2005 ވަނަ އަހަރުގެ ފިލްމް "ނޯ އެންޓްރީ"ގެ ސީކުއެލް އެއް ހެދުމުގެ މަސައްކަތް ކުރަމުންދާކަމަށް މީޑިއާ ރިޕޯޓްތައް ބުނެފިއެވެ.
މީގެ 16 އަހަރު ކުރިން އަނީސް ބާޒްމީ ޑައިރެކްޓް ކުރި މި ފިލްމަކީ ހެއްވާ މަޖާ ފިލްމެކެވެ. އަދި މިއީ ގިނަބައެއްގެ މަގުބޫލު ކަން ލިބުނު ފިލްމެއްވެސް މެއެވެ. މި ފިލްމް ގެ މުހިންމު ރޯލުތަކުން ފެނިގެން ގޮސްފައިވަނީ ސަލްމާން ޚާނާއި އަނިލް ކަޕޫރުގެ އިތުރުން ފަރްދީން ޚާނެވެ.
މި ފިލްމުގެ ދެވަނަ ބަޔަށް ދޭނެ ނަމަކީ "ނޯ އެންޓްރީ މޭ އޭންޓްރީ" ކަމަށް ރިޕޯޓުތައް ބުނެއެވެ.
"ނޯ އެންޓްރީ"ގެ ދެވަނަ ބައެއް މީގެ ކުރިންވެސް ހެދުމުގެ މަޝްވަރާތަކެއް ކުރެވުނެވެ. ނަމަވެސް ސަލްމާނާއި އެ ފިލްމުގެ ޕްރޮޑިއުސަރު އަދި އަނިލް ކަޕޫރުގެ ބޭބެ ބޯނީ ކަޕޫރާ ދެމެދުގައި ހިތް ހަމަ ނުޖެހުމެއް ހިނގައި ފިލްމު އިތުރަށް ކުރިއަށް ނުގެންދަން ނިންމީއެވެ. ނަމަވެސް އަނެއްކާވެސް މި ފިލްމު ހެދުމުގެ އަޑު މިވަނީ ގަދަ ވެފައެވެ. ބެލެވޭ ގޮތުގައި މި ފިލްމު ޕްރޮޑިއުސަރުންގެ ތެރޭގައި ބޯނީ ނުހިމެނޭނެއެވެ.
"ނޯ އެންޓްރީ"ގެ ސީކުއެލް ހެދުމަށް މިހާރު އެއްވެސް ހުރަހެއް އޮތް ކަމަކަށް ނުބެލެވޭ ކަމަށް ރިޕޯޓްތައް ބުނެއެވެ. ސަބަބަކީ ދުވަސްތަކަކަށް ފަހު ފަރްދީން ވެސް އެބުރި ފިލްމީ ދާއިރާއަށް އައިސްފައި ވާތީއެވެ. އަދި ހަށިގަނޑުވެސް ކުރިއެކޭ އެއްގޮތަށް މިހާރު ވަނީ ބަދަލުކޮށްލާފައެވެ.
"ނޯ އެންޓްރީ"ގެ ބަތަލާއިންނަކީ ލާރާ ދައްތާ އާއި އީޝާ ޑިއޯލް އާއި ބިޕާޝާ ބާސޫގެ އިތުރުން ސެލީނާ ޖެއިޓްލީ އެވެ. އެކަމަކު "ނޯ އެންޓްރީ މޭ އެންޓްރީ" ގައި އެ ތަރިން ހިމެނޭނެ ކަމެއް އަދި ނޭނގެއެވެ.
