ހުޅުމާލެ ދެވަނަ ފިޔަވަހީގައި ޢިމާރާތްކޮށްފައިވާ ހިޔާ ފްލެޓްތަކުގައި މިހާރު 5000އެއްހާ މީހުން ދިރިއުޅޭކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން ލަފާކޮށްފިއެވެ.

އެޗްޑީސީން ބުނީ މިދިޔަ ސެޕްތެމްބަރު މަހުން ފެށިގެން ހިޔާ ފްލެޓްގައި މީހުން އާބާދުވާން ފަށާފައިވާއިރު، މިހާރު ހާހެއްހާ އާއިލާ ދިރިއުޅެމުންދާނެކަމަށް ލަފާކުރެވޭކަމަށެވެ. އަދި އެ އެއްހާސް އާއިލާއާއެކު 5000އެއްގާ މީހުން ހިޔާ ފްލެޓްތަކުގައި ދިރިއުޅޭނެކަމަށް ލަފާކުރެވޭކަމަށްވެސް އެޗްޑީސީން ވަނީ ބުނެފައެވެ.

ހިޔާގެ 7ހާހެއްހާ ފްލެޓްގައި 35،000އަށްވުރެ ގިނަ މީހުން އެތަނުގައި އާބާދުވާނެކަމަށް ވަނީ ލަފާކޮށްފައެވެ. ހިޔާ ފްލެޓްތައް ސަރުކާރުން ދޫކޮށްފައިވަނީ ފިނިޝިންގެ މަސައްކަތް އެއްކޮށް ނުނިންމައެވެ. އެހެންކަމުން ފިނިޝިންގެ މަސައްކަތް ނިންމޭ މިންވަރަކުން އާއިލާތައް ދަނީ ދިރިއުޅުން ބަދަލުކުރަމުންނެވެ. ފްލެޓްތައް ފިނިޝިންގެ މަސައްކަތް ނިންމަން ދިން މުއްދަތުގައި ކުލި ނުނަގާގޮތަށް ސަރުކާރުން ވަނީ ކަނޑައަޅާފައެވެ.

ހިޔާ ފްލެޓްތައް ހުންނަ ހުޅުމާލޭ ދެވަނަ ފިޔަވަހީގައި މީހުން ދިރިއުޅެން ފަށާފައިވާތީ އެޗްޑީސީން އަންނަނީ އެސަރަހައްދުގައި އެކި ޚިދުމަތްތައް ދޭން ފަށަމުންނެވެ. އެގޮތުން މިހާރު ބަހުގެ ޚިދުމަތް ފަށާފައިވާއިރު، މިސްކިތެއްވެސް ވަނީ ހުޅުވާފައެވެ. އަދި ސްކޫލާއި އެނޫންވެސް ބައެއް މުހިންމު ޚިދުމަތްތައް ފަށާގަންނަން އަންނަނީ ތައްޔާރުވަމުންނެވެ.