ރާއްޖޭގައި މިއަދު ފާހަގަކުރަމުންދާ މަސްވެރިންގެ ދުވަހު، ދިވެހި އެންމެގައި މަސްވެރިންނާއި، އޮޑިވެރިންނަށް ސަރުކާރުން ވެފައިވާ ވައުދުތައް ފުއްދުމަށް ޕީޕީއެމްގެ ނައިބް ރައީސް މުހައްމަދު ޣައްސާން މައުމޫން ސަރުކާރަށް ގޮވާލައްވައިފިއެވެ.

މަސްވެރިންގެ ދުވަހަކީ ކޮންމެ އަހަރެއްގެ ވެސް ޑިސެމްބަރު މަހުގެ 10ވަނަ ދުވަހެވެ. މިދުވަސް އާންމު ގޮތެއްގައި ވަކި ރަށެއް ކަނޑައަޅައި ކުލަގަދަކޮށް ކޮންމެ އަހަރަކުވެސް ފާހަގަ ކުރެއެވެ. މިއަހަރުގެ މަސްވެރިންގެ ދުވަސް ފާހަގަ ކުރުން އޮތީ ކ.އަތޮޅު ގާފަރުގައެވެ.

މަސްވެރިންގެ ދުވަހުގެ ތަހުނިޔާ ދިވެހި މަސްވެރިންނަށް ފޮނުވައި ޣައްސާން ވިދާޅުވީ ދިވެހި މަސްވެރިން ރެއާއި ދުވާލު ކުރަމުންދާ ބުރަ މަސައްކަތުގެ އަގު ވަޒަން ކުރަންޖެހޭކަމަށެވެ. ދިވެހި މަސްވެރިންނަށް ސަރުކާރުން ވެފައިވާ ވައުދުތައް މިއަދު ހަދާން ނައްތާ ނުލައި އެވައުދުތައް ފުއްދުމަށް ޣައްސާން ވަނީ ސަރުކާރަށް ގޮވާލާފައެވެ

މަސްވެރިންގެ ދުވަހުގެ ތަހުނިޔާއާއި ހެޔޮއެދުން ދިވެހި ފަޚުރުވެރި މަސްވެރިންނަށް އަރިސް މިކުރަނީ، ތިޔަ ކުރައްވާ މިންނެތް، ބުރަ، ޝަރަފްވެރި މަސައްކަތަށް ހިތުގެ އުމުގުން ލޯތްބާއިއެކު ޝުކުރު ބަރުތީލަ ކުރަމުން. މަސްވެރިންނަށް ވީ ވައުދުތައް ފުއްދުމަށް ސަރުކާރަށް އިލްތިމާސްކުރަން.

– ޣައްސާން ވިދާޅުވިއެވެ.

ރާއްޖޭގެ މަސްވެރިންނަށް ސަރުކާރުން ވެފައިވާ ވައުދުތައް ނުފުއްދި މިދިޔަ 3 އަހަރުގައި ކަނޑުމަތީގައާއި ރަށްރަށުގައިވެސް މަސްވެރިން ވަނީ މުޒާހަރާކޮށްފައެވެ. މަސްވެރިންގެ އެންމެ ބޮޑު ޝަކުވާއަކީ ބާނާ މަހަށް ހަމަ އަގުނުލިބުމާއި، މަސްކޮޅު ނުކިރި އުކާލަން ޖެހުމެވެ. މިމައްސަލަ ހައްލުކޮށް ދެއްވާނެކަމަށް ސަރުކާރުން ތަކުރާރުކޮށް ވައުދުވަމުން ދިޔަ ނަމަވެސް މާ އެދެވޭ ނަތީޖާ އަކާއި ހަމައަށް އާދެވޭ ގޮތެއް ވަނީ ނުވެފައެވެ.

މިސަރުކާރުން ވެރިކަމަށް އައީ މަސްވެރިންނަށް މަހުން ލިބޭ މަންފާ ބޮޑުކޮށް މަހުގެ އަގު 35 ރުފިޔާއަށް ބޮޑު ކޮށްދޭނެކަމަށް ވައުދާއިއެކުގައެވެ. ނަމަވެސް މިއަދު 11 ރުފިޔާއަށް ވެސް ނުކިރޭކަމީ ފެންނަން އޮތް ހަގީގަތްކަމަށް މަސްވެރިން ދަނީ ބުނަމުންނެވެ. މީގެ އިތުުރުން ރަށްރަށުގައި ހަދަން ބުނި ގޭދޮށު މަސް ފެކްޓްރީތަކާއި، ކަނޑުމަތީގައި ބަހައްޓަންބުނި މަސްވެރިންގެ ޖަގަހަތައް ދައުރުގެ 3 އަހަރު ނިމިގެން ދިޔަ އިރުވެސް ތަންފީޒު ވެފައި ނުވެއެވެ.