ޞިއްޙީ ދާއިރާގައި މިންތީ ތަފާތުތައް ވަރަށް ބޮޑަށް ކުޑަކުރެވިއްޖެކަމަށާއި، ނަމަވެސް، ސިޔާސީ އަދި އިޤްތިޞާދީ ދާއިރާއިން ރާއްޖޭގައި މިންތީ ތަފާތުތައް އަދިވެސް ބޮޑުކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. ރައީސް މިހެން ވިދާޅުވީ، "ވިމް ޕްރޮފެޝަނަލް އެންޑް ކެރިއަރ ވިމެން އެވޯޑްސް 2021″ ޙަފްލާގައި ވާހަކަފުޅު ދައްކަވަމުންނެވެ.
ރައީސްގެ ވާހަކަފުޅުގައި އަންހެނުން ބާރުވެރި ކުރުމާއި އަންހެނުންނަށް ފުރުޞަތުތައް ހޯދައިދިނުމަކީ މިސަރުކާރުގެ ވަރަށް މުހިންމު ސިޔާސަތެއްކަމަށެވެ. މިންތީ ތަފާތުތައް ނައްތާލައި، ސިޔާސީ އަދި އިޖުތިމާޢީ މައިދާނުގައި، އަންހެނުންނަށް ހަމަހަމަ ފުރުޞަތު ހޯދައިދިނުމަކީ، ސަރުކާރުން މިހާރުވެސް ތަންފީޒު ކުރަމުން އަންނަ ވަޢުދެއްކަމަށް ރައީސް ވިދާޅުވިއެވެ.
ކޯވިޑް-19ގެ ވަބާ ކުރިމަތިވެ، އިޤްތިޞާދު އަޑިއަޅާލައިގެން ދިޔައީ، 5 އަހަރުގެ ސްޓްރެޓީޖިކް އެކްޝަލް ޕްލޭނެއް އެކުލަވާލައި ތަންފީޒުކުރަން ފެށިތަނާކަމަށް ރައީސް ވިދާޅުވިއެވެ. އޭގެ ސަބަބުން އެ ޕްލޭން ތަންފީޒުކުރުމުގައި ގޮންޖެހުންތަކެއް ކުރިމަތިވިކަމަށާއި، އެހެންކަމުން، އެ ޕްލޭންގެ ތެރެއިން އެންމެ ބޮޑަށް އިސްކަން ދޭންޖެހޭ ކަންކަން ދެ އަހަރުގެ ތެރޭގައި ތަންފީޒުކުރުމަށް، ނޭޝަނަލް ރެޒިލިއަންސް އެންޑް ރިކަވަރީގެ ނަމުގައި، ވަކި ލިސްޓެއް މިހާރު އެކުލަވާލާފައި ވާނެކަމަށް ރައީސް ވިދާޅުވިއެވެ.
މިދެންނެވި ލިސްޓުގައި ކުރުމަށް ކަނޑައަޅާފައިވާ އެއްކަމަކީ، ޖެންޑަރ އީކުއަލިޓީ އެކްޝަން ޕްލޭން ތަންފީޒު ކުރުން. މިއީ ދައުލަތް ހިންގުމުގެ އިސް ސަފުގައި މިންތީ ހަމަހަމަކަން ޤާއިމުކުރުމަށް އަމާޒުކޮށްފައިވާ ޕްލޭނެއް. ޤައުމީ ފެންވަރުގައި ހިންގާ ކޮންމެ ޙަރަކާތެއްގައި މިންތީ ހަމަހަމަކަން ކަށަވަރުކުރުމަކީވެސް މި ޕްލޭންގެ ވަރަށް މުހިންމު ބައެއް.
