އިދިކޮޅު ކޯލިޝަނުން ހުކުރު ދުވަހުގެރޭ ހުޅުމާލޭ ހިޔާ ފްލެޓް ސަރަހައްދުގައި ބޭއްވުމަށް މަސައްކަތް ކުރަމުންދާ ޖަލްސާއަށް މާލެ ސިޓީ ކައުންސިލުން ހުއްދަ ދީފައި ވަނިކޮށް ރަޔަޓް ފުލުހުން ޖަލްސާގެ ތައްޔާރީތަކަށް ހުރަސް އަޅަމުންދާތީ އެކަން ބަލައި ފުލުހުން ޖަވާބުދާރީ ކުރުވާނެކަމަށް މާލެ ސިޓީ ކައުންސިލްގެ މޭޔަރު ޑރ.މުއިއްޒު ވިދާޅުވެއްޖެއެވެ.

މާލެ ސިޓީ ކައުންސިލުގެ ހުއްދައާއިއެކު ޖަލްސާގެ ތައްޔާރީތައް އިދިކޮޅުން މިއަދު ހަވީރު ފެށުމާއިއެކު ރަޔަޓް ފުލުހުން ވަނީ އެސަރަހައްދަށް ގޮސް ޖަލްސަގެ ތައްޔާރީތައް ހުއްޓުވާފައެވެ. އަދި ފުލުހުން މިހާރުވެސް ގެންދަނީ އެސަރަހައްދުގައި ފޯރިމަރަމުންނެވެ.

ފުލުހުން ޖަލްސާއަށް ހުރަސް އަޅަމުންދާ މައްސަލާގައި މާލެ ސިޓީ ކައުންސިލްގެ މޭޔަރު ޑރ.މުއިއްޒު ވިދާޅުވީ ސިޔާސީ ޕާޓީއަކުން ހޯދަންޖެހޭ ހުއްދަ ހޯދައި ޖަލްސާއެއް ބާއްވަން ކުރަމުންދާ މަސައްކަތަށް ފުލުހުން ހުރަސް ޤާނޫނާއި ޚިލާފަށް ހިންގަމުންދާ ކަންކަން ބަލައި އެކަމުގައި ޤާނޫނީ ގޮތުން ޖަވާދަރީ ކުރުމަށް ކުރަންޖެހޭ މަސައްކަތް ކުރާނެކަމަށެވެ.

ކައުންސިލްގެ އިޙްތިޞާސްގެ ތެރޭގައިއޮންނަ ސަރަޙައްދެއްގައި ސިޔާސީޕާޓީއަކުން ޖަލްސާއެއް ބާއްވަން އެދުމުން، އެކަމަށް ކައުންސިލުން ދީފައިވާހުއްދަ ތަންފީޒުކުރުމަށް ފުލުހުން ހުރަސް އަޅުއްވަމުންދާތަން ފެންނަމުންދާތީ އެކަމުގައި ޕޮލިސް ޤާނޫނީގޮތުން ޖަވާބުދާރީ ކުރުވާނެކަމުގައި ދަންނަވަން.

– މޭޔަރު މުއިއްޒު ވިދާޅުވިއެވެ.

ޖަލްސާ ބޭއްވުމަށް ފުލުހުން ހުރަސް އަޅަމުންދާއިރު، އެޗްޑީސީން ބުނެފައިވަނީ މިޖަލްސާ ބާއްވާކަން އެނގިފައިވަނި މީޑިއާއިން ކަމަށެވެ. ހުޅުމާލޭގެ އެއްވެސް ސަރަހައްދެއްގައި އެއްވެސް ހަރަކާތެއް ބޭއްވޭނީ އެޗްޑީސީއަށް ލިޔުމުން ހުށަހަޅައިގެން ހުއްދަ ހޯދުމަށްފަހު އެޗްޑީސީން ކަނޑައަޅާ އުޞޫލުތަކެއްގެ ތެރެއިން މިކަމަށް ހާއްސަ ކުރެވިފައިވާ ވަކި ސަރަހައްދެއްގައި ކަމަށް އެކޯޕަރޭޝަނުން ވަނީ ބުނެފައެވެ.

އެޗްޑީސީން ބުނެފައިވަނީ މިފަދަ ހަރަކާތެއް ބޭއްވުމަށް ބޭނުންވާ ފަރާތްތަކުން އެކަމަށް އެދި އެކޯޕަރޭޝަނަށް ހުށައަޅައިގެން އެހެން ފަރާތްތަކުންވެސް އަމަލު ކުރައްވާ އުސޫލުގެތެރެއިން އެ ހުއްދައަށް އެދުމުގެ ފުރުޞަތު އޮންނާނެ ކަމުގައެވެ. އެހެންކަމުން އެގޮތަށް އަމަލު ކުރުމަށް ހުރިހާ ފަރާތްތަކަށްވެސް އެޗްޑީސީން ވަނީ އިލްތިމާސްކޮށްފައެވެ.

ހުޅުމާލެ ޑިވެލޮޕްމަންޓް ކޯޕަރޭޝަން (އެޗްޑީސީ)އާއި މާލެ ސިޓީ ކައުންސިލްގެ ކޯޅުން ބޮޑުވެ އެންމެ ފަހުން ހުޅުމާލޭގެ ރަޖިސްޓްރީ ސިޓީ ކައުންސިލުން ބާޠިލްކޮށްފައެވެ. މާލެ ސިޓީ ކައުންސިލަށް ހުޅުމާލޭގެ ބާރުވެރިކަން ނަގާފައިވަނީ އެމްޑީޕީގެ މެމްބަރުންގެ ވޯޓާއިވެސް އެކުގައެވެ.

ހުޅުމާލެ ރަޖިސްޓްރީ ބާޠިލްކުރުމަށް ހުށައެޅުއްވީ ޑެޕިއުޓީ މޭޔަރު އަޙްމަދު ނަރީޝްއެވެ. މިއަދު އޮތް ސިޓީ ކައުންސިލްގެ ބައްދަލުވުމުގައި ހުޅުމާލެ ރަޖިސްޓްރީ ބާޠިލްކުރުމަށް ފާސްކުރީ ބައްދަލުވުމުގައި ބައިވެރިވެވަޑައިގެންނެވި މެންބަރުންގެ އަޣްލަބިއްޔަތުންނެވެ. ވޯޓު ދެއްވި ކައުންސިލް މެންބަރުންގެ ތެރޭގައި އެމްޑީޕީގެ 2 ކައުންސިލަރަކުވެސް ހިމެނެއެވެ. އެގޮތަށް ފާސްކުރަން ވޯޓު ދެއްވި އެމްޑީޕީ ކައުންސިލަރުންގެ ތެރޭގައި ހެންވޭރު އުތުރު ދާއިރާގެ ކައުންސިލަރު އައިޝަތު ނިޒްލީ ރަޝީދާއި މައްޗަށް ގޯޅި މެދު ދާއިރާގެ ކައުންސިލަރު އަހްމަދު ޟަމީރު ހިމެނެއެވެ.