މާލެ ސިޓީ ކައުންސިލްގެ އިހްތިޞާސްގައި ހިމެނޭ ކަންކަމުގެ ތެރެއަށް އެއްވެސް ބަޔަކަށް އަރައި ނުގަނެވޭނެ ކަމުގައި މާލެ ސިޓީ ކައުންސިލްގެ މޭޔަރު ޑރ.މުހައްމަދު މުއިއްޒު ވިދާޅުވެއްޖެއެވެ.
މާލެ ސިޓީ ކައުންސިލުން މިއަދު ބޭއްވި ނޫސްވެރިންގެ ބައްދަލުވުމުގައި މުއިއްޒު ވިދާޅުވީ ލާމަރުކަޒީ ޤާނޫނުން މާލެ ސިޓީ ކައުންސިލުގެ އިހުތިޞާސްގައި ހިމެނޭ ކަންކަމަށް އެއްވެސް ބަޔަކަށް އަރައި ނުގަނެވޭނެކަމަށެވެ. މާލެ ސިޓީ ކައުންސިލުގެ އިޚްތިޞާސްގައި ހިމެނޭ ކަންކަމުގެ ތެރެއަށް އަރައި ގަތުމަށް އެއްވެސް ބަޔަކަށް ކުރިއަށް އޮތް ތަނުގައި ފުރުސަތު ނުދެވޭނެކަމަށް މުއިއްޒު ވިދާޅުވިއެވެ.
އަޅުގަނޑުމެން ނެތިން އެއްވެސް ކަމެއްގައި ދެން ކުޑަކަކޫ ޖަހާކަށް. އަޅުގަނޑުމެންނަށް މިސަރުކާރުން އެއްވެސް ކަމެއްގައި އެއްބާރުލުން ނުދިން. ރައީސުލްޖުމްހޫރިއްޔާ އަޅުގަނޑާއި ބައްދަލުކޮށް ދެއްކި އެއްވެސް ވާހަކައަކަށް އަމަލީ ސިފައެއް ނައި. ހުރިހާކަމަށް އަޅަނީ ހުރަސް.
– މުއިއްޒު ވިދާޅުވިއެވެ.
މާލެ ސިޓީ ކައުންސިލުން މަސައްކަތް ކުރާނީ ޤާނޫނީ އިމުގެ ތެރެއިން ކުރަންޖެހޭ ކަންކަން ކުރުމަށް ކަމަށް މުއިއްޒު ވިދާޅުވިއެވެ. މާލެ ސިޓީ ކައުންސިލުން ކަންކަން ނިންމަމުންދަނީ ކައުންސިލްގައި ހިމެނޭ އެމްޑީޕީގެ މެމްބަރުންގެވެސް ބައިވެރިވުމާއިވެސް އެކުގައި ކަމަށާއި، ޤާނޫނާއި ޚިލާފް އެއްވެސް ނިންމުމެއް މާލެ ސިޓީ ކައުންސިލުން ނުނިންމާނެކަމަށް މުއިއްޒު ވިދާޅުވިއެވެ.
މާލެ ސިޓީ ކައުންސިލްގެ ހުރިހާވެސް އަމާޒަކީ މާލޭގެ ރައްޔިތުންނަށް ދިމާވާ ދަތިތަކަށް ހައްލު ހޯދުންކަމަށާއި، މާލެތެރޭގައި ހުރި އެކި މައްސަލަތައް ހައްލު ކުރުމުގައި ކިތަންމެ ބޮޑެތި ދަތިތަކެއް ކުރިމަތި ކުރިނަމަވެސް އެކަމަށް ބެލުމެއްނެތި މަސައްކަތް ކުރާނެކަމަށެވެ. އެގޮތުން މާލޭގެ ރައްޔިތުންނަށް ބޭނުންވާ ބޯހިޔާވަހިކަން ފަހިކޮށް ދިނުމަށް މަސައްކަތް ކުރައްވާނެކަމަށާއި، މަޤާމާއި ހަވާލުވި ދުވަހުން ފެށިގެން އެމަސައްކަތް އެއްވެސް ހުއްޓުމެއްނެތި ކުރަމުންދާކަމަށެވެ.
މާލެ ސިޓީ ކައުންސިލުން ކުރިއަށް އޮތް ތަނުގައިވެސް އިސްކުރާނީ ރައްޔިތުންގެ މަސްލަހަތު ކަމަށާއި، ސަރުކާރުން ކިތަންމެ ހުރަސްތަތަކެއް ކުރިމަތި ކުރިނަމަވެސް ކޮށްގެންތިބި ހުވައާއި ޚިލާފަށް އެއްވެސް ކަމެއް ނުކުރައްވާނެކަމަށް މުއިއްޒު ވިދާޅުވިއެވެ.
