ރާއްޖޭގެ މަސްވެރިންގެ ހުރި ކަންބޮޑުވުންތަކާއި، މައްސަލަތަކަށް ހައްލު ގެނެސް ދެއްވާނެކަމުގެ ޔަގީންކަން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
މަސްވެރިންގެ ދުވަސް ފާހަގަ ކުރުމަށްޓަކައި، މިއަދު ކ.ގާފަރަށް ކުރެއްވި ދަތުރުފުޅުގައި، ބޮޑު ކަންނެލި މަސްވެރިންގެ ޔޫނިއަންއިން އިންތިޒާމު ކޮށްގެން ބޭއްވި ޝުއޫރު ފާޅުކުރުމުގައި ރައީސުލްޖުމްހޫރިއްޔާ ވަނީ ބައިވެރިވެ މަސްވެރިންނާއި މުޚާތަބު ކުރައްވައި ވާހަކަ ދައްކަވާފައެވެ.
އެމަނިކުފާނުވަނީ މަސްވެރިންގެ ކަންބޮޑުވުންތައް ހައްލު ކޮށްދެއްވާނެކަމަށް ވިދާޅުވެފައެވެ. އަދި ސަރުކާރުން މަސައްކަތް ކުރަމުންދަނީ މިހާރުވެސް ހުރި މައްސަލަތަކަށް ދާއިމީ ހައްލުތަކެއް ހޯދައި ދިނުމަށްކަމަށާއި، އެކަން ސަރުކާރުން ކުރައްވާނެކަމަށެވެ.
މިއަދު ބޭއްވުނު މު މުޒާގައި މަސްވެރިން ވަނީ 4 ހުށަހެޅުމެއް ސަރުކާރަށް ހުށަހަޅާފައެވެ. އެ ހުށަހެޅުންތަކަކީ:
- މިފްކޯއަށް ބޮޑު ކަންނެލި ކިރުން
- މަސް ވިއްކޭނެ އިތުރު ގައުމުތަކަށް މާރކެޓް ފުޅާކުރުން
- ބާނާ މަސް ތާޒާކަންމަތީ ދަމަހައްޓާ ކޮލިޓީ ހިފެއްޓުމަށް ބޭނުންވާ އައިސް ލިބޭނެ އިތުރު 18 އައިސް ޕްލާންޓް ގާއިމް ކުރުން
- މާލޭ ސަރަހައްދުގައި ބަނދަރު ކުރެވޭނެ އިންތިޒާމް އެޗްޑީސީ އާއި ގުޅިގެން ރޭވުން
ބޮޑު ކަންނެލި މަސްވެރިންގެ ޔޫނިއަންއަކީ މަސްވެރިންގެ ހައްގުތައް ކަށަވަރުކޮށް ދިނުމަށް ގިނަ މަސައްކަތްތަކެއް ކުރަމުންދާ ޔޫނިއަނެކެވެ.
En route to Gaafaru Island, President @ibusolih dropped by a fleet of fishing vessels to speak with the fisherfolk and listen to their concerns. https://t.co/TMqGXFws1n
— Bodu Kanneli Masveringe union- BKMU (@FishermensUnion) December 10, 2021
މި އަހަރު ރާއްޖޭގައި ފާހަގަކުރަމުންދާ 41 ވަނަ މަސްވެރިންގެ ދުވަސް ފާހަގަކުރުމަށް ބާއްވާ ޙަރަކާތްތަކުގައި ބައިވެރިވެ ވަޑައިގެންނެވުމަށް ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙް މާލެއަތޮޅު ގާފަރަށް ވަޑައިގަތީ މިއަދު މެންދުރު ފަހުއެވެ.
ރައީސުލްޖުމްހޫރިއްޔާގެ 2 ދުވަހުގެ މި ދަތުރުފުޅުގައި، ގާފަރުގައި ސަރުކާރުން ޤާއިމުކޮށްފައިވާ 25 ޓަނުގެ އައިސް ޕްލާންޓް ރަސްމީގޮތުން ހުޅުވައިދެއްވުމަށާއި، ދެ ޖިންސުގެ ބޭފުޅުންނަށް އަމާޒުކޮށްގެން ބާއްވަވާ މަސްކެނޑުމުގެ މުބާރާތް ޝަރަފުވެރި ކޮށްދެއްވުމަށާއި، ފިޝަރީސް އެކްސްޕޯ ބައްލަވާލެއްވުމަށް ވަނީ ހަމަޖެހިފައެވެ. މީގެ އިތުރުން، މަސްވެރިންގެ ދުވަސް ފާހަގަކުރުމުގެ ގޮތުން މިރޭ ގާފަރުގައި ބާއްވަވާ ރަސްމީ ޖަލްސާ ރައީސުލްޖުމްހޫރިއްޔާ ޝަރަފުވެރިކޮށްދެއްވާނެއެވެ. އެމަނިކުފާނުގެ އަރިހުގައި ރައީސުލްޖުމްހޫެރިއްޔާގެ ނައިބު ވެސް މި ޙަރަކާތްތަކުގައި ބައިވެރިވެވަޑައިގަންނަވާނެއެވެ. އަދި، ރައީސުލްޖުމްހޫރިއްޔާގެ ނައިބު ވަނީ ގާފަރު ބަނދަރު ސަރަޙައްދުގައި ޤާއިމްކޮށްފައިވާ މޮނިއުމެންޓް ހުޅުއްވައިދެއްވުމަށް ވެސް ހަމަޖެހިފައެވެ.
ރައީސުލްޖުމްހޫރިއްޔާގެ މި ދަތުރުފުޅުގައި، ގާފަރުގައި ޤާއިމްކޮށްފައިވާ ޕޮލިސް ޕޯސްޓަށް ޒިޔާރަތްކުރެއްވުމަށާއި، ގާފަރު ކައުންސިލާއި އަންހެންނުންގެ ތަރައްޤީއަށް މަސައްކަތްކުރާ ކޮމިޓީއާ ބައްދަލުކުރެއްވުމަށް ވެސް ހަމަޖެހިފައި ވެއެވެ. އެމަނިކުފާނުގެ އަރިހުގައި ރައީސުލްޖުމްހޫރިއްޔާގެ ނައިބު ވެސް ބައިވެރިވެވަޑައިގަންނަވާނެއެވެ.
ކޮންމެ އަހަރެއްގެ ޑިސެންބަރު މަހުގެ 10 ވަނަ ދުވަހަކީ، ދިވެހިރާއްޖޭގެ މަސްވެރިންގެ ދުވަހުގެ ގޮތުގައި ފާހަގަކުރަމުން އަންނަ ދުވަހެވެ.