– ރައީސް އިބްރާހީމް މުޙައްމަދު ޞާލިޙް
ރާއްޖޭގެ އިޤްތިޞާދީ ދާއިރާގައި، ޒަމާނުއްސުރެ އަންހެނުން އަދާކުރަމުން އަންނަނީ، ވަރަށް ކުލަގަދަކޮށް ފާހަގަކުރެވޭވަރުގެ މުހިންމު ދައުރެއްކަމަށާއި، ޖެންޑަރ އީކުއަލިޓީ އެކްޝަން ޕްލޭން ތަންފީޒުވެގެންދާއިރު، އިޤްތިޞާދީ ގޮތުން މިހާރަށްވުރެ މާބޮޑަށް އަންހެނުން ބާރުވެރިކުރެވޭނެ ކަމަށް ޔަޤީންކުރަންކުރައްވާކަމަށް ރައީސް ވިދާޅުވިއެވެ. އަދި އަންހެނުންނަށް ލިބޭ ގެވެށި އަނިޔާތަކުން އެކަށީގެންވާ ރައްކާތެރިކަމެއް ލިބޭނެކަމަށްވެސް ދެކެވަޑައިގަންނަވާކަމަށް އެމަނިކުފާނު ވިދާޅުވިއެވެ.
2021 ވަނަ އަހަރުގެ ގްލޯބަލް ޖެންޑަރ ގެޕް އިންޑެކްސްއަށް ބަލާއިރު، ރާއްޖޭގެ ތަޢުލީމީ ދާއިރާގައި މިންތީ ތަފާތުކުރުމެއް ނެތް. ޞިއްޙީ ދާއިރާގައި މިންތީ ތަފާތުތައް ވަރަށް ބޮޑަށް ކުޑަކުރެވިއްޖެ. ނަމަވެސް، ސިޔާސީ އަދި އިޤްތިޞާދީ ދާއިރާއިން ރާއްޖޭގައި މިންތީ ތަފާތުތައް އަދިވެސް ބޮޑުކަމަށް ފާހަގަ ކުރެވޭ. މިތަފާތު ކުޑަކުރުމަށް، މިސަރުކާރުގެ ފަރާތުން ފުރަތަމަ ދުވަހުން ފެށިގެން މުހިންމު މަސައްކަތްތަކެއް މިއަންނަނީ ކުރަމުން.
– ރައީސް އިބްރާހީމް މުޙައްމަދު ޞާލިޙް
ރައީސްގެ ވާހަކަފުޅުގައި ރާއްޖޭގެ ޝަރުޢީ ކޯޓުތަކުގެ ފަނޑިޔާރުންގެ ގޮތުގައި ޢައްޔަންކުރެވޭ އަންހެނުންގެ ޢަދަދު މިހާރު އަންނަނީ އިތުރުވަމުންކަމަށާއި، ރާއްޖޭގެ ސުޕްރީމް ކޯޓަށް ފުރަތަމަ ފަހަރަށް އަންހެން ފަނޑިޔާރުން ޢައްޔަންކުރީ މި ސަރުކާރުންކަމަށް ރައީސް ފާހަގަކުރެއްވިއެވެ. ސުޕްރީމް ކޯޓުގައި މިހާރު ދެ އަންހެން ފަނޑިޔާރުން ތިއްބަވާނެކަމާއި، ބޭރުގައި ހުންނަ ރާއްޖޭގެ ޚާރިޖީ އޮފީސްތަކުގައި ހަމަހަމަކޮށް ތަމްސީލް ކުރައްވާނީ ދިވެހި އަންހެނުންނާއި ދިވެހި ފިރިހެނުން ތަފާތެއްނެތިކަންވެސް ރައީސް ފާހަގަކުރެއްވިއެވެ.
އަޅުގަނޑުމެން މި ބޭނުންވާ ކުރިއެރުން ހޯދެން އޮތް އެންމެ ފަސޭހަ ގޮތަކީ، ހިންގުމުގެ ދާއިރާގައާއި ސިޔާސަތު ކަނޑައެޅުމުގެ ދާއިރާގައި އަންހެނުންގެ ބައިވެރިވުން އިތުރުކޮށްގެން. ޙަޤީޤީ ތަރައްޤީ ފެށިގެން މިއަންނަނީ ރަށްރަށުގެ ކުދިކުދި މުޖުތަމަޢުން. އެންމެ މުހިންމީ، އެ ރަށްރަށުގެ ތަރައްޤީއާ ގުޅޭ ކަންކަން ނިންމުމުގައި އަންހެނުން ބައިވެރިކުރުން.
