ޔުއެފާ ޗެމްޕިއަންސް ލީގުގެ ގްރޫޕް ސްޓޭޖުގައި ޔުވެންޓަސް ބަލިކޮށް އެންމެ ފަހުގެ ޗެމްޕިއަން ޗެލްސީން މުބާރާތުގެ ދެވަނަ ބުރުން ޖާގައެއް ކަށަވަރުކޮށްފިއެވެ.
ޗެމްޕިއަންސް ލީގުގެ ގްރޫޕް އެޗްގައި ރޭ ޗެލްސީގެ ދަނޑުގައި ޔުވެންޓަސްގެ މައްޗަށް ޗެލްސީ ކުރިހޯދީ 0-4 ގެ ނަތީޖާއަކުންނެވެ.
މި މެޗު ފަށައިގެން ޗެލްސީން ވަނީ މޮޅު ކުޅުމެއް ދައްކާފައެވެ. މި މެޗުގައި ޗެލްސީން ލީޑު ނެގީ 25 ވަނަ މިނެޓުގައި އެންޓޯނިއޯ ރޫޑިގާގެ އެހީތެރިކަމާއެކު ޓްރެވޯ ޗަލޯބާ ކާމިޔާބުކޮށްދިން ލަނޑުންނެވެ. މި ލަނޑަށްފަހުވެސް ފުރަތަމަ ހާފުގައި ޗެލްސީން ވަނީ ޔުވެންޓަސްގެ ގޯލަށް ނުރައްކާކޮށްފައެވެ.
މެޗުގެ ދެވަނަ ހާފް ފަށައިގެން، ޗެލްސީއަށް ލީޑު ފުޅާކޮށްދިން ލަނޑު 55 ވަނަ މިނެޓުގައި ކާމިޔާބުކޮށްދިނީ، ރީސް ޖޭމްސްއެވެ. ޖޭމްސް ލަނޑު ޖެހިތާ މާގިނައިރުތަކެއް ނުވަނީސް ކަލުމް ހަޑްސަން-އޮޑޯއި ވަނީ ޗެލްސީގެ ތިންވަނަ ލަނޑު ކާމިޔާބުކޮށްދީ ބޮޑު ލީޑެއް އެޓީމަށް ނަގައިދީފައެވެ. ޗެލްސީން މި މެޗުގައި ޖެހި ހަަތަރު ވަނަ ލަނޑު މެޗުގެ ފުރިހަމަ ވަގުތު ހަމަވެގެން ދެއްކި އިތުރު ވަގުތުގެ ތެރޭގައި ކާމިޔާބުކޮށްދިނީ، ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނުކުތް ޓިމޯ ވާނަރއެވެ.
މި ނަތީޖާއާއެކު ޗެލްސީން ވަނީ ޗެމްޕިއަންސް ލީގުގެ ގްރޫޕް ސްޓޭޖުގައި ކުޅެންޖެހޭ 6 މެޗުގެ ތެރެއިން 5 މެޗު ކުޅެގެން ހޯދި 12 ޕޮއިންޓާއެކު މުބާރާތުގެ ދެވަނަ ބުރަށް ދަތުރުކޮށްފައެވެ. ޗެލްސީ އޮތީ ގްރޫޕް އެޗްގެ 1 ވަނައިގައެވެ. ދެވަނައިގައި އޮތް ޔުވެންޓަސްއަށްވެސް 12 ޕޮއިންޓް ލިބޭއިރު ޗެލްސީއަށް ކުރި ލިބެނީ ލަނޑުގެ ތަފާތުންނެވެ. ޔުވެންޓަސްވެސް ވަނީ މީގެކުރިން މުބާރާތުގެ ދެވަނަ ބުުރުން ޖާގައެއް ކަށަވަރުކޮށްފައެވެ.
