ކުރީގެ ރައީސް ޔާމީން ބައިވެރިވާ ޕްރޮގްރެސިވް ކޮންގްރެސް ކޯލިޝަންގެ ކައުންސިލް ބައްދަލުވުމެއް މިރޭ ބޭއްވުމަށް ނިންމުމަށްފަހު ބައްދަލުވުން ފަސްކޮށްފިއެވެ.
މިރޭ 20:30 ގައި ބޭއްވުމަށް ހަމަޖެހިފައިވާ މިބައްދަލުވުމުގައި ރައީސް ޔާމީނާއި، ކައުންސިލްގެ ހުރިހާ ބޭފުޅުން ބައިވެރިވާނެކަމަށް ޕީޕީއެމްއިން ވަނީ މައުލޫމާތުދީފައެވެ. މިބައްދަލުވުން ބާއްވާނެ ތާރީހެއް ފަހުން އިއުލާނު ކުރާނެކަމަށް އެޕާޓީން ވަނީ ބުނެފައެވެ.
އިދިކޮޅު ޕްރޮގްރެސިވް ކޮންގްރެސް ކޯލިޝަނުން އެންމެ ފަހުން ބޭއްވި ކައުންސިލް ބައްދަލުވުމުގައި ނިންމާފައިވަނީ އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީނަށް ކޮށްފައިވާ ހުކުމަކީ ނާއިސާފު ހުކުމެއްކަމަށާއި، އެމަނިކުފާނަށް ނުހައްގުން ދެމުންދާ އަނިޔާތަކާއި ދެކޮޅަށް އިދިކޮޅު ކޯލިޝަނުން ސީދާ ހަރަކާތަށް ނިކުމަށެވެ. އެދުވަހުގެ ފަހުން އިދިކޮޅު ކޯލިޝަނުން ވަނީ މަގު މަތީގެ ގިނަ ހަރަކާތްތަކެއް ބާއްވާފައެވެ.
ރައީސް ޔާމީންގެ މައްޗަށް ކުށް ސާބިތުވާކަމަށް ކްރިމިނަލް ކޯޓުންނާއި ހައިކޯޓުން ނިންމި ނިންމުން ބާތިލުކުރަންޖެހޭކަމަށް ފެންނަކަމަށް މައްސަލަ ބެއްލެވި ފަނޑިޔާރުންގެ ބެންޗުގެ 3 ފަނޑިޔާރުންގެ އިއްތިފާގުންނެވެ. މި މައްސަލައިގައި ފަނޑިޔާރު މަހާޒްގެ ރަޢުޔަށް ދެން ތިއްބެވި ފަނޑިޔާރު އަޒްމިރަލްދާ ޒާހިރުގެ އިތުރުން ފަނޑިޔާރު އިބްރާހިމް މުހައްމަދުވަނީ ތާއީދުކުރައްވާފައެވެ.
ރައީސް ޔާމީންގެ ފަރާތުން ސުޕްރީމް ކޯޓަށް ހުށައެޅި މިމައްސަލާގައި ސުޕްރީމް ކޯޓުގައި ގިނަ އަޑުއެހުންތަކެއް ބާއްވާފައިވާއިރު، ސުޕްރީމް ކޯޓުގެ ފަނޑިޔާރުންގެ ކިބައިން ރައީސް ޔާމީން އެދިވަޑައިގަންނަވަމުން ގެންދެވީ އެމަނިކުފާނާމެދު ވަަރަށް ބޮޑަށް ބޭއިންސާފުން ޢަމަލުކޮށްފައިވާ ކަަމަށާއި އެކަންކަމަށް ރިއާޔަތްކޮށްދިނުމަށެވެ. ސުޕްރީމް ކޯޓުގައި ރައީސް ޔާމީންގެ ފަރާތުން އިސްތިއުނާފީ ނުކުތާގެ ގޮތުގައި 22 ނުކުތާއެއް ފާހަގަކުރިނަމަވެސް އޭގެ ތެރެއިން ގިނަ ކަންކަން ހައިކޯޓުން ނިންމެވީ ޤާނޫނާއި ޚިލާފަށްކަމަށް ބެލެވެން ނެތްކަމަށް ސުޕްރީމް ކޯޓުގައި މި މައްސަލަ ބެއްލެވި ފަނޑިޔާރުންގެ ބެންޗުގެ ރިޔާސަތުގައި އިންނެވި ފަނޑިޔާރު މަހާޒްގެ ރައުޔުގައި ވިދާޅުވިއެވެ.
ޔާމީންގެ މައްޗަށް އިއްވާފައިވާ މަނީ ލޯންޑަރިންގެ ދަޢުވާއިން ސަލާމަތްވީ އެމަނިކުފާނުގެ އެކައުންޓަށް ޖަމާވި ފައިސާ އަކީ ދަޢުލަތަށް ލިބެން ޖެހޭ ފައިސާ ކަމާ މެދު ސުވާލު އުފައްދައި ހުށަހެޅި ނުކުތާއާ ގުޅިގެން އެމަނިކުފާނާ އެއްކޮޅަށް ރައުޔު އިއްވުމުންނެވެ.
ސުޕްރީމް ކޯޓުންވަނީ މިމައްސަލައިގަ ހެކިބަސް ހޯދާފައިވާ އަދީބާއި ޒިޔަތުގެ ހެކިބަހާ ގުޅޭ އެހެން ހެކިތަކަކީ ކޮބައިކަމެއް ފާހަގަކޮށްފައި ނެތމުން އަދީބާއި ޒިޔަތުގެ ހެކިބަސް ބަލައިގެންފައިވަނީ ޤާނޫނީ އުސޫލުގެ ތެރެއިން ނޫންކަން ފާހަގަކޮށްފައެވެ. އަދި, އަދީބާއި ޒިޔަތުގެ ހެކިބަސް ބަލައިގަތުމަކީ ރައްކާތެރިކަމެއް ކަމަށް ގަބޫލު ނުކުރައްވާ ކަމަށް ވެސް ޙުކުމްގައިވެއެވެ.
