ކޮމަންޑޫ ދާއިރާގެ މެންބަރު ޙުސައިން ވަހީދު އަވަހަރާވުމަކީ ރާއްޖެއަށާއި ރައްޔިތުންގެ މަޖިލީހަށް ލިބުނު ވަރަށް ބޮޑު ނިކަމެތިކަމެއް ކަމަށް ސިފަކޮށްފިއެވެ.
ކެންސަރު ބައްޔަށް ފަރުވާ ހޯއްދަވަމުން ގެންދަވާ ޙުސައިން ވަހީދު ޢުމުރުފުޅުން 53 އަހަރުފުޅުގައި އަވަހާރަވީ އޭޑީކޭ ހޮސްޕިޓަލުގައި ފަރުވާ ހޯއްދަވަމުން ގެންދަވަނިކޮށް ރޭ ދަންވަރުއެވެ.
ޙުސައިން ވަޙީދު އަވަހާރަ ވުމާއި ގުޅިގެން ސަރުކާރާއި މަޖިލީހުގެ މެންބަރުންނާއި އާންމުން ގެންދަނީ ތަޢުޒިޔާ ވިދާޅުވެ ހިތާމާގައި ބައިވެރިވަމުންނެވެ.
ޙުސައިން ވަޙީދުގެ އާއިލާއަށް ތަޢުޒިޔާ ވިދާޅުވެ މަޖިލީހުން ނެރުނު ބަޔާނުގައި މަޖިލީހުގެ ރައީސް ސިފަކުރައްވާފައިވަނީ ޙުސައިން ވަޙީދަކީ ވަރަށް އިޚްލާސްތެރި ބޭފުޅެއްގެގޮތުގައެވެ. ރައްޔިތުންގެ މަޖިލީހާއި ދައުލަތަށް އިހުލާސްތެރި ހިދުމަތްތަކެއްކޮށްދެއްވި ހުސެއިން ވަހީދު އަވަހާރަވުމަކީ ރާއްޖެއަށާއި ރައްޔިތުންގެ މަޖިލީހަށް ލިބުނު ވަރަށް ބޮޑު ނިކަމެތިކަމެއްކަމަށްވެސް އެބަޔާނުގައިވެއެވެ.
ރައްޔިތުންގެ މަޖިލީހުގެ ކޮމަންޑޫ ދާއިރާގެ ޢިއްޒަތްތެރި މެންބަރު އަލްފާޟިލް ޙުސައިން ވަޙީދު އަވަހާރަވުމާ ގުޅިގެން އެމަނިކުފާނުގެ ޢާއިލާގެ ބޭފުޅުންނަށް މަޖިލީހުގެ ރައީސް، މުޙައްމަދު ނަޝީދުއާއި މަޖިލީހުގެ ހުރިހާ މެންބަރުންގެ ނަންފުޅުގައި އިޙްލާސްތެރިކަމާއެކު ތަޢުޒިޔާ ދަންނަވަމެވެ. pic.twitter.com/OCi8tKoUPh
— People's Majlis (@mvpeoplesmajlis) December 14, 2021
ހުސައިން އަވަހާރަވުމާއި ގުޅިގެން ރައްޔިތުންގެ މަޖިލީހުގެ މެންބަރުންނާއި ސިޔާސީ ގޮތުން އެކުގައި މަސައްކަތް ކުރެއްވި ބޭފުޅުންނާއި ސަރުކާރުގެ އިސްވެެރިން ގެންދަވަނީ ތައުޒިޔާ ވިދާޅުވަމުންނެވެ.
ހުސައިން ވަހީދުގެ ދުނިޔޭގައި ތިއްބެވީ ތިން ބޭފުޅެކެވެ. އެއީ ފިރިހެން ބޭފުޅަކާއި ދެ އަންހެން ބޭފުޅެކެވެ. ހުސެއިން ވަހީދުގެ އަނބިކަނބަލުންވެސް ދުނިޔޭގައި އެބަ ހުންނެވިއެވެ.
ހުސެއިން ވަހީދުވަނީ 17 ވަނަ ރައްޔިތުންގެ މަޖިލީހަށްވެސް އިންތިޚާބު ވެވަޑައިގެންފައެވެ.
އަޅުގަނޑު އެންމެ ފުރަތަމަވެސް ވަރަށް ގިނަ ދުވަސް ރާއްޖެއިން ބޭރުން ބޭސްފަރުވާއެއް ކުރުމަށްފަހު މިއަދު އަނެއްކާވެސް މިހިސާބަށް އައިސް ތިޔަ އެންމެބޭފުޅުންނާއި ބައްދަލުވެ އެއްޗެއް ބުނެލަން ލިބުމުން މާތްﷲ ސުބުހާނަހޫ ވަތަޢާލާގެ ހަޒުރަތަށް ޝުކުރު ކުރަން. އަދި ހަމައެއާއިއެކު އަޅުގަނޑު ބޭރުގައި ހޭދަކުރި ދުވަސްތަކުގައި އަޅުގަނޑުގެ ވަރަށް ގާތް ރައްޓެހިންނާއި، ދާއިރާގެ އެކިއެކި ރައްޔިތުންނާއި، ހެޔޮއެދޭ އެތައް މެމްބަރުންނެއް އަޅުގަނޑަށް ގުޅައި ހާލުބަލަމުން ދިޔަ ކަމަށްޓަކައި އުފާކޮށް އެންމެ ބޭފުޅުންނަށް ޝުކުރު ދަންނަވަން. އަދި އަޅުގަނޑަށް ހެޔޮ ދުޢާ ކޮށްދެއްވި އަދި ހެޔޮ ދުޢާކޮށްދެއްވަމުންދާ ހުރިހާ އަހުންނާއި އުހުތުންނަށް ހިތުގެ އެންމެ އަޑިން ޝުކުރު ދަންނަވަން.
– މާރިޗު 29 ގެ ޖަލްސާގައި ހުސެއިން ވަހީދު ވިދާޅުވިއެވެ.
