ބ.ދަރަވަންދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް އަޙުމަދު ލަޠީފުގެ މައްސަލަ ސާބިތުނުވާކަމަށް ޖޭއެސްސީން ނިންމައިފިއެވެ.
އަޙްމަދު ލަޠީފްގެ މައްސަލަ ސާބިތު ނުވާކަމަށް ޖޭއެސްސީން ނިންމާފައިވާއިރު، މީގެ ކުރިން އޭނާ ވަނީ ދެ މަސްދުވަހަށް މުސާރަ ނުލިބޭގޮތަށް ސަސްޕެންޑްކޮށްފައެވެ.
މިމަހުގެ 18ގައި ޖޭއެސްސީން ބުނެފައިވަނީ، ލަޠީފް ސަސްޕެންޑްކުރުމަށް ނިންމެވީ، ބ.ތުޅާދޫ މެޖިސްޓްރޭޓް ކޯޓަށް ހުށަހެޅުނު ޖިނާޢީ 5 މައްސަލައެއްގައި ހިމެނޭ ޚަޞްމަކާ އޮންނަ ގުޅުމަކާ ގުޅިގެން ކަމަށްބުނެ އެ މައްސަލަތައް ބެލުމުން އިސްމެޖިސްޓްރޭޓް އަޙުމަދު ލަޠީފު ތަނާޒުލްވެ، ހަމަ އެ ޚަސްމާ ގުޅޭގޮތުން ދަރަވަންދޫ މެޖިސްޓްރޭޓް ކޯޓަށް ހުށަހެޅުނު މައްސަލައެއް ބެލުމުން ތަނާޒުލުވުމެއްނެތި، އެ މައްސަލައިގައި ހިމެނޭ ޚަސްމުގެ ބަންދާމެދު ގޮތެއް ނިންމާފައިވާތީކަމަށެވެ.
އަދި އޭނާގެ ބަންދާމެދު ގޮތެއް ނިންމާފައިވަނީވެސް ކަނޑައެޅިގެން ޤާނޫނާ ޚިލާފަށްކަމަށްވާތީ، އިސްމެޖިސްޓްރޭޓް އަޙުމަދު ލަޠީފުގެ މި ޢަމަލުތަކަކީ،ދިވެހިރާއްޖޭގެ ފަނޑިޔާރުންގެ ޤާނޫނޫނާއި، ފަނޑިޔާރުންގެ ސުލޫކީ މިންގަނޑާއި ޚިލާފަށް ކޮށްފައިވާ ޢަމަލަކަށްވާތީ،ޖުޑީޝަލް ސަރވިސް ކޮމިޝަންގެ ޤާނޫނުގެ ދަށުން، ބ.ދަރަވަންދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް އަޙްމަދު ލަޠީފު، 18 ނޮވެންބަރު 2021 ވަނަ ދުވަހުން ފެށިގެން މުސާރަ ނުލިބޭގޮތަށް 2 (ދޭއް) ހަފުތާގެ މުއްދަތަށް ފަނޑިޔާރުކަމުގެ މަސައްކަތުން ދުރުކުރުމަށް އެކޮމިޝަންގެ ބައްދަލުވުމުގައި ނިންމަވާފައިވާކަމަށެވެ.
ޖޭއެސްސީން ބުނީ، އިސްމެޖިސްޓްރޭޓް އަޙްމަދު ލަޠީފު، ސަސްޕެންޑް ކުރަން ނިންމުމާ ގުޅިގެން، ބ.ޖުޑީޝަލް ދާއިރާ ހިންގުން ބ.ކަމަދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް އަލްއުސްތާޛު އަޙްމަދު ޝުޖާޢުއާ ހަވާލުކޮށްފައިވާކަމަށެވެ.
