މިއަދު ފާހަގަކުރަމުން މިދާ 41 ވަނަ މަސްވެރިންގެ ދުވަހާ ގުޅުވައިގެން ތ. އަތޮޅުގެ ގިނަ ރަށްތަކެއްގެ މަސްވެރިންނާ އެމްއެންޕީގެ ލީޑަރޝިޕުން ބައްދަލުކުރައްވައިފިއެވެ.

މިބައްދަލުވުމުގައި އެމްއެންޕީގެ މެނިފެސްޓޯ އެކުލަވާލުމުގައި މަސްވެރިކަމުގެ ޞިނާޢަތުގައި ފޯކަސްކުރާނެ ކަންކަން އެމްއެންޕީގެ ރައީސްވަނީ މަސްވެރިންނާ ޚިއްޞާކޮށްފައެވެ. މިއަދު ބޭއްވުނު ބައްދަލުވުމުގައި ތ. އަތޮޅުގެ 5 ރަށަކުން މަސްވެރިން ވަނީ ބައިވެރިވެފައެވެ. އެއީ ތިމަރަފުށި، އޮމަދޫ، ވަންދޫ، ވޭމަންޑޫ އަދި ވިލުފުއްޓެވެ.

މިއަދު ތިމަރަފުށީ ބަނދަރު ސަރަހައްދުގައި ބޭއްވުމަށް ހަމަޖެހިފައި އޮތް ބައްދަލުވުން މޫސުން ތަންނުދިނުމުގެ ސަބަބުން ބޭއްވީ ސްޓޭ މިކަޑޯ ރެސްޓޯރަންޓްގައެވެ. މިބައްދަލުވުމުގައި އެމްއެންޕީގެ ރައީސް ކާނަލް (ރޓޑ) މުޙައްމަދު ނާޒިމް ދެއްކެވި ވާހަކައިގައި މަސްވެރިންނަށާއި މިޞިނާޢަތަށް ދިމާވެފައި ގޮންޖެހުންތައް ހައްލުކުރުމަށް އެމްއެންޕީން އަމާޒު ހިފާނެ ކަންކަމަށް ވަނީ އަލިއަޅުވާލާފައެވެ. އެގޮތުން މަސްވެރިކަމުގެ އިޤްތިޞާދީ ނަފާވެރިކަން އިތުރުކުރުމުގެ ގޮތުން މަސް ގަންނަ ރޭޓް -/20 އަށްވުރެ ދަށް ނުވާނެގޮތަކަށް ކަންކަން ބައްޓަންކުރުން ފާހަގަކޮށްލެވެއެވެ.

މަސްވެރިންގެ ހުރި ކަންބޮޑުވުންތަކާ ބެހޭ ގޮތުން ވާހަކަދައްކަމުން އެމްއެންޕީގެ ރައީސް ދެއްކެވި ވާހަކައިގައި ސަރުކާރުން އެމްޓީސީސީ މެދުވެރިކޮށް އިންޖީނު ދޫކުރާ ބީދައިން މަސްވެރިންނަށް ރެފްރިޖެރޭޓެޑް ސީވޯޓަރ ސިސްޓަމް (އާރުއެސްޑަބްލިއު) ފަސޭހައިން ލިބޭނެ އިންތިޒާމް ހަމަޖައްސައި ދިނުމާއި، މަސްވެރިންނަށް ޕެންޝަން އަދި އިންޝުއަރަންސް ސްކީމެއް ގާއިމްކުރުމަށް އެމްއެންޕީގެ މެނިފެސްޓޯގައި ހިމަނާނެ ކަމަށެވެ. އަދި ޒަމާނީ ޓެކްނޮލޮޖީ މަސްވެރިކަމުގައި ބޭނުންކުރުން އިތުރުކުރުމަށް ބާރުއަޅުއްވާނެ ކަމުގައިވެސް ދެންނެވިއެވެ.

އޭގެ އިތުރުން މަސްވެރިކަމުގެ ޞިނާޢަތް ކުރިއަރުވަން އެމްއެންޕީގެ މެނިފެސްޓޯގައި ހިމެނުމަށް ނިންމާފައިވާ ކަންކަމުގެ ތެރޭގައި މަސްވެރިކަމަށް ހާއްސަ އެން ނުވަތަ ބެއިޓް ފިޝަރީޒް އިންޑަސްޓްރީއެއް ގާއިމްކުރުމާއި މަސް ކިރުވުމަށް ހުރި ދަތިތަކަށް ހައްލުކުރުމަށްޓަކާ ފްލޯޓިންގ ފިޝް ފެކްޓްރީތަކެއް ރާއްޖޭގެ އެކި ސަރަހައްދުތަކުގައި ޤާއިމްކުރުން ހިމެނެއެވެ. އަދި ތަޢުލީމީ ސެޓްފިކެޓްތަކާ އެއްފަދަ މަސްވެރިކަމުގެ ދާއިރާގެ ސްކިލްޑް ބޭސްޓް ސެޓްފިކެޓް ޕްރޮގްރާމެއް ގާއިމްކޮށް، މަސްވެރިން ރެޖިސްޓަރކޮށް ގްރޭޑް ކުރެވޭނެ ނިޒާމެއް ގާއިމްކުރުންވެސް މިކަންކަމުގެ ތެރޭގައި ހިމެނޭކަމަށް އެމްއެންޕީގެ ރައީސްގެ ވާހަކަފުޅުގައި ފާހަގަކުރެއެވިއެވެ.

އެމްއެންޕީގެ ލީޑަރޝިޕް ތ.އަތޮޅަށް ކުރާ މިދަތުރަކީ އެމްއެންޕީގެ މެނިފެސްޓޯ އެކުލަވާލުމަށްޓަކައި ވީހާވެސް ގިނަ ރައްޔިތުންގެ ޚިޔާލާއި ބައިވެރިވުން އޮވެގެން ކުރާ މަސައްކަތަކަށް ހަދައި، ތ.އަތޮޅުގެ ރަށްރަށުގެ ބައެއް ކަންކަމުގައި ރައްޔިތުންގެ ޚިޔާލު ހުރިނެތް ގޮތް އޮޅުންފިލުވުމެވެ. އަދި މިމެނިފެސްޓޯ އެކުލަވާލުމުގެ މަސައްކަތުގައި ކުރިޔަށް އޮތް ދުވަސްތަކުގައި ރާއްޖޭގެ ގިނަ އަތޮޅުތަކަކަށް އެމްއެންޕީގެ ޓީމުތައް ދިއުމަށް ވަނީ ރޭވިފައެވެ.