މިރޭ އިދިކޮޅުން ރައީސް ޔާމީނާއިކު ބޭއްވި ބޮޑު ޖަލްސާގައި ސައިޒު ދައްކާލައިފިއެވެ.

މިއީ މިފަހުން ސިޔާސީ ޕާޓީއަކުން ބޭއްވި އެންމެ ބޮޑު ޖަލްސާއެެވެ. މިރޭގެ ޖަލްސާ 21:00ގައި ފެށުމުގެ މާކުރިން ޖަލްސާ ބޭއްވި އަލިމަސް ކާނިވާ ސަރަހައްދު ވަނީ ރައީސް ޔާމީންގެ ސަޕޯޓަރުންނާއިއެކު ފުރާލާފައވެެ. މިއީ ދެ އަހަރު ދުވަހުގެ ސިޔާސީ ހަރަކާތްތަކާއި ދުރުގައި ހުންނަން ޖެހުމަށްފަހު ރައީސް ޔާމީން ބައިވެރިވެގެން ބޭއްވި މިފަދަ ފުރަތަމަ ޖަލްސާއެވެ.

މިރޭގެ ޖަލްސާގައި އެތައް ސަތޭކަ ބަޔަކު ބައިވެރިވެފައިވާއިރު، މިއީ ފަހުގެ ތާރީހެއްގައި ސިޔާސީ ޕާޓީއަކުންވެސް ބޭއްވި އެންމެ ބޮޑު ޖަލްސާކަން ފާހަގަކޮށްލެވެ. ޖަލްސާގައި އެންމެ ގިނަ ބަޔަކު އަޑުއަހަން ތިބީ ރައީސް ޔާމީން ދައްކަވާ ވާހަފުޅަށެވެ.

ރައީސް ޔާމީންގެ މައްޗަށް ކުށް ސާބިތުވާކަމަށް ކްރިމިނަލް ކޯޓުންނާއި ހައިކޯޓުން ނިންމި ނިންމުން ބާތިލުކުރަންޖެހޭކަމަށް ފެންނަކަމަށް މައްސަލަ ބެއްލެވި ސްޕްރީމް ކޯޓުގެ ފަނޑިޔާރުންގެ ބެންޗުގެ 3 ފަނޑިޔާރުންގެ އިއްތިފާގުން ނިންމީ މިދިޔަ އަންގާރަ ދުވަހުއެވެ. މި މައްސަލައިގައި ފަނޑިޔާރު މަހާޒްގެ ރަޢުޔަށް ދެން ތިއްބެވި ފަނޑިޔާރު އަޒްމިރަލްދާ ޒާހިރުގެ އިތުރުން ފަނޑިޔާރު އިބްރާހިމް މުހައްމަދުވަނީ ތާއީދުކުރައްވާފައެވެ.

ޔާމީންގެ މައްޗަށް އިއްވާފައިވާ މަނީ ލޯންޑަރިންގެ ދަޢުވާއިން ސަލާމަތްވީ އެމަނިކުފާނުގެ އެކައުންޓަށް ޖަމާވި ފައިސާ އަކީ ދަޢުލަތަށް ލިބެން ޖެހޭ ފައިސާ ކަމާ މެދު ސުވާލު އުފައްދައި ހުށަހެޅި ނުކުތާއާ ގުޅިގެން އެމަނިކުފާނާ އެއްކޮޅަށް ރައުޔު އިއްވުމުންނެވެ. ސުޕްރީމް ކޯޓުންވަނީ މިމައްސަލައިގަ ހެކިބަސް ހޯދާފައިވާ އަދީބާއި ޒިޔަތުގެ ހެކިބަހާ ގުޅޭ އެހެން ހެކިތަކަކީ ކޮބައިކަމެއް ފާހަގަކޮށްފައި ނެތމުން އަދީބާއި ޒިޔަތުގެ ހެކިބަސް ބަލައިގެންފައިވަނީ ޤާނޫނީ އުސޫލުގެ ތެރެއިން ނޫންކަން ފާހަގަކޮށްފައެވެ. އަދި, އަދީބާއި ޒިޔަތުގެ ހެކިބަސް ބަލައިގަތުމަކީ ރައްކާތެރިކަމެއް ކަމަށް ގަބޫލު ނުކުރައްވާ ކަމަށް ވެސް ޙުކުމްގައިވެއެވެ.

ރައީސް ޔާމީން މިރޭގެ ޖަލްސާގައި ބައިވެރިވުމަކީ ސިޔާސީ ގޮތުން ވަރަށް ގިނަ ކަންކަން ބަދަލުވެގެންދާނެ ކަމެއްކަމަށް ގިނަ ބޭފުޅުން ދަނީ ވިދާޅުވަމުންނެވެ. ޚާއްސަކޮށް މިޖަލްސާގައި މިހާގިނަ އަދަދެއްގެ ބަޔަކު ބައިވެރިވުމަކީ ސަރުކާރަށް ރައްޔިތުން ކުރާ ތާއީދު ކުޑަކަން ހާމަވާ ކަމެއްކަމަށް ވަނީ ބުނެފައެވެ.