– ރައީސް އިބްރާހީމް މުޙައްމަދު ޞާލިޙް
ރައީސް ވިދާޅުވީ، ލާމަރުކަޒީ ޤާނޫނަށް މިސަރުކާރުން ގެނައި އެންމެ މުހިންމު އެއް ބަދަލަކީ، ލޯކަލް ކައުންސިލްތަކުގެ މެމްބަރުންގެ 33 އިންސައްތަ އަންހެނުންނަށް ޚާއްޞަކުރިކަމަށާއި، މިބަދަލާއެކު ކައުންސިލްތަކުގެ 33 އިންސައްތައަށް ވުރެ މަތީ ނިސްބަތެއް މިހާރު ޙިއްޞާކުރަނީ އަންހެނުންކަން ތަކުރާރުކުރެއްވިއެވެ. އޭގެ އިތުރުން ރައްޔިތުން އިންތިޚާބުކުރާ އަންހެނުންގެ ކޮމިޓީތަކާއެކު، ރަށްރަށުގެ ތަރައްޤީގެ ކަންކަން މިހާރު ނިންމަންވާނީ، އަންހެނުންގެ ބައިވެރިވުމާއި ލަފަޔާއި މަޝްވަރާޔާއެކުކަމަށްވެސް ރައީސް ވިދާޅުވިއެވެ.
ކަންކަމުގައި އަންހެނުން ބައިވެރިކުރާ ވާހަކައާއި، އަންހެނުންނަށް ފުރުސަތުތައް ދޭ ވާހަކަ މިވަރަށް މިދައްކަނީ ކީއްވެބާއޭ ބައެއް ފަހަރަށް ހިތަށް އަރާނެ. ބައެއް ބޭފުޅުން އެބަ ވިދާޅުވެ، އަންހެނުންނަކީ މުޖުތަމަޢުގެ އެއްބައި ކަމަށްވާތީ، ހަމަހަމަ ކުރުމުގެ ގޮތުން ފުރުޞަތު ދޭންޖެހެނެޔޭ. ނޫން މުޅިން އެހެންނެއް ނޫން އެކަންއޮތީކީ. އަޅުގަނޑުމެން އެކަން މިކުރަނީ އެ ވިސްނުމަކުން ނޫން، އަދި އެ ބޭނުމަކުވެސް ނޫން.
– ރައީސް އިބްރާހީމް މުޙައްމަދު ޞާލިޙް
ރައީސް ވިދާޅުވީ، ފިރިހެނެއްގެ ނަޒަރުން ވިސްނިފައިނުވާ ކިތަންމެ ގޮތަކަށް، ކަންކަމާ މެދު އަންހެނުންގެ ވިސްނުން ހުރެދާނެކަމަށާއި، މުޖުތަމަޢުގެ ކަންކަން ފިރިހެނުން ތަޖުރިބާކުރާ ގޮތާ މުޅިން ޚިލާފަށް އަންހެނުން ތަޖުރިބާކުރުމަކީ ވެދާނެ ކަމެއްކަމަށެވެ. އެހެންކަމަށް ވާނަމަ، ކަންކަމާ މެދު އަންހެނުން ސުވާލު އުފައްދާ ގޮތްވެސް، އަދި އެ ސުވާލުން ނެރެން ބޭނުންވާ ނަތީޖާވެސް ތަފާތުވާނެކަމަށް ރައީސް ވިދާޅުވިއެެ.
