ޔުއެފާ ޗެމްޕިއަންސް ލީގުގައި ރޭ ސްޕޯޓިން ލިޒްބަން އަތުން ބަލިވެ ޖަރުމަނުގެ ބޮރޯޝިއާ ޑޯޓްމަންޑް ޔުއެފާ ޔޫރޮޕާ ލީގުގައި ވާދަކުރަން ޖެހިއްޖެއެވެ.
ޕޯޗުގަލްގެ ސްޕޯޓިން ލިޒްބަންގެ އަމިއްލަ ދަނޑުގައި ރޭ ޑޯޓްމަންޑްގެ މައްޗަށް އެ ޓީމުން ކުރިހޯދީ 1-3 ގެ ނަތީޖާއަކުންނެވެ. މި މޮޅާއެކު ސްޕޯޓިން ލިޒްބަންވެސް ވަނީ ޗެމްޕިއަންސް ލީގުގެ ދެވަނަ ބުރަށް ދަތުރުކޮށްފައެވެ.
މުބާރާތުގެ ގްރޫޕް ސީ ގެ އެއްވަނައިގައި 5 މެޗުން ހޯދި 15 ޕޮއިންޓާއެކު އޮތީ އަޔަކްސްއެވެ. ދެ ވަނައިގައި ސްޕޯޓިން ލިޒްބަން އޮތީ 5 މެޗުން ލިބުނު 9 ޕޮއިންޓާއެކުއެވެ. ތިންވަނައިގައި ޑޯޓްމަންޑް އޮތީ 5 މެޗުން ލިބުނު 6 ޕޮއިންޓާއެކުއެވެ. އަދި ފުލުގައި އޮތީ ބެސިކްޓަސްއެވެ.
ސްޕޯޓިން ލިޒްބަން އާއި ޑޯޓްމަންޑް ބައްދަލުކުރި މެޗުގައި ފުރަތަމަ ލަނޑު ޖަހާ ލީޑު ނެގީ ސްޕޯޓިން ލިޒްބަންއެވެ. މި ލަނޑު މެޗުގެ 30 ވަނަ މިނެޓުގައި އެޓީމަށް ކާމިޔާބުކޮށްދިނީ، ޕެޑްރޯ ގޮންކަލްވޭސްއެވެ. އަދި އޭގެ ނުވަ މިނެޓު ފަހުން އޭނާ ވަނީ އިތުރު ލަނޑެއް ސްޕޯޓިންއަށް ކާމިޔާބުކޮށްދީ ލީޑު ފުޅާކޮށްފައެވެ. ސްޕޯޓިން އިން މި މެޗުގައި ޖެހި ތިންވަނަ ލަނޑު ދެވަނަ ހާފުގެ 81 ވަނަ މިނެޓުގައި ކާމިޔާބުކޮށްދިނީ، ޕެޑްރީ ޕޮއްރޯއެވެ. މެޗުގައި ޑޯޓްމަންޑުން ޖެހި ހަމައެކަނި ލަނޑު މެޗުގެ ފުރިހަމަ ވަގުތު ހަމަވެގެން ދެއްކި އިތުރު ވަގުތުގެ ތެރޭގައި ކާމިޔާބުކޮށްދިނީ، މަލެންއެވެ.
ޗެމްޕިއަންސް ލީގު ފުޓްބޯޅަ މުބާރާތުގެ ދެވަނަ ބުރަށް 11 ޓީމެއް މިހާތަނަށް ވަނީ ދަތުރުކޮށްފައެވެ. އެއީ ލިވަޕޫލާއި ބަޔާން މިއުނިކް އަދި އަޔަކްސްގެ އިތުރުން މެންޗެސްޓާ ސިޓީ، މެންޗެސްޓާ ޔުނައިޓެޑް، ޕީއެސްޖީ، ސްޕޯޓިން ލިޒްބަން، ރެއާލް މެޑްރިޑް، އިންޓަ މިލާން، ޗެލްސީ އަދި ޔުވެންޓަސް އެވެ.
