ސަރުކާރު ކޯލިޝަންގައި ހިމެނޭ އަދަލަތު ޕާޓީއާއި، އެމްއާރުއެމްގެ ދެ ބޭފުޅަކަށް ސިޔާސީ މަޤާމު ދެއްވައިފިއެވެ.
އެގޮތުން ޔޫތު މިނިސްޓްރީގެ ސީނިއާ އެގްޒެކެޓިވް ޑިރެކްޓަރުގެ މަޤާމަށް އައްޔަންކުރައްވާފައިވަނީ އަދާލަތު ޕާޓީގެ ތޫބާ ރަޝީދު އެވެ. އޭނާ ވަނީ އެންމެ ފަހުން ބޭއްވި މަޖިލީހުގެ ކެލާ ދާއިރާގެ މެންބަރުކަމަށް އަދާލަތު ޕާޓީގެ ޓިކެޓްގައި ވާދަކޮށްފައެވެ.
ދެން ސިޔާސީ މަޤާމަކަށް އައްޔަންކުރައްވާފައިވަނީ ހެރިޓޭޖް މިނިސްޓްރީގެ ސީނިއަރ އެގްޒެކްޓިވް ޑިރެކްޓަރގެ މަޤާމަށް އެމްއެއާރްއެމްގެ ޢަލީ ޠާއިފްއެވެ.
މި ދެމަޤާމަށްވެސް މިބޭފުޅުން އައްޔަންކުރައްވާފައިވަނީ ޤާނޫނު އަސާސީން ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުންނެވެ.
ސީނިއާ އެގްޒެކެޓިވް ޑިރެކްޓަރުގެ މަޤާމަށް މުސާރައާއި އިނާޔަތުގެ ގޮތުގައި 18،000ރ. ލިބޭނެއެވެ. އެއީ މުސާރައިގެ ގޮތުގައި ދޭ 11،000ރ. އާއި 7،000ރ. ގެ އެލަވަންސެކެވެ.
މިސަރުކާރުގެ ސިޔާސީ މަޤާމުތައް ކުރީ ސަރުކާރަށްވުރެ އިތުރުކަމަށް ބުނެ ސަރުކާރަށް ވަނީ ފާޑުކިޔުން އަމާޒުވެފައެވެ. އެގޮތުން އަންނަ އަހަރަށް ލަފާކުރާ ބަޖެޓްގައިވެސް ސިޔާސީ މަޤާމުތަކަށް 350 އެއްހާ މަޤާމު އިތުރު ކުރުމަށް 402 މިލިޔަން ރުފިޔާ ބަޖެޓްކޮށްފައިވާކަން ބައެއް މެންބަރުން ފާހަގަކޮށްފައިވެއެވެ.
