ލާދީނީ މީހުން ކިތަންމެ ބޭނުންވިޔަސް ޢަރަބިއްޔާ ދުއްވައެއް ނުލެވޭނެ ކަމުގައި ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.
ރާއްޖޭގައި އަރަބި ބަހުން ކިޔަވައިދޭ އެންމެ ބޮޑު މަދަރުސާ އަރަބިއްޔާ ސްކޫލު ބާވެ، އިމާރާތުގައި ކިޔެވޭނެ ހާލަތެއް ނެތުމުން ސަރުކާރުން އަރަބިއްޔާ ސްކޫލުގެ ދަރިވަރުންނަށް ގޮތްތަކެއް ހަމަ ނުޖައްސައި ދައްކަވަމުންދާ ވާހަތަކާއި ގުޅިގެން ގިނަ ބައެއްގެ ނުރުހުން ވަނީ އަމާޒުވެފައެވެ. މިމައްސަލާގައި އަރަބިއްޔާ ސްކޫލުގެ ބެލެނެވެރިން އިހުތިޖާޖުކޮށް، ހަދާފައިވާއިރު މިހާރު ސްކޫލުގެ ބެލެނެވެރިން ވަނީ ރައީސް ޞާލިހާއިވެސް ބައްދަލު ކުރުމަށް ހަމަޖެހިފައެވެ.
ޢަރަބިއްޔާ ސްކޫލްގެ ދަރިވަރުންގެ ކިޔެވުން ވަގުތީ ގޮތުން ޢިއްޒުއްދީން ސްކޫލަށް ބަދަލުކުރުމަށް އެޑިއުކޭޝަން މިނިސްޓްރީން ވަނީ ނިންމާފައެވެ. ނަމަވެސް މިނިންމުމަކީ އަރައްބިޔާ ސްކޫލުގެ ދަރިވަރުންނާއި ބެލެނެވެރިންވެސް އެއްގޮތަކަށްވެސް ރުހޭކަމެއް ނޫނެވެ. މިމައްސަލާގައި އެކި ފަހަރުމަތީން ނުރުހުން ފާޅު ކުރައްވަމުންދާ ޝައިޚު ޒައިދު ވިދާޅުވީ އަރަބިއްޔާ ނެތި ކޮށްލުމަށް ލާދީނީ މީހުން ކިތަންމެ ބޭނުންވިޔަސް އެކަން ނުވާނެކަމަށެވެ.
ލާދީނީ މީހުން ކިތަންމެ ބޭނުންވިޔަސް ޢަރަބިއްޔާ ދުއްވައެއް ނުލެވޭނެ! އިންޝާ ﷲ!
– ޝައިޚު ޒައިދު ވިދާޅުވިއެވެ.
ގާތްގަނޑަކަށް 700އަށްވުރެ ގިނަ ދަރިވަރުން ކިޔަވަމުން އަންނަ ޢަރަބިއްޔާ ސްކޫލްގެ ޢިމާރާތަށް ދިމާވި މައްސަލަތަކާގުޅިގެން އެކަށީގެންވާ ފިޔަވަޅުތައް ނާޅާކަމަށް ބުނެ ޢާއްމުންގެ މެދުގައި ހުރި ކަންބޮޑުވުންތަކަށް އަލިއަޅުއްވާލައްވައި އެމިނިސްޓްރީން ވިދާޅުވީ ޢަރަބިއްޔާއަކީ ރާއްޖޭގައި ހިންގާ ސްކޫލްތަކުގެ ތެރެއިންވެސް ޚާއްސަ ސިފަތަކެއް ލިބިގެންވާ ސްކޫލެއްކަމަށެވެ. އަދި އެސްކޫލަކީ ރާއްޖޭގައި ތަޢުލީމު ފޯރުކޮށްދިނުމުގައި އިސްލާމީ ވަޙުދަތު އެންމެބޮޑަށް ރަމްޒުކޮށްދޭ ތަންކަމަށާ މިފަދަ އެތައް ސަބަބުތަކަށްޓަކައި އެސްކޫލަށް ސަރުކާރުން އަބަދުވެސް އަހަމިއްޔަތުކަން ދޭނެކަމަށް މިނިސްޓްރީން ވިދާޅުވެއެވެ.
ޢަރަބިއްޔާއަކީ ރާއްޖޭގައި ޢަރަބި މީޑިއަމަށް ކިޔަވަން ބޭނުންވާ ކުދިންނަށް ހުރި ރަނގަޅު ސްކޫލެއްކަމަށާ، އެސްކޫލްގެ މަންހަޖާއި އިމްތިޙާނުތަކަކީ މިސްރުގެ އަލްއަޒްހަރު ޔުނިވަރސިޓީން ޤަބޫލުކުރާ މަންހަޖަކާއި އިމްތިޙާނުތަކެއްކަންވެސް އެޑިއުކޭޝަން މިނިސްޓްރީން ފާހަގަކުރެއްވިއެވެ.
އަރަބިއްޔާ ސްކޫލުގެ ދަރިވަރުންނަށް ދިމާވެފައިވާ އިމާރާތުގެ ދަތިކަމުގެ މައްސަލައަށް ހައްލު ނުހޯދި ގިނަ ދުވަސްތަކެއް ވަމުންދާއިރު މިކަމުގައި ސަރުކާރުން ރަސްމީކޮށް އަދި ވަކިގޮތެއް ނުނިންމައެވެ.
