ނިމިދިޔަ 2018ވަނަ އަހަރު ބޭއްވުނު ރިޔާސީ އިންތިޚާބުގައި، ރައްޔިތުންނާއި ހަމައަށް ވޯޓުގެ ނަތީޖާ ގެނެސްދީފައިވަނީ އެއްވެސް އޮޅުމާލުމެއްނެތި ރައްޔިތުން ވޯޓުލީ ގޮތަށް ކަމުގައި އިލެކްޝަންސް ކޮމިޝަންގެ ކުރީގެ ނައިބް ރައީސް އަހުމަދު އަކްރަމް ވިދާޅުވެއްޖެއެވެ.

2018ގެ ރިޔާސީ އިންތިޚާބު އޮޅުވާލާފައިވާކަމަށް އިދިކޮޅު ފަރާތްތަކުން އަނެއްކާވެސް ގިނަ ތުހުމަތުތަކެއް ކުރަމުންދާ މިދަނޑިވަޅުގައި އިންތިޚާބާއިމެދު އަނެއްކާވެސް ވަނީ ސުވާލު އުފެދޭނެ ކަންތައްތަކެއް ފެންމަތި ވެފައެވެ. މިނިދިޔަ 2018ގެ ރިޔާސީ އިންތިޚާބުގައި ވޯޓު އޮޅުވާލައި އިންތިޚާބުގައި މަކަރު ހަދާފައިވާކަން ހާމަވާ ގިނަ ކަންތައްތަކެއް ހިމެނޭ ފުލުހުންގެ ރިޕޯޓެއްވެސް އިއްޔެ ވަނީ އާންމު ވެފައެވެ.

އިންތިޚާބުގައި އޮޅުވާލައި މަކަރު ހެދިކަށް މިރިޕޯޓުން ވަނީ ހާމަވެފައެވެ. 2018ގެ އިންތިޚާބާއި ގުޅިގެން ދެކެވޭ ވާހަތަކަށް ޖަވާބު ދެއްވަމުން ޖިންސީ ފުރައްސާރައިގެ މައްސަލަތަކެއް މަޖިލީހުންގެ ކޮމިޓީން ބަލަމުން ދަނިކޮށް، ކޮމިޝަންގެ މެމްބަރުކަމުން އަމިއްލަފުޅަށް އިސްތިއުފާ ދެއްވި އަކްރަމް ވިދާޅުވީ އިންތިޚާބުގައި އެއްވެސް އޮޅުވާލުމެއް އޮޅުވާލާފައި ނުވާނެކަމަށެވެ. ކޮންމެ ކަމަކީވެސް އެކަމެއްގެ ހަގީގަތް އެނގޭނެ ކަމެއް ކަމަށާއި، އަދި އެދުވަހަކުން އެކަމެއް ސާފުވާނެކަމަށެވެ.

އަނެއްކާވެސް 2018ގެ ރިޔާސީ އިންތިހާބުގެ ވާހަކަ ތަކެވެ. ﷲ ގަންދީ ބުނަމެވެ. އެއިންތިހާބުގެ ނަތީޖާ ރައްޔިތުންނަށް ފޯރުކޮށްދިނީ ބަދަލު ކުރުމަކާއިނުލާ، ރައްޔިތުން ވޯޓުލީ ގޮތަށެވެ. ދުލާއި ​ގަލަމުގެ ​ބޭނުން ތެދު ގޮތުގައި ނޫނީ ނުހިފާށެވެ. ﷲގެ އަޒާބަށް ބިރުވެތިވާށެވެ.

– އަކްރަމް ވިދާޅުވިއެވެ.

ނިމިދިޔަ ރިޔާސީ އިންތިޚާބުގައި އޮޅުވާލުންތަކެއް ހުރި ކަމަށްބުނެ ޕީޕީއެމްގެ ރިޔާސީ ކެނޑިޑޭޓް ރައީސް ޢަބްދުﷲ ޔާމީން ޢަބްދުލްޤައްޔޫމްގެ ފަރާތްޕުޅުން ހުށަހެޅުއްވި ދުސްތޫރީ މައްސަލަ ބެއްލެވުމަށްފަހު، އިންތިޚާބުގެ ނަތީޖާއަށް ބަދަލު އަންނަ ވަރުގެ އެއްވެސް ކަމެއް ހިނގާފައިނުވާ ކަމަށް ކަނޑައަޅައި އިންތިޚާބު ބާތިލް ނުކުރާ ގޮތަށް ސުޕްރީމް ކޯޓުން ވަނީ ކަނޑައަޅާފައެވެ. އަދި ފުލުހުންނާއި ސިފައިން މެދުވެރިކޮށް އިންތިޚާބުގައި ހިނގާފައިވާ ކަންކަން ތަޙްޤީގު ކޮށްދިނުމަށް މައްސަލަ ހުށަހެޅުއްވި ފަރާތުން އެދިފައިވީ ނަމަވެސް އެކަން އެގޮތަށް ތަޙްޤީގް ކޮށްދޭން ޖެހޭ އެއްވެސް ސަބަބެއް ނެތް ކަމަށް ސްޕްރީމް ކޯޓުންވަނީ އޭރު ކަނޑައަޅާފައެވެ.

ރިޔާސީ އިންތިޚާބު ބޮޑު ތަފާތަކުން ކާމިޔާބުކޮށްފައިވަނީ އެމްޑީޕީގެ ރިޔާސީ ކެނޑިޑޭޓް އަދި އޭރުގެ ރައްޔިތުންގެ މަޖިލީހުގެ ހިންނަވަރު ދާއިރާގެ މެމްބަރު އިބްރާހީމް މުޙައްމަދު ޞާލިޙެވެ. ރަސްމީ ނަތީޖާ ދައްކާގޮތުން ޕީޕީއެމްގެ ރިޔާސީ ކެނޑިޑޭޓް ރައީސް ޢަބްދުﷲ ޔާމީން ޢަބްދުލްޤައްޔޫމަށް ލިބިވަޑައިގެންފައިވަނީ 96،052 ވޯޓެވެ. އަދި އެމްޑީޕީގެ ކެނޑިޑޭޓް އިބްރާހީމް މުޙައްމަދު ޞާލިޙަށް ލިބިވަޑައިގެންފައިވަނީ 134،705 ވޯޓެވެ.

އިންތިޚާބާއިމެދު މިއަދު ގިނަ ސުވާލުތަކެއް އުފައްދަމުންދާއިރު، އޭގެ މާބޮޑު ހަގީގަތެއް އަދާއި ހަމަޔަށްވެސް ނޭގެއެވެ. އިންތިޚާބަކީ ޞައްޚަ އިންތިޚާބެއްކަމަށް އިލެކްޝަސް ކޮމިޝަނުން ބުނަމުންދާއިރު، ރޭ ރައީސް ޔާމީން ދެއްކެވި ވާހަތަކާއި ގުޅިގެން އިންތިޚާބުގެ ނަތީޖާއާއިމެދު އިދިކޮޅު ފަރާތްތަކުން އުފައްދަމުންދިޔަ ސުވާލުތަކައް މިވަނީ އަނެއްކާވެސް އިތުރު ބަހުސްއަކަށް ގޮސްފައެވެ.