ކެންސަރުގެ އާލާސްކަންފުޅަށް ފަރުވާ ހޯއްދަވަމުން ގެންދަވަނިކޮށް ރޭގެ ދަންވަރުގެ ވަގުތެއްގައި އަވަހާރަވި، ރައްޔިތުންގެ މަޖިލިހުގެ ކޮމަންޑޫ ދާއިރާގެ މެމްބަރު ހުސެއިން ވަހީދުގެ ޖަނާޒާގައި ރައީސް ސާލިހުއާއި ރައީސް ނަޝީދު ބައިވެރިވެ ވަޑައިގެންފިއެވެ. އަދި ހުސެއިންވަހީދުގެ ޖަނާޒާގައި ދެ ރައީސުން ބައިވެރިވެ ވަޑައިގެން، ދެބޭފުޅުންވެސް ވަނީ، ކަށު ނަމާދަށްފަހު ހުސެންއިން ވަހީދުގެ ސަންދޯކުގެ ކުރީގައި ތިއްބަވާ ސަންދޯއް އުފުލުމުގައި އެހީތެރިވެ ދެއްވާފައެވެ.
ރައްޔިތުންގެ މަޖިލިހުގެ އެމްޑީޕީއަށް ނިސްބަތްވާ މެމްބަރު، ހުސައިން ވަހީދު އަވަހާރަވީ ކެންސަރުގެ އާލާސްކަންފުޅަށް ފަރުވާ ހޯއްދަވަމުން ގެންދަވަނިކޮށް މިރޭ މެންދަމު 1:30 ހާއިރުކަމަށް މައުލުމާތު ލިބިފައި ވެއެވެ. ހުސެއިންވަނީދު ވަނީ ގިނަ ދުވަސްތަނެއް ވަންދެން ކެންސަރުގެ އާލާސްކަންފުޅަށް ފަރުވާ ހޯއްދަވަމުން ގެންދަވާތާފައެވެ.
މީގެ ކުރީން ދުބާއީގައިވެސް ހުސައިން ކެންސަރުގެ އާލާސްކަންފުޅަށަ ފަރުވާ ހޯއްދަވާފައި ވާއިރު، އަވަހާރަވެފައ ވަނީ ހާލުކޮޅު ވަރަށް ބޮޑަށް ގޯސްވުމާއި ގުޅިގެން އޭޑީކޭގައި ފަރުވާ ހޯއްދަވަމުން ގެންދަވަނިކޮށެވެ. ފާއިތުވެދިޔަ ދޮޅު އަހަރެއްހާ މުއްދަތުގައު ކެންސަރުގެ އާލާސްކަންފުޅުގެ ފަރުވާއަށް ހުސެއިންވަހީދު ވަނީ ރާއްޖެއިން ބޭރުގައި ހުންނަވާފައެވެ. ފަރުވާއަށް ރާއްޖެއިން ބޭރުގައި ހުންނެވުމަށްފަހު ހުސެއިން ވަހީދުވަނީ މިއަހަރު މާޗްމަހު އޮތް ރައްޔިޔުންގެ މަޖިލިހުގެ ޖަލްސާއެއްގައި ބައިވެރިވެ ވަޑައިގެންފައެވެ.
ހުސައިން އަވަހާރަވުމާއި ގުޅިގެން ރައްޔިތުންގެ މަޖިލީހުގެ މެންބަރުންނާއި ސިޔާސީ ގޮތުން އެކުގައި މަސައްކަތް ކުރެއްވި ބޭފުޅުންނާއި ސަރުކާރުގެ އިސްވެެރިން ގެންދަވަނީ ތައުޒިޔާ ވިދާޅުވަމުންނެވެ.
ހުސައިން ވަހީދުގެ ދުނިޔޭގައި ތިއްބެވީ ތިން ބޭފުޅެކެވެ. އެއީ ފިރިހެން ބޭފުޅަކާއި ދެ އަންހެން ބޭފުޅެކެވެ. ހުސެއިން ވަހީދުގެ އަނބިކަނބަލުންވެސް ދުނިޔޭގައި އެބަ ހުންނެވިއެވެ.
ހުސެއިން ވަހީދުވަނީ 17 ވަނަ ރައްޔިތުންގެ މަޖިލީހަށްވެސް އިންތިޚާބު ވެވަޑައިގެންފައެވެ.
ހުސެއިން ވަހީދުގެ ޖަނާޒާ ބޭއްވިފައި ވަނީ މިއަދުގެ މެންދުރު ނަމާދަށްފަހު އިސްލާމީ މަރުކަޒުގައެވެ. ޖަނާޒާގައި ރައްޔިތުންގެ މަޖިލިހުގެ މިހާރުގެ މެމްބަރުންނާއި ކުރީގެ މެމްބަރުންގެ އިތުރު ހެޔޮ އެދިވަޑައިގަންނަވާ ގިނަ ބަޔަކު ބައިވެރިވެފައި ވެއެވެ.
