޝަލް ސާރވިސަސްގެ މަޤާމު އަދާކުރައްވާފައެވެ. އަދި 1988އިން ފެށިގެން 1993ވަނަ އަހަރާއި ހަމަޔަށް ޢުމަރު ޒާހިރު ވަނީ މިނިސްޓްރީ އޮފް ހޯމް އެފެއަރޒް އެންޑް ސްޕޯޓްސްގެ މަޤާމު އަދާކުރައްވާފައެވެ. ރާއްޖޭގެ ކުޅިވަރާއި ބެހޭ ފުރަތަމަ ވަޒީރަކީވެސް އެމަނިކުފާނެވެ. ޢުމަރު ޒާހިރު ވަނީ މިނިސްޓަރ އޮފް ކޮންސްޓްރަކްޝަން އެންޑް ޕަބްލިކް ވާރކްސްކަމާއި ރައީސުލްޖުމްހޫރިއްޔާ އޮފީހުގެ ސީނިއަރ މިނިސްޓަރުކަން ވެސް ކުރައްވާފައެވެ.
ޢުމަރު ޒާހިރަކީ ރާއްޖޭގެ ތަރައްގީއަށް ފާހަގަކޮށްލެވޭފަދަ އަގުހުރި ޚިދްމަތްތަކެއްކޮށްދެއްވާފައިވާ ބޭފުޅެކެވެ. އެގޮތުން ރާއްޖޭގައި ހިންގި ތަރައްގީގެ ބޮޑެތި މަޝްރޫއުތަކުގައި ޢުމަރު ޒާހިރުގެ ހިއްސާ ވަރަށްބޮޑެވެ. މާލޭގެ މަގު ހެދުމުގެ މަޝްރޫއާއި އެއްގަމުތޮށްޓާއި ކަނޑުތޮށީގެ މަޝްރޫޢުއާއި ހުޅުމާލެ ހިއްކުމުގެ މަޝްރޫއާއި ތިލަފުށީގެ މަޝްރޫއު ފަދަ ބޮޑެތި ބައެއް މަޝްރޫޢުތަކަކީވެސް ޢުމަރު ޒާހިރުގެ ސީދާ ބެއްލެވުމުގެ ދަށުން ހިންގެވި ބޮޑެތި މަޝްރޫޢުތަކެވެ.
