2023ގެ ފަހުން ރާއްޖޭގައި ރިޔާސީ ނިޒާމެއް ނޯންނާނެކަމަށް ޤަބޫލުކުރައްވާކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.

އާސްކް ސްޕީކާ ޕްރޮގްރާމްގައި އާންމުންގެ މީހަކު ވަނީ 2023ގެ ރިޔާސީ އިންތިޚާބުގެ އެމްޑީޕީގެ ޓިކެޓް ރައީސް އިބްރާހީމް މުޙައްމަދު ޞާލިޙަށް ދެއްވާނަންތޯ ސުވާލުކުރައްވާފައެވެ.

އެ ސުވާލަށް ޖަވާބުދެއްވަމުން ރައީސް ނަޝީދު ވިދާޅުވީ، އެތެރޭގެ އިންތިޚާބުތައް އެއީ ވަރަށް މުހިންމު މަސައްކަތެއްކަމަށާއި، ރަނގަޅަށް ހިނގާ ސިޔާސީ ޕާޓީއެއް އޮތުމަކީ ރައްޔިތުންނަށް ބޭނުންވާ ކަމެއްކަމަށެވެ. އެމަނިކުފާނު ވިދާޅުވީ އާންމު ހާލަތު ރަނގަޅުވާނީ ޑިމޮކްރެޓިކް ނިޒާމް ހަރުދަނާވެގެންކަމަށާއި، ޕާޓީގެ އެތެރޭގެ ނިޒާމްވެސް ރަނގަޅުވެގެންކަމަށެވެ.

ރައީސް ނަޝީދު ވިދާޅުވީ 2023ގެ އިންތިޚާބަށް އެމްޑީޕީގެ ޕްރައިމަރީ އޮންނާނެކަމަށާއި، އޭގައި ވާދަކުރައްވާނެކަމަށެވެ. ނަމަވެސް އެމަނިކުފާނު ޤަބޫލުކުރައްވަނީ 2023ގެ އާއި ހަމައަށް މިހާރު އޮތް ރިޔާސީ ނިޒާމް އޮތުމަށްފަހު އޭގެ ފަހުން އެ ނިޒާމް ނޯންނާނެކަމަށެވެ.

ރައީސް ނަޝީދު މިހެން ވިދާޅުވިއިރު އެމަނިކުފާނަކީ ބަރުލަމާނީ ނިޒާމަށް އަބަދުވެސް ވަކާލާތުކުރައްވާ ބޭފުލެކެވެ. ރައީސް ނަޝީދު މީގެ ކުރިންވެސް ވިދާޅުވެފައިވަނީ، ބަރުލަމާނީ ނިޒާމެއް ގެނައުމާމެދު 2022 ވަނަ އަހަރުގެ ނޮވެމްބަރު މަހު ފެންނަ ނުފެންނަ ވޯޓަކަށް ގޮސް، 2023 ވަނަ އަހަރު ނިޒާމް ބަދަލުކުރުމަށް ހުރިހާ ޕާޓީތަކުން އެއްބަސްވާކަމަށެވެ.

ރައީސް ނަޝީދު މިހެން ވިދާޅުވެފައިވާއިރު، ރާއްޖޭގެ ވެރިިކަމުގެ ނިޒާމް ރިޔާސީ ނިޒާމުން ބަރުލަމާނީ ނިޒާމަށް ބަދަލުކުރުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، ޖުމްހޫރީ ޕާޓީގެ ލީޑަރު ޤާސިމް އިބްރާހީމާއި، މޯލްޑިވްސް ނެޝަނަލް ޕާޓީގެ ރައީސް ކާނަލް މުޙައްމަދު ނާޒިމާވެސް މަޝްވަރާކުރައްވާފައެވެ.

ރައީސް ނަޝީދު ދާދިފަހުން ވިދާޅުވެފައިވަނީ، މިހާރު ކުރައްވަމުން ގެންދަވާ ބަރުލަމާނީ ނިޒާމުގެ މަސައްކަތަކީ ރައީސުލްޖުމްހޫރިއްޔާއާއި މަޝްވަރާ ކުރައްވައިގެން ކުރިޔަށް ގެންދަވާ މަސައްކަތެއް ކަމުގައެވެ. އަދި މަސައްކަތާ ގުޅޭ އިތުރު މައުލޫމާތެއް ދެއްވާނީ އިތުރަށް ރައީސުލްޖުމޫރިއްޔާ އިބުރާހިމް މުހައްމަދު ސާލިހާއި މަޝްވަރާ ކުރެއްވުމަށް ފަހުގައި ކަމުގައެވެ.

ބަރުލަމާނީ ނިޒާމަކަށް ވެރިކަމުގެ ނިޒާމު ބަދަލުކުރުމަށް ނަޝީދު އިސްވެ ހުންނަވައިގެން ކުރައްވާ މަސައްކަތްތައް ކުރައްވަމުން ގެންދަވަނީ ރައީސް ސާލިހުގެ މަޝްވަރާގެ މަތިންކަމަށް ނަޝީދު ވިދާޅުވި ނަމަވެސް މީގެ ކުރިން ރައީސް ސާލިހު ވިދާޅުވެފައިވަނީ، ބަރުލަމާނީ ނިޒާމެއް ގައުމާމެެދު ވިސްނެވުމަށްވުރެ އެމަނިކުފާނު އިސްކަން ދެއްވަނީ ވެރިކަމަށް ވަޑައިގަތުމަށް ވެވަޑައިގެންނެވި ވައުދުތައް ފުއްދެވުމަށް ކަމަށެވެ. އަދި ރައީސް ސާލިހު ވިދާޅުވެފައިވަނި، ބަރުލަމާނީ ނިޒާމަމަށް އަލުން ދިޔަޔަސް ދެވެން އޮންނާނީ ރައްޔިތުންގެ އާންމު ފެންނަ ނުފެންނަ ވޯޓަކުން އެގޮތައް ނިންމައި ހާލަތެއްގައި އެކަނި ކަމަށެވެ.

އަދި ރައީސް ނަޝީދުގެ ބަރުލަމާނީ މަސައްކަތްތަކާ ގުޅޭގޮތު މީގެ ކުރިން ރައީސް އޮފީހުގެ ތަރުޖަމާން ވިދާޅުވެފައިވަނީ، ރައީސް ސާލިހު ދެކެވަޑައިގަންނަވާ ގޮތުގައި ވެރިކަމަށް ވަޑައޮގެންނެވުމަށް އެކުލަވާލެއްވި މެނިފެސްޓޯގައި ނިޒާމު ބަދަލުކުރާ ވާހަކަ ނެތްކަމަށާއި، އެހެންކަމުން، އެއީ މިސަރުކާރުގެ ސިޔާސަތު ނޫންކަމުގައެވެ.

ނަޝީދު އިސްވެ ހުންނަވާ، ރާއްޖޭގެ ވެރިކަމުގެ ނިޒާމް ބަރުލަމާނީ ނިޒާމަކަށް ބަދަލު ކޮށްކުމަށް މިހާރު ގެންދަވަނީ ޕެޓިޝަނެއްގައި ސޮއިކުރަމުންނެވެ. އަދި މިޕެޓިޝަނަށް ތާއީދު ހޯދުމަށް މިމަސައްކަތުގައި އުޅުއްވާ ފަރާރްތަކުން މިހާރުވަނީ ރާއްޖެތެރޭގެ ދަތުރުތައް ވެސް ފަށާާފައެވެ.