ވިސްނުމާއި ތަޖުރިބާކުރުމާއި އިޙްސާސްކުރުމުގައި ހުންނަ މިފަދަ ތަފާތުތަކަށް ބަލާއިރު، ކަންކަން އިޞްލާޙްކުރުމަށް ނުވަތަ ބަދަލުކުރުމަށް އަންހެނުން ހުށަހަޅާ ހުށަހެޅުންތައްވެސް ތަފާތުވާނެ. އޭގެ ފޭރާންވެސް ހެޔޮވެފައި އޮށްޓަރު ރަނގަޅުވާނެ. މައްސަލަތަކަށް ހުށަހަޅާ ޙައްލުތައް ވެސް މުޖުތަމަޢުގެ ހާލަތާ އެކަށީގެންވާނެ. އަޅުގަނޑު ހިތުން މި ވާހަކަ ފަޒޫވެސް މީގެކުރިން ކޮންމެވެސް އެއް ފޯރަމެއްގައިވަނީ ހިއްސާކުރައްވާފައި ތިޔަބޭފުޅުންނާ.
– ރައީސް އިބްރާހީމް މުޙައްމަދު ޞާލިޙް
ރައީސް ވިދާޅުވީ، އިޤްތިޞާދީ ގޮތުން ފަހިކޮށްދޭ ފުރުޞަތުތަކުގައިވެސް، އަންހެނުންނަށް ޚާއްޞަ އިސްކަމެއް ދިނުމަކީ، އަންހެނުން ބާރުވެރިކުރުމަށްޓަކައި ވަރަށް މުހިންމު ކަމެއްކަމަށެވެ. އެގޮތުން އެސް.އެމް.އީ. ބޭންކުން، ކުދި އަދި މެދު ފަންތީގެ ވިޔަފާރިތަކަށް ލޯނު ދިނުމުގައިވެސް އިސްކަންދޭ ގިންތިއަށް 25 އިންސައްތަ ޚާއްޞަކޮށްފައިވާނެކަމަށާއި، އެ ގިންތީގައި ހިމެނޭ އެއް ބަޔަކީ އަންހެނުންކަމަށްވެސް ވިދާޅުވިއެވެ.
އަޅުގަނޑުމެން ޤަބޫލުކުރާ ގޮތުގައި އަންހެނަކަށް ވީތީ ތަފާތުކުރުމެއް ގެންގުޅެގެން ނުވާނެ. ނަމަވެސް އަންހެނަކަށް ވީތީ ލިބެންޖެހޭ އިމްތިޔާޒްތަކެއްވެސް އަދި ޢިނާޔަތްތަކެއްވެސް ހުންނާނެ. ސަރުކާރުގައި ވަޒީފާ އަދާކުރާ އަންހެނުން ވިހެއުމާ ގުޅިގެން، މުސާރައާއެކު 6 މަސް ދުވަހުގެ ޗުއްޓީއެއް ލިބޭ ގޮތަށް އަޅުގަނޑުމެން ހަމަޖެއްސީ އެ ސަބަބަށްޓަކައި.
– ރައީސް އިބްރާހީމް މުޙައްމަދު ޞާލިޙް
ރައީސްގެ ވާހަކަފުޅުގައި މުޖުތަމަޢުގެ އިސް ސަފުގައި އަންހެނުން އަދާކުރާ ދައުރާއި އުފުލާ ޒިންމާތަކުގެ އަގުވަޒަންކޮށް، އެފަދަ އެވޯޑްތަކެއް ދިނުމަކީ، މިންތީ ތަފާތުތައް ނައްތައިލުމަށް ސަރުކާރުން ގެންގުޅޭ ސިޔާސަތުތަކަށް ލިބޭ ވަރަށް ބޮޑު ބާރެއްކަމަށް ވިދާޅުވިއެވެ. އަދި ކަންކަމުގައި ބައިވެރިވެ އިސް ސަފަށް ނުކުތުމަށް އަންހެނުންނަށް ލިބޭނެ ވަރަށް ބޮޑު ހިތްވަރަކަށް ވާނެ ކަމަށް ދެކެވަޑައިގަންނަވާކަމަށްވެސް ރައީސް ވިދާޅުވިއެވެ.
