ކުރީގެ ރައީސް އަދި ޕީޕީއެމްގެ ރައީސް އަބްދުﷲ ޔާމީނަކީ މައުސޫމް ބޭފުޅެއްކަން މިއަދު މުޅި ދުނިޔެއަށް ހާމަވެގެން ގޮސްފައިވާކަމަށް ޕީޕީއެމްގެ ނައިބް ރައީސް އަދި ރައީސް ޔާމީނަށް ބޮޑުބޭބެ ވިދާޅުވާ މުހައްމަދު ޣައްސާން މައުމޫން ވިދާޅުވެއްޖެއެވެ.
ރައީސް މައުމޫން މިނިވަން ކުރުމަށް ސްޕްރީމް ކޯޓުން ކުރި ހުކުމާއި ގުޅިގެން ވާހަކަ ދައްކަވަމުން ޣައްސާން ވިދާޅުވީ މިއަދު މުޅި ދުނިޔެއަށް ހާމެވެގެންދިޔައީ ރައީސް ޔާމީނަކީ މައުސޫމް އެއްވެސް ކުށެއްނެތް ބޭފުޅެއްކަމަށެވެ. ރައީސް ޔާމީނަކީ ދިވެހި ޤައުމަށާއި، ރައްޔިތުންނަށް އަނިޔާވެރިވެ ދައުލަތަށް ޚިޔާނާތްތެރި ނުވާނެ ބޭފުޅެއްކަން މިއަދު ދައުލަތުގެ އެންމެ ކޯޓުން ނިންމި ނިންމުމުން ހާމަވެގެން ގޮސްފައިވާކަމަށެވެ.
ޣައްސާން ވިދާޅުވީ މި ލިބުނު އުފަލާއިއެކު، ރައީސް ޔާމީނަށް ޤާނޫނާއި ޚިލާފަށް އަނިޔާދިން މީހުންނަށް މިކަން އަރާ ހަމަކުރާނެކަމަށެވެ. ނާއިސާފުން ނިންމާ ކޮންމެ ނިންމުމަކީ އިންސާފު އަރާ ހަމަކުރާނެ ކަމެއްކަމަށް އައްސާން ވަރަށް އަސަރާއިއެކު ވަނީ ވިދާޅުވެފައެވެ.
ރައީސް ޔާމީނަކީ މައުސޫމް ބޭފުޅެއްކަން މިއަދު ވަނީ ހާމަވެފަ. ޤައުމަށް ޚިޔާނާތްތެރި ނުވާނެކަން ހުކުމުން މިސާބިތުމިވީ. މިއީ ވަރަށް އުފާވެރި ދުވަހެއް. ދިވެހިންނަކީ ހައްގުގެ މަގުގައި ތިބޭނެ ބައެއްކަން މިއަދު ހާމަވެގެން މިދިޔައީ.
– ޣައްސާން ވިދާޅުވިއެވެ.
ރައީސް ޔާމީންގެ މައްޗަށް ކުށް ސާބިތުވާކަމަށް ކްރިމިނަލް ކޯޓުންނާއި ހައިކޯޓުން ނިންމި ނިންމުން ބާތިލުކުރަންޖެހޭކަމަށް ފެންނަކަމަށް މައްސަލަ ބެއްލެވި ފަނޑިޔާރުންގެ ބެންޗުގެ 3 ފަނޑިޔާރުންގެ އިއްތިފާގުންނެވެ. މި މައްސަލައިގައި ފަނޑިޔާރު މަހާޒްގެ ރަޢުޔަށް ދެން ތިއްބެވި ފަނޑިޔާރު އަޒްމިރަލްދާ ޒާހިރުގެ އިތުރުން ފަނޑިޔާރު އިބްރާހިމް މުހައްމަދުވަނީ ތާއީދުކުރައްވާފައެވެ.
މިމައްސަލާގައި ސުޕްރީމް ކޯޓުގައި ގިނަ އަޑުއެހުންތަކެއް ބާއްވާފައިވާއިރު، ސުޕްރީމް ކޯޓުގެ ފަނޑިޔާރުންގެ ކިބައިން ރައީސް ޔާމީން އެދިވަޑައިގަންނަވަމުން ގެންދެވީ އެމަނިކުފާނާމެދު ވަަރަށް ބޮޑަށް ބޭއިންސާފުން ޢަމަލުކޮށްފައިވާ ކަަމަށާއި އެކަންކަމަށް ރިއާޔަތްކޮށްދިނުމަށެވެ.
އަދި އެމްއެމްޕީއާރްސީގެ ކޮރަޕްޝަންގެ ތަހުގީގު އެންމެންގެ މައްޗަށް ހިންގަމުންދާއިރު, ދަޢުވާ ކޮށްފައިވަނީ އެމަނިކުފާނަށްކަމަށާއި، ބައެއް މީހުންނަށް އެސްއޯއެފްގެ ފައިސާ ލިބިފައިވީ ނަމަވެސް އެއީ ގޯސްކޮށް ލިބުނު ފައިސާއެއް ނޫން ކަމަށް ވެސް ކޯޓުން ބޭރުގައި ނިންމާފައިވާ ކަމަށް ރައީސް ޔާމީން ވަނީ ކޯޓުގައި ވިދާޅުވެފައެވެ.
މިމައްސަލައިގެން އެސްއޯއެފް އަކީ އެމްއެމްޕީއާރުސީގެ ހިޔާނާތުގެ ފައިސާ ލޯންޑާ ކުރުމަށް ބޭނުންކުރި އެންމެ ވަރުގަދަ އާލާތްކަމަށް ބުނާއިރު އެކުންފުނީގެ މައްޗަށް ދައުވާއެއް ކޮށްފައި ނެތުމަކީ ހައިރާންވިކަމެއް ކަމަށެވެ.
ރައީސް ޔާމީން މިނިވަން ވުމުން ގިނަ އަދަދެއްގެ ބަޔަކު ދަނީ ޕީޕީއެމް އޮފީސް ކައިރިއަށް އެއްވެ އުފާ ފާޅުކުރަނުންނެވެ.
