ސަރުކާރާއި ރައްޔިތުންނާއި ޖައްސަން މަސައްކަތް ކުރާ މީހުން މަޤާމުތަކުގައި ތިބުމަކީ ކަންބޮޑުވާ ކަމެއްކަމުގައި ޓްރޭޑް ޔޫނިއަންގެ ނައިބް ރައީސް ސައުދުﷲ އަހުމަދު ވިދާޅުވެއްޖެއެވެ.
ސަރުކާރުގެ ބައެއް މަޤާމުތަކުގައި ތިއްބެވި ބޭފުޅުންނާއި، ޚާއްސަކޮށް ވަޒީރުންގެ ނިވަލުގައި ތިބެ ސަރުކާރާއި ރައްޔިތުން ޖައްސަން ބައެއް ބޭފުޅުން މަސައްކަތް ކުރާކަމަށްބުނެ ސައުދު ކުރެއްވި ޓުވީޓުގައި ވިދާޅުވީ މިފަދަ ބޭފުޅުން މަޤާމުތަކުގައި ބޭތިއްބުމަކީ ކަންބޮޑުވާ ކަމެއްކަމަށެވެ.
ސަރުކާރުގެ ބައެއް ކުންފުނިތަކާއި، ބޯޑުތަކުގައިވެސް މިފަދަ މީހުން ތިބިކަން ފާހަގަކޮށް، ސައުދު ވިދާޅުވީ ސަރުކާރާއި ރައްޔިތުން ޖައްސަން ބައެއް ފަރާތްތަކުން މަސައްކަތް ކުރަމުންދާކަމަށެވެ. މިފަދަ ބޭފުޅުން ސަރުކަރުގެ މަޤާމުތަކުގައި ބައިތިއްބައިގެން ގެއްލުންވަނީ ރައްޔިތުންނަށް ކަމަށާއި، އެފަދަ މީހުން މަޤާމުތަކުން ވަކި ކުރުމަކީ ކޮންމެހެން ކުރަންޖެހޭ ކަމެއްކަމަށް ސައުދު ވިދާޅުވިއެވެ.
ރައީސް ޞާލިހު ވެރިކަމުގައި މި ސަރުކާރުގެ ބައެއް ވަޒީރުން ނިވަލުގައި ތިބެގެން ސަރުކާރާއި ރައްޔިތުންނާއި ޖައްސަން މަސައްކަތް ކުރާ ފަރާތްތައް މަޤާމުތަކުގައި ތިބުމަކީ ކަންބޮޑުވާކަމެއް. އަދި ބައެއް ސިޔާސީ މަޤާމުތަކާއި، ކުންފުނިތަކުގެ ބޯޑު ތަކުން ދަނީ ވެރިކަމާއި ރައްޔިތުން ޖައްސަމުން.
– ސައުދު ވިދާޅުވިއެވެ.
ސަރުކާރުގެ އެތެރޭގައި ރައީސް ނަޝީދާއި، ރައީސް ޞާލިހަށް ތާއީދު ކުރައްވާ ފަރާތްތަކާއި އަދި ކޯލިޝަންގެ އެކި ބޭފުޅުންގެ ބައިވެރިވުމާއިއެކު ހިންގަމުންދާ ވެރިކަމުގައި ބޮޑެތި ޚިޔާލު ތަފާތުން ދަނީ ކުރިމަތިވަމުންނެވެ. ޚާއްސަކޮށް ސަރުކާރުގެ އެކި މަޤާމުތަކުގައި ތިއްބެވި ބޭފުޅުންގެ ތެރެއިން ބައެއް ބޭފުޅުންނާއި ރައްޔިތުންނާއި ގުޅުންކުޑަވެ ޚިޔާލު ތަފާތުން ވަނީ އުފެދިފައިވާކަމަށް ގިނަ ބަޔަކު ދަނީ ބުނަމުންނެވެ.
