ޔޫކުރެއިންނަށް އަރާ، ރަޝިއާއިން އެގައުމު ހިފަން މަސައްކަތް ކޮށްފިނަމަ ރަޝިއާއިން ބޮޑު އަގެއް ދައްކަން ޖެހޭކަމަށް ނޭޓޯގެ ސެކެޓްރީ ޖެނެރަލް ޖެންސް ސްޓޮލްޓެމްބާރގް ވިދާޅުވެއްޖެއެވެ.
އޭނާ މިހެން ވިދާޅުވެފައިވަނީ ރަޝިއާއިން އެގައުމުގެ ސިފައިން ކުރީގެ ސޯވިއެޓް ބޯޑަރު ކައިރިއަށް ޖަމާ ކުރަމުން ދިއުމާއިގުޅިގެން ކަންބޮޑުވުންތައް އުފެދެމުންދާ ދަނޑިވަޅެއްގައެއެވެ.
ޔޫކުރެއިން ބުނެފައިވަނީ، އެގައުމާއި ރަޝިއާއިން ހިއްސާކުރާ ބޯޑަރަ ކައިރިއަށް ރަޝިއާގެ 90،000 ސިފައިން ޖަމާ ކޮށްފައިވާ ކަމަށެވެ.
ރަޝިއާއިން ޔޫކްރެއިންގެ ބޯޑަރު ކައިރިއަށް ސިފައިން ޖަމާކުރަން ފަށާފައި މިވަނީ، މިއަހަރުގެ ކުރީކޮޅު، ރަޝިއާގެ ހުޅަގުގައި އަސްކަރީ ވަރުގަދަ ތަމްރީންތަކެއްވެސް ބާއްވާފައި ވަނިކޮށެވެ.
ޔޫކްރެއިންގެ ޑިފެންސް މިނިސްޓްރީން ބުނެފައިވަނީ، ރަޝިއާގެ އަސްކަރިއްޔާގެ 41 ޑިވިޝަންގެ ޔުނިޓްތައް މިހާރު ތިބީ ބޯޑަރުގެ އުތުރުން، 260 ކިލޯ މީޓަރު ދުރުގައި އޮންނަ ޔެލިންޔާ ކައިރީގައެވެ.
މޮސްކޯއިންވަނީ އެގައުމުން ޔޫކުރެއިނަށް އެރުމަށް ތައްޔާރުވަމުންދާ ކަމަށް ކުރެވެމުންދާ ތުހުމަތުތަކަށް ނޫނެކޭ ބުނެފައެވެ. އެހެންމަވެސް މި ސަރަހައްދުގައި ރަޝިއާގެ އަސްކަރިއްޔާގެ ހަރަކާތްތައް އިތުރުވެފައިވާ މައްސަލައާއި ގުޅޭގޮތުން އެއްވެސް ކޮމެންޓެއް ކޮށްފައެއް ނުވެއެވެ.
"ރަޝިއާއިން ޔޫކްރެއިންއާއި ދެކޮޅަށް ބާރުގެ ބޭނުން ކޮށްފިނަމަ ރަޝިއާއިން އަގު ދައްކަން ޖެހޭނެ. އޭގެ ގޮންޖެހުންތައް ހުންނާނެ،" ސްޓޮލްޓެމްބާރގް ވިދާޅުވިއެވެ.
ސްޓޮލްޓެމްބާރގް މިހެން ވިދާޅުވެފައިވަނީ، 30 ގައުމެއްގެ މައްޗަށް އެކުލެވޭ އަސްކަރީ އޯގަނައިޒޭޝަން (NATO) ޚާރިޖީ ވަޒީރުން ނޮވެމްބަރ 30 އިން ޑިސެމްބަރ 1އަށް ލެޓްވިއާގައި ބައްދަލު ކުރުމަށް ހަމަޖެހިފައި ވަނިކޮށެވެ. މި ބައްދަލުވުމުގެ އެޖެންޑާގެ އެންމެ ކުރީގައި އޮތީވެސް ރަޝިއާގެ މި އަސްކަރީ ހަރަކާތްތެކެވެ.
އެހެންނަމަވެސް، ރަޝިއާއިން ދަންކަންޖެހޭނަކަމަށް އޭނާ ވިދާޅުވި އަގަކީ ކޮބައިކަން ހާމަ ކުރައްވާފައެއް ނުވެއެވެ.
ޔޫކުރެއިންގައި ހުރި، ރަޝިއާއަށް ތާއީދުކުރާ ރައީސް، 2014 ވަނަ އަހަރު އޭނާއާއި ދެކޮޅަށް ކުރިޔަށްދިޔަ ބޮޑެތި މުޒާހިރާތަކަށްފަހު ވެރިކަމުން ދުރު ކުރެވުމާއެކު ރަޝިއާއިންވަނީ ޔޫކުރެއިން ކްރިމިއަން ސަރަހައްދު އެގައުމުގެ ބައެއްގެ ގޮތުގައި ނިންމާފައެވެ.
އަދި އޭގެ ދުވަސްކޮޅެއްފަހުން ރަޝިއާއިންވަނީ، ޔޫކުރެއިންގެ އިރުމަތީގައި ވަކިވެގަތުމަށް ހަގުރާމަކުރަން ފެށި ފަރާތްތަކަށް އެހީތެރިކަން ފޯރުކޮށްދޭން ފަށާފައެވެ.
ހުޅަގާއި ޔޫކުރެއިން ތުހުމަތު ކުރަމުންދަނީ، ރަޝިއާއިން ސިފައިންނާ ހަތިޔާރު ޖަމާކުރަމުންދަނީ ވަކިވެގަތުމަށް ހަގުރާމަކުރަމުންދާ ހަގުރާމަވެރިންނަށް އެހީތެރިވެ ދިނުމުގެ ގޮތުންނެވެ. އެހެންނަމަވެސް ރަޝިއާއިން މިތުހުމަތުތައް ދޮގު ކުރެއެވެ. އަދި ބުނެފައިވަނީ ހަގުރާމަވެރިންނާ ގުޅިފައިވާ ރަޝިއާ މީހުންނަކީ ވޮލަންޓިއަރުންގެ ގޮތުގައި ހަގިރާމަވެރިންނާ ގުޅިފައިވާ މީހުން ކަމުގައެވެ.
