ފާއިތުވެދިޔަ ތިން އަހަރުގެ ތެރޭގައި ބަޖެޓް ކުރެވުނު އެއްވެސް މަސައްކަތެއް ނިލަންދޫގައި ކުރިއަށް ނުދާކަމަށާއި، އެއީ ވަރަށް ބޮޑު ކަންބޮޑުވުމެއްކަމުގައި އެދާއިރާގެ މެމްބަރު އަބްދުލް މުހުސިން ހަމީދު (ޖޭފޯ) ވިދާޅުވެއްޖެއެވެ.
އަންނަ އަހަރަށް ދައުލަތުން ލަފާކުރި ބަޖެޓްގެ ކޮމެޓީ ރިޕޯޓަށް ވާހަކަ ދައްކަވަމުން ޖޭފޯ ވިދާޅުވީ، އަންނަ އަހަރަށް ލަފާކޮށްފައިވާ ބަޖެޓުގައި އަދި ފާއިތުވެދިޔަ ތިން އަހަރުގެ ބަޖެޓުގައިވެސް ކަންތައްތަކެއް ޖަހައި، އެއިން އެއްވެސް ކަމެއް ނުދާކަމީ ދާއިރާގެ ރައްޔިތުންގެ އެންމެބޮޑު ޝަކުވާ ކަމަށެވެ. ނިލަދޫ ދާއިރާގެ ރައްޔިތުންނަކީވެސް ދިވެހި ރައްޔިތުންނަށްވާއިރު، ރައްޔިތުންނަށް ލިބެންޖެހޭ ހައްގުތައް ހަމަހަމަ ކަމާއިއެކު ނުލިބި މަހުރޫމް ވުމަކީ ބަލައި ގަނެވޭނެ ކަމެއްނޫންކަމަށް އޭނާ ވިދާޅުވިއެވެ.
ނިލަންދޫގައި ބަޖެޓް ކުރެވި ކުރިއަށް ނުދާ މަސައްކަތްތަކަށް އަލި އަޅުވާލަމުން ޖޭފޯ ވިދާޅުވީ އަތޮޅު ހޮސްޕިޓަލަކީ ކުރީ ސަރުކާރުން ފެށި މަސައްކަތެއްކަމަށާއި، ތަނުގެ ހާލަތު މިއަދު ވަރަށް ދަށްވެފައިވާކަމަށެވެ. ތަނުގައި އޭސީއެއް ހަރުކޮށް ނުލެވުނު ތަނުގައި އެއްވެސް މަރާމާތެއް، އަދި ހޮސްޕިޓަލުގައި ތަރައްޤީއަށް ކުރާ އެއްވެސް މަސައްކަތެއް ނެތްކަމަށެވެ. މިހާރުވެސް ޚިދުމަތް ދެމުންދަނީ ފަންކާ ބަހައްޓައިގެންކަމަށެވެ. މިކަމާއި ގުޅިގެން ތަކުރާރުކޮށް ހެލްތު މިނިސްޓްރީގައި އެދުނު ނަމަވެސް ވީހަމަ އެއްކަމެއްވެސް ނެތްކަމަށް ޖޭފޯ ވިދާޅުވިއެވެ.
ނިލަންދޫ ބަނދަރުގެ އެއްގަމު ތޮށި ލުމަށްފަހު އެމަަސައްކަތްވެސް ހުއްޓުނު ގޮތަށް އޮތީ މަޑުޖެހިފައިކަމަށާއި، މިކަމުގައި އެދުމުން މިނިސްޓްރީން ދޭ ޖަވާބަކީ އެގްރީމަންޓް ކުރެވުނު ވަރަށް މަސައްކަތް ނިމިފައިވާކަމަށެވެ. ނަމަވެސް ލަފާފުރުމުގައި ހުރި ދަތިތަކާއިއެކު މިކަމުގެ ކަންބޮޑުވުންވެސް ކަމާއިބެހޭ ފަރާތްތަކަށް ހުށަހަޅާފައިވާކަމަށާއި، ނަމަވެސް މިކަންވެސް ކުރިއަށްނުދާކަމަށެވެ.
މީގެ އިތުރުން ފެމެލީ އެންޑް ޗިލްޑްރެން ސެންޓަރެއް ޤާއިމް ކުރުމަށްވެސް ބަޖެޓް ކުރެވުނު ކަމަށާއި، އެމަަސައްކަތްވެސް ކުރިއަށް ނުދާކަމަށެވެ. މިއާއެކު ނިލަންދޫގައި މިސްކިތެއް ޤާއިމްކުރުމަށް 3 އަހަރު ބަޖެޓްކުރި ނަމަވެސް އަމަލީ މަސައްކަތްނުދާކަމަށް ޖޭފޯ ވިދާޅުވިއެވެ. އަދި އަންނަ އަހަރުގެ ބަޖެޓުގެ ތެރެއިން މިހާރު ކޮމެޓީން ގެނެވުނު ބަދަލާއިއެކު، ފުޓުބޯޅަ ދަނޑުގައި ޗޭންޖިން ރޫމެއް ގާއިމް ކުރުމަށް ވަނީ ހިމެނިފައިކަމަށާއި، މިނިސްޓަރ މަހުލޫފް މިކަންކޮށްދެއްވާނެކަމަށް އުންމީދުކުރައްވާކަމަށް ޖޭފޯ ވިދާޅުވިއެވެ.
ނިލަންދޫގެ ކުނީގެ މައްސަލަގައިވެސް މިކަމުގެ ކަމާއިބެހޭ މިނިސްޓަރާއި ތަކުރާރުކޮށް ވާހަކަ ދެއްކުމުންވެސް ތަފާތު އެކި ތާރީހުތައް ދިނުންފިޔަވައި ވީހަމަ އެއްކަމެއްވެސް ނެތްކަމަށް އޭނާ ވިދާޅުވިއެވެ. އަދި ނަރުދަމާގެ ހާލަތުވެސް އޮތީ އެހާ ދަށްކޮށް ކަމަށް ޖޭފޯ ވިދާޅުވިއެވެ.
ޖޭފޯ ވިދާޅުވީ އޭނާގެ ދާއިރާގައި ހިމެނޭ ދަރަނބޫދޫގެ ފުޓްސަލް ދަނޑުގެ މަރާމާތުގެ މަސައްކަތްވެސް ބަޖެޓް ކުރެވިފައިވާތާ އަހަރުތަކެއް ވެއްޖެކަމަށެވެ. ނަމަވެސް އުންމީދު ކުރަނީ މިފެށޭ އަހަރު އެކަމަށްވެސް ހައްލު އައުންކަމަށެވެ.
ބަޖެޓަކީ ދަރަނި ބޮޑު އަދި އިންތިހާއަށް ދަރަނި އެކުލެވޭ ބަޖެޓެއްކަން ކޮންމެ މެމްބަރަކުވެސް ފާހަގަ ކުރާއިރު، ދަރަނި އެޅިގެންދަނީ ހުރިހާ ރައްޔިތުންގެ ބޮލުގައިކަން ފާހަގަކޮށް ޖޭފޯވަނީ، އެޅޭ ދަރަންޏާ އެއްވަރަށް ކޮންމެ ދާއިރާއަކަށްވެސް ހަމަހަމަ ކަމާއިއެކު ކަންކަން ކޮށްދޭން ޖެހޭކަމަށްވެސް ވިދާޅުވެފައެވެ.
