މާލެ ސިޓީ ކައުންސިލްގައި އޮތީ މާލޭގެ ރައްޔިތުން އިންތިޚާބުކުރި، ރައްޔިތުންނަށް ޚިދުމަތް ކުރުމުގައި އެއްވެސް ވަރުބަލި ކަމެއްނެތް، ބަދަހި ޓީމެއް ކަމުގައި މާލެ ސިޓީ ކައުންސިލްގެ މޭޔަރު ޑރ.މުހައްމަދު މުއިއްޒު ވިދާޅުވެއްޖެއެވެ.
މާލެ ސިޓީ ކައުންސިލަށް ހަތަރު ވަނަ ދައުރަށް ހަ މަސް ފުރުމާއި ގުޅިގެން ރޭބޭއްވި ހަފްލާގައި އެންމެ ބޮޑު ބޭނުމަކީވެސް ސިޓީ ކައުންސިލަށް އެކި ގޮތްގޮތުން ޚިދުމަތް ކޮށްދެއްވާފައިވާ ބޭފުޅުންގެ އަގު ވަޒަން ކުރުމެވެ. ރޭގެ ޖަލްސާގައި ވާހަކަ ދައްވަމުންވެސް މޭޔަރު މުއިއްޒު ވަނީ މާލެ ސިޓީ ކައުންސިލާއި މިހާރު އޮތް ކައުންސިލުން ހަވާލުވުމަށްފަހު މިހާތަނަށް ހޯދި ކާމިޔާބީއަކީ ގުޅިގެން ކުރެވުނު މަސައްކަތްތަކުގެ ނަތީޖާކަން ފާހަގަ ކުރައްވާފައެވެ.
މުއިއްޒު ވިދާޅުވީ މާލެ ސިޓީ ކައުންސިލަށް ރައްޔިތުން އިންތިޚާބު ކުރެއްވި ކައުންސިލަރުންގެ މަސައްކަތް އިތުރަށް ފުރިހަމަ ކޮށްދެނީ މާލެ ސިޓީ ކައުންސިގެ މުވައްޒިފުންނާއި، އަންހެނުންގެ ކޮމެޓީންކަމަށެވެ. މާލެ ސިޓީ ކައުންސިލަކީ ގުޅިގެން ބަދަހި ކަމާއިއެކު މަސައްކަތްކުރާ އެއްބައިވަންތަ ކައުންސިލެއްކަމަށް މުއިއްޒު ވިދާޅުވިއެވެ. އަދި އަމާޒަކީ ގުޅިގެން ރައްޔިތުން ބޭނުންވާ އަމާޒަށް ވާސިލްވުން ކަމަށާއި، އެކަން ކުރުމުގައި ދިމާވާ ދަތިތަކަށް ބެލުމެއްނެތި އެއްގޮތުން ނުވެއްޖެނަމަ އަނެއްގޮތް ހޯދައިގެންވެސް މާލެ ސިޓީގެ ރައްޔިތުން ބޭނުންވާ ކަންކަން ކޮށްދެއްވާނެކަމަށް މުއިއްޒު ވިދާޅުވިއެވެ.
މާލޭގެ ރައްޔިތުންނަށް ޚިދުމަތް ކުރުމަށް މާލޭގެ ރައްޔިތުން ހޮއްވެވި ޓީމަކީ ހިތްވަރުގަދަ، ހީވާގި، އެކަކު އަނެކަކަށް އެހީތެރިކަންދޭ، ގުޅިގެން މަސައްކަތްކުރާ، ބަފަހި ޓީމެއް. ރައްޔިތުން އެދޭ އަމާޒަށް މަސައްކަތް ކުރުމުގައި، ވަރުބަލި ކަމެއްނެތި ރައްޔިތުންނާއި ގާތުން މަސައްކަތް ކުރާ ޓީމެއް.
– ޑރ.މުއިއްޒު ވިދާޅުވިއެވެ.
ރޭގެ ރަސްމިއްޔާތުގައި މުއިއްޒު ވިދާޅުވީ މާލޭގެ ރައްޔިތުންނަށް ދިމާވެފައިވާ އެންމެ ބޮޑު މައްސަލައަކީ ގެދޮރުގެ މައްސަލަ ކަމަށާއި އެ މައްސަލަ ހައްލުވާން ރައްޔިތުން ބޭނުންވާ ކަމަށެވެ. އެކަމަކީ ސަރުކާރަށް ހައްލުކޮށްދެވޭނެ ކަމެއް ކަމަށާއި ގެދޮރުގެ މައްސަލަ ހައްލު ކުރުމަށް ސިޓީ ކައުންސިލުން ސަރުކާރަށް ފުރިހަމަ އެއްބާރުލުން ދޭނެ ކަމަށް އޭނާ ވިދާޅުވިއެވެ.
ގެދޮރުގެ މައްސަލަ ހައްލު ކުރުމަށް އަވަސް ފިޔަވަޅުތަކެއް އަޅަން ޖެހޭ ކަން ފާހަގަ ކުރައްވައި މުއިއްޒު ވަނީ ހުޅުމާލެ ދެވަނަ ފިޔަވައްސާއި ގުޅީފަޅަކީ އެކަމަށް އެންމެ އެކަށީގެންވާ ސަރަހައްދު ކަން ފާހަގަ ކުރައްވައިފައެވެ.
ހުޅުމާލެ ދެ ވަނަ ފިޔަވަހީގެ ބިން މުއްސަނދިންނަށް ވިއްކުމުގެ މަސައްކަތް އަދި ނުފެށި ކަމުގައި ވިޔަސް، މާލޭގެ ނިކަމެތި ރައްޔިތުންނަށް ގޯތި ދެވޭނެ ބިން ދެވަނަ ފިޔަވަހީގައި އެބަހުރި ކަމަށް މުއިއްޒު ވިދާޅުވިއެވެ. އަދި ގުޅީފަޅުގައި ޕޯޓެއް އަޅަން ސަރުކާރުން ނިންމާފައި ވާތީ ޕޯޓު އަޅާފައި ވިޔަސް "ހުޅުމާލެ ފުރަތަމަ ފިޔަވަހި ވަރުގެ ޖާގައެއް" ގުޅީފަޅުގެ ފަޅު ހިއްކައިގެން އަދިވެސް އުފެއްދެން އެބައޮތް ކަމަށް މުއިއްޒު ވިދާޅުވިއެވެ.
