މެދުކެނޑުމަށްފަހު ހިޔާ ފުލެޓުތަކުގައި ހައުސިންގ ޑިވެލޮޕްމަންޓް ކޯޕަރޭޝަން، އެޗް.ޑީ.ސީން ކުރިއަށް ގެންދާ ސަރވޭ އަނެއްކާވެސް ފަށައިފިއެވެ.
އެޗް.ޑީ.ސީން ހިޔާ ފްލެޓްތަކުގައި ކުރިއަށް ގެންދާ މިސަރވޭއަކީ ހިޔާ ފްލެޓުތަކުގައި ދިރިއުޅޭ ފަރާތްތަކާއި ގުޅޭ މައުލޫމާތު ހޯދުމާއި، އެތަނުގައި ކަނޑައަޅާފައިވާ ޤަވާއިދުތަކަށް ފުލެޓުތަކުގައި ދިރިއުޅޭ ފަރާތްތައް އަހުލުވެރިވެފައިވާ މިންވަރު ދެނެގަތުމާއި އެކޯޕަރޭޝަނުން ދެމުންގެންދާ ޚިދުމަތްތަކާއި ގުޅޭގޮތުން ޚިޔާލު ހޯދުމަށް ކުރިއަށްގެންދާ ސަރވޭއެކެވެ.
މިސަރވޭ މިމަހުގެ 27 ވަނަ ދުވަހާއި ހަމައަށް ކޮންމެ ދުވަހަކު ހެނދުނު 9:00 އިން ފެށިގެން ރޭގަނޑު 8:00 އާ ހަމައަށެވެ. ހިޔާ ފްލެޓްތަކުގައި ކުރިއަށް ގެންދިޔަ މިސަރވޭގެ މަސައްކަތް މެދުކެނޑިގެން ދިޔައީ ހިޔާ ފްލެޓް ސަރަހައްދުން ބަޔަކު ނިކުމެ މަސައްކަތް ކުރަމުންދިޔަ އެޗްޑީސީގެ މުވައްޒަފުންނަށް ހުރަސް އަޅާ މާރާމާރީ ހިންގަން މަސައްކަތްކޮށްފައިވުމުން ކަމަށް އެޗްޑީސީން މަޢުލޫމާތުދެއްވައެވެ.
ހިޔާ ފްލެޓުތަކުގައި ދިރިއުޅެމުންދާ ފަރާތަކަށް ފައިދާ އާއި މަންފާ ކުރާނެ ގޮތަކަށް ރޭވިގެން ކުރިއަށް ގެންދެވޭ މިފަދަ ސަރވޭތައް ކުރަމުންދިޔަ މުވައްޒަފުންނަށް ހުރަސްއެޅުން ކުށްވެރިކޮށް މިފަދަ ކަންކަން ތަކުރާރުވިޔަ ނުދިނުމަށްޓަކައި ކަމާބެހޭ ފަރާތްތަކަށް މި މައްސަލަ ހުށައަޅައި، ކުރެވެން ހުރި ކަންކަން ކުރާނެކަމަށް އެޗްޑީސީންވަނީ ހާމަކުރައްވާފައެވެ